မဲခေါင်၊ နို၀င်ဘာ ၂၈
ရှမ်းပြည်နယ် မြောက်ပိုင်း၊ သီပေါမြို့နယ်၊ ကျင်သီတံတားကနေ ကျောက်မဲမြို့ထဲ ဆုတ်ခွာလာတဲ့ စစ်ကောင်စီတပ်ကို တအာင်းအမျိုးသား လွတ်မြောက်ရေး တပ်မတော်- TNLA က မနေ့ ညနေ ၅ နာရီ ဝန်းကျင်မှာ တိုက်ခိုက်ခဲ့လို့ တိုက်ပွဲ ပြင်းထန်ခဲ့တယ်လို့ ဒေသခံတွေက ပြောပါတယ်။
ပြီးခဲ့တဲ့ နိုဝင်ဘာလ ၂၂ ရက်နေ့မှာ ဖောက်ခွဲ ဖျက်ဆီးခံရတဲ့ ကျင်သီတံတားကို ပြင်ဖို့ စစ်အင်ဂျင်နီယာတပ် အပါအဝင် အင်အား ၁၀၀ ဝန်းကျင်ရှိ စစ်ကြောင်း တစ်ခု ရောက်ရှိလာပြီးနောက် တိုက်ပွဲတွေ စတင်ခဲ့ရာက မနေ့က TNLA ဘက်က တိုက်ခိုက်ပြီး တံတားကို သိမ်းပိုက်ခဲ့ပါတယ်။
ကျင်သီတံတားကို TNLA က မနေ့ မနက် အစောပိုင်းမှာ သိမ်းပိုက်ခဲ့ရာ ကျင်သီ တံတား ကနေ ဆုတ်ခွာလာတဲ့ စစ်ကောင်စီ စစ်ကြောင်းဟာ ကျောက်မဲ အထွက် တိုးဂိတ်မှာ တပ်စွဲခဲ့တယ်လို့ ဒေသခံတွေက ပြောပါတယ်။
“ ကျင်သီတံတားကို ပြင်ဖို့ လုပ်ကတည်းက TNLA က သူတို့ (စစ်တပ်) ကို တိုက်နေတာ။ လမ်းတိုင်း နေ့တိုင်း နီးပါးပဲ သူတို့ တိုက်ခိုက်ခံရတာ။ မနေ့က သူတို့ ကျင်သီကနေ ဆုတ်ပြီး တိုးဂိတ်ထဲ ပြန်နေနေတာ” လို့ ကျောက်မဲမြို့ခံ အမျိုးသမီး တစ်ဦးက ဆိုပါတယ်။
စစ်ကောင်စီတပ်က ပျက်စီးသွားတဲ့ ကျင်သီတံတားပြင်ဖို့ သွားစဥ် အင်အား ၁၀၀ ဝန်းကျင်ရှိပြီး TNLA တိုက်ခိုက်လို့ ပြန်ဆုတ်ချိန်မှာ အင်အား ၈၀ ခန့်သာ ရှိတော့တယ်လို့ သူက ဆက်ပြောပါတယ်။
ကျောက်မဲမြို့အထွက် တိုးဂိတ်မှာ တပ်စွဲထားတဲ့ အဲဒီ စစ်ကြောင်းကို TNLA က မနေ့ ညနေပိုင်းမှာ တိုက်ခိုက်ခဲ့ရာ စစ်ကောင်စီ စစ်ကြောင်းဟာ ကျောက်မဲမြို့ (၅၀၂) တပ်စခန်းထဲ ဆုတ်ခွာသွားပြီး မြို့ထဲကို လက်နက်ကြီးနဲ့ ပစ်ခတ်ခဲ့ပါတယ်။
စစ်ကောင်စီ ခမရ (၅၀၂) တပ်က ပစ်ခတ်လိုက်တဲ့ လက်နက်ကြီး ထိမှန်လို့ ကျောက်မဲမြို့ အ၀င် တိုးဂိတ် အဆောက်အအုံ၊ ပန့်ဆီဆိုင်နဲ့ ကုန်ကား ၃ စီး ထိမှန် မီးလောင် ပျက်စီးခဲ့တယ်လို့ ဒေသခံတွေက ပြောပါတယ်။
“ တိုးဂိတ်က စစ်တပ်လက်နက်ကြီး ပြန်ထိတာ။ တိုက်ပွဲဖြစ်ချိန် ကတည်းက ဝန်ထမ်းတွေ ပြေးကြလို့ လူထိခိုက်တာတော့ မကြားသေးဘူး” လို့ ကျောက်မဲမြို့ခံ အမျိုးသား တစ်ဦးက ပြောပါတယ်။
TNLA ကတော့ ကျောက်မဲမြို့နယ်၊ အေရှားဝေါ တိုးဂိတ် အနီးမှာ မနေ့ ညနေ ၅ နာရီ၊ ၂၅ မိနစ်မှာ စစ်ကောင်စီတပ်နဲ့ တိုက်ပွဲ ဖြစ်ပွားခဲ့တယ်လို့ ထုတ်ပြန်ထားပေမယ့် အသေးစိတ် ဖော်ပြတာ မရှိသေးပါဘူး။
အလားတူ ကျောက်မဲမြို့နယ် နားခေါ်၊ ကောင်းမူးလိန်ကျေးရွာ အနီးမှာ မနေ့ မနက် ၇ နာရီခန့်က စစ်ကောင်စီတပ်နဲ့ တိုက်ပွဲဖြစ်ပွားပြီး လက်နက် တစ်လက်နဲ့ စစ်သုံးဆောင်တွေ သိမ်းဆည်းရမိခဲ့သလို ကျောက်မဲမြို့နယ် မန်စံတပ်စခန်းကို မနေ့ ည ၁၀ နာရီမှာ တိုက်ခိုက် သိမ်းပိုက်နိုင်ခဲ့တယ်လို့ TNLA က မနေ့ ညပိုင်းမှာ ထုတ်ပြန်ထားပါတယ်။
CJ-014
#MeKongNews
#ကျောက်မဲမြို့
#TNLA
#လက်နက်ကြီး