ရှမ်းပြည်နယ် မြောက်ပိုင်း၊ ကျောက်မဲမြို့နယ်၊ တင်းလုံရွာမှာ မနေ့ အောက်တိုဘာ ၄ ရက်က လင်မယား နှစ်ယောက် ဝါးခုတ်သွားရာ အမျိုးသမီး မိုင်းနင်းမိပြီး ဒဏ်ရာရရှိခဲ့တယ်လို့ ဒေသခံတွေထံကနေ သိရပါတယ်။
ကျောက်မဲမြို့နယ်၊ တင်းလုံရွာက လင်မယားနှစ်ယောက် ရွာအနီးရှိ တောအုပ်ထဲ ဝါးသွားခုတ်ရာ အမျိုးသမီး ဖြစ်သူ မိုင်းနင်းမိခဲ့တယ်လို့ သိရပါတယ်။
“ကျနော်တို့နဲ့အတူ တခြား အဖော်တစ်ယောက် ထပ်ပါသေးတယ်၊ ကျနော်တို့က တစ်ယောက်တစ်နေရာစီ လူခွဲပြီး ဝါးရှာတာပေါ့၊ အဲ့တာနဲ့ နန်းရွှေလင်း ဝါးခုတ်တဲ့ နေရာမှာ မိုင်းနင်းမိပြီး သူမခါး၊ ပေါင်၊ လက်မောင်းနဲ့ တင်ပါးမှာ ဒဏ်ရာရသွားတယ်” လို့ မိုင်းနင်းမိသူရဲ့ အမျိုးသားက ဒေသတွင်း သတင်းဌာနကို ပြောပါတယ်။
မိုင်းနင်းမိတဲ့ အမျိုးသမီးကို ကျောက်မဲဆေးရုံသို့ ပို့ဆောင်ရာ ဒဏ်ရာပြင်းထန်တဲ့ အတွက် လားရှိုးဆေးရုံသို့ လွှဲပြောင်း ပေးလိုက်တယ်လို့ သိရပါတယ်။ ဒဏ်ရာရရှိသူရဲ့ ခန္ဓာကိုယ်ထဲကို မိုင်းစ စိုက်ဝင်နေပြီး မထုတ်ရသေးဘဲ ဒဏ်ရာ ပြင်းထန်နေပြီး သတိမရသေးဘူးလို့ မိုင်းနင်းမိသူရဲ့ အမျိုးသားက ပြောပါတယ်။
“ဆေးကုသဖို့ အခက်အခဲ ရှိတာပေါ့။ ငွေကြေး မတတ်နိုင်လို့ပါ။ အခုထိလည်း မိုင်းစကို မထုတ်ရသေးဘူး”လို့ ၎င်းက ပြောပါတယ်။
အခုအမျိုးသမီး တက်နင်းမိတဲ့ မိုင်းဟာ ဘယ်အဖွဲ့အစည်း ထောင်ထားတယ်ဆိုတာ မသိရှိရပေမယ့် ကျောက်မဲမြို့နယ်မှာ အာဏာသိမ်း စစ်ကောင်စီတပ်တွေနဲ့ တိုင်းရင်းသား လက်နက်ကိုင်တွေ သွားလာလှုပ်ရှား နေပါတယ်။