မဲခေါင်၊ ဖေဖော်ဝါရီ ၂၆
ရှမ်းပြည်မြောက်ပိုင်း၊ မြန်မာ – တရုတ်နယ်စပ်၊ ကျယ်ဂေါင် နယ်စပ်ဂိတ် ဧရိယာအတွင်းရှိ လမ်းပေါ် စည်းကမ်းမဲ့ ရပ်ထားတဲ့ မြန်မာကားတွေကို အသိပေးစာ ထုတ်ပြီးနောက် ၃ ရက် အတွင်း လာမယူတဲ့ ကားတွေကို တရုတ်ဘက်က သိမ်းသွားမှာ ဖြစ်ကြောင်း နယ်စပ် ဒေသခံတွေဆီက သိရပါတယ်။
“ အသိပေးစာက ဖေဖော်ဝါရီလ ၂၁ ရက်နေ့က ထုတ်ထားတာ။ သုံးရက် အချိန်ပေးမယ်၊ အဲဒီ သုံးရက် အတွင်း လာမယူရင် သိမ်းမယ်လို့ ပြောတယ်။ မနေ့က သုံးရက်ပြည့်ပြီ” လို့ နယ်စပ် ဒေသခံ တစ်ဦးက ပြောပါတယ်။
မြန်မာဘက်ခြမ်းမှာ ပြီးခဲ့တဲ့ ၁၀၂၇ တိုက်ပွဲ ကြောင် တရုတ်ဘက်ခြမ်းမှာ ကားတွေ လာထားတာ ရှိသလို ကား အရောင်းအဝယ်လုပ်တဲ့ ကားတွေ ထားတာလည်းရှိတယ်လို့ မူဆယ် ဒေသခံတစ်ဦးက ပြောပါတယ်။
“ ဒိုင်စားပေါ့။ ကားက အရင်ကတည်းက များပါတယ်။” လို့ သူက ပြောပါတယ်။
တရုတ်ဘက်မှာတော့ တရုတ် ကား၊ ဆိုင်ကယ်၊ သုံးဘီး တွေကိုလည်း သတ်မှတ်စည်းကမ်း မလိုက်နာပဲ စည်းကမ်းမဲ့ ရပ်ထားတာတို့၊ မရပ်ရတဲ့ သတ်မှတ်နေရာ ရပ်ထားတာတို့ဆိုရင် ကရိန်းနဲ့ မ ပြီး သိမ်းခံရတာတွေလည်း ရှိတယ်လို့ ရွှေလီမှာ နေထိုင်သူတွေက ပြောပါတယ်။
ကျယ်ဂေါင် နယ်စပ်ဂိတ် ဧရိယာရှိ လမ်းမှာ အချိန်ကြာမြင့်စွာ ရပ်ထားတဲ့ ယာဉ်တွေအားလုံးကြေညာချက်ထုတ်ပြန်တဲ့ နေ့မှ ၃ ရက်အတွင်း ထွက်ခွာရမှာဖြစ်ပြီး မဟုတ်ပါက ယာဉ်ထိန်းဌာနမှ ဥပဒေနဲ့ အညီ ဝန်ချီစက်နဲ့ ဆွဲထုတ်သွားမှာဖြစ်ကြောင်း ဖေဖော်ဝါရီ ၂၁ ရက်နေ့က ကျယ်ဂေါင်နယ်စပ် ရပ်ရွာကော်မတီက အသိပေး ကြေညာစာ ထုတ်ပြန်ထားပါတယ်။
CJ-008
