မဲခေါင်၊ ဇူလိုင် ၁
ရှမ်းပြည်နယ်မြောက်ပိုင်း ကျောက်မဲမြို့နယ်မှာ တိုက်ပွဲဖြစ်လို့ ဒေသခံတွေဟာ တစ်ခြားမြို့နယ်တွေမှာ ထွက်ပြေးတိမ်းရှောင်တာကြောင့် ကားလက်မှတ်တွေလည်း ၃ သိန်းခွဲထိ မြင့်တက်သွားခဲ့ပါတယ်။
ကျောက်မဲမှာ စစ်ကောင်စီက လေကြောင်းနဲ့ ဗုံးကြဲတာကြောင့် ကားဂိတ်တစ်ချို့ပိတ်ထားပြီး ဒေသခံတွေ စစ်ဘေးရှောင်ဖို့ အခက်အခဲတွေ ဖြစ်နေတယ်လို့ သိရပါတယ်။
“ကျောက်မဲနဲ့ မန္တလေးက ၃ သိန်းခွဲထိ ကားခပေးရတယ်။ မန္တလေးဘက် ပြေးတဲ့သူတွေက အရမ်းများတယ်။ ဒီရက်ပိုင်းဆို ကားလက်မှတ်ပြည့်သွားတယ်။ ဟိုနေ့က ကား ၆ စီးကို လူအယောက် ၄၀ ကျော်သွားတယ်။ မြို့ထဲမှာက မနေရဲကြဘူး။ မနေ့ညနဲ့ ဒီမနက်ထိ မြို့ထဲမှာ လက်နက်ကြီးတွေ ပစ်နေတယ်။ ဟိုတည်တစ်ခုလည်း မီးလောင်သွားတယ်” လို့ ဒေသခံတစ်ဦးက ပြောပါတယ်။
တိုက်ပွဲမဖြစ်ခင်မှာ ကားလက်မှတ်ဟာ တစ်သိန်းကျော်သာရှိခဲ့ပြီး မန္တလေးထွက်ပြေးတဲ့သူတွေ ရှိသလို ကျောက်မဲမြို့အနီးအနား ကျေးရွာတွေကို စစ်ရှောင်နေတဲ့သူတွေလည်း ရှိပါတယ်။ အချို့စစ်ရှောင်တွေအနေနဲ့ မြို့အနီးအနားက ကျေးရွာတွေမှာ အသိမရှိတာကြောင့် သွားလာဖို့အခက်အခဲတွေဖြစ်နေတယ်လို့ သိရပါတယ်။
ကျောက်မဲမြို့နဲ့ နောင်ချိုမြို့တွေမှာတိုက်ပွဲဖြစ်ပွားနေလို့ လမ်းပိတ်ဆို့မှုဖြစ်နေပြီး ရပ်စောက်ဘက်ကနေ တဆင့် စစ်ဘေးရှောင်နေတဲ့သူတွေလည်း ရှိပါတယ်။
မနေ့ညကနေ ဒီနက်ထိ စစ်ကောင်စီတပ်ဖွဲ့က လက်နက်ကြီးတွေပစ်ခဲ့လို့ ရပ်ကွက် ၉ တိလင်ရပ်ကွက်မှာ မီးလောင်ခဲ့ပြီး One love Hotel နဲ့ နေအိမ် ၂၀ ခန့် မီးလောင်ပြီး ပျက်ဆီးသွားပါတယ်။
MK 011
