လက်နက်ချအလင်းမဝင်ဘဲ ခေါင်းမာနေလျှင် ထပ်ချေမှုန်းမယ်လို့ MNDAA ရာဇသံပေး
မဲခေါင်၊ ဒီဇင်ဘာ ၄
ရှမ်းပြည်နယ်မြောက်ပိုင်း၊ ကုန်းကြမ်းမြို့နယ်ကို သိမ်းပိုက်ပြီးနောက် ထွက်ပြေးသွားတဲ့ စစ်ကောင်စီတပ်ဖွဲ့ဝင်တွေကို MNDAA က လိုက်လံရှင်းလင်းခဲ့ရာမှာ နှစ်ရက်အတွင်း စစ်ကောင်စီတပ်ဖွဲ့ဝင် ၁၀၀ ခန့်ကို ချေမှုန်းနိုင်ခဲ့တယ်လို့ သိရပါတယ်။
ကိုးကန့်ဒေသ၊ ကုန်ကြမ်းမြို့နယ်ထဲမှာ အမြဲတမ်းတပ်စွဲထားတဲ့ အရှေ့မြောက်တိုင်းစစ်ဌာနချုပ် လက်အောက်ခံ ခလရ-၁၂၅၊ စကခ (စစ်ဆင်ရေးကွပ်ကဲမှုဌာနချုပ်) ၁၂ နဲ့ ၁၆ တပ်က လက်အောက်ခံတပ်ဖွဲ့ ဝင် ၂၈၀ ခန့်ဟာ နိုဝင်ဘာ ၂၈ ရက်မှာ MNDAA က ကုန်ကြမ်းကို သိမ်းပိုက်လိုက်စဉ်မှာ ထွက်ပြေးသွားခဲ့တယ်လို့ ဆိုပါတယ်။
အဲ့ဒီလို ထွက်ပြေးသွားတဲ့ စစ်ကောင်စီတပ်ဖွဲ့ဝင် ၂၈၀ ခန့်ဟာ နိုဝင်ဘာ ၂၉ ရက် ရှီရှမ်းဒေသ၊ ရှောက်ကိုင်ကျေးရွာအုပ်စုထဲက ရွာရဲ့ တောင်ကုန်းအောက်မှာ ပုန်းအောင်နေတာကို MNDAA က သိရှိပြီးနောက် နိုဝင်ဘာ ၃၀ ရက်နေ့မှာ တိုက်ခိုက်ခဲ့တာပါ။
နောက်နေ့ ဒီဇင်ဘာ ၁ ရက်မှာလည်း ကျန်ရှိတဲ့ စစ်ကောင်စီတပ်ဖွဲ့ဝင်တွေကို ဆက်လက်တိုက်ခိုက်ခဲ့တာကြောင့် နှစ်ရက်ပေါင်းမှာ စစ်ကောင်စီတပ်ဖွဲ့ဝင် ၁၀၀ ခန့်သေဆုံးခဲ့တယ်လို့ MNDAA က ပြောပါတယ်။
“ရှိတဲ့သူတွေ အားလုံးကိုတော့ ချေမှုန်းနိုင်ခဲ့တယ်၊ တပ်ရင်း ၁ ရင်းလုံးဆိုတဲ့ စကားလုံးကတော့ သိပ်မမှန်ဘူးဗျ၊ ထွက်ပြေးတိမ်းရှောင်လာတဲ့ စစ်ကောင်စီအုပ်စု တစ်စု ဆိုရင် ပိုမှန်မယ်။ ဘာဖြစ်လို့လဲဆို သူတို့က တပ်ရင်းတစ်ရင်းတည်းကလား၊ အခြားတပ်ရင်းနဲ့ပူးပေါင်းပြီးလာတာလား ဆိုတာတော့ မသိရဘူး” လို့ MNDAA ရဲ့ ပြောဆိုခွင့်ရှိသူ လီကျားဝင်း က မဲခေါင်သတင်းဌာနကို ပြောပါတယ်။
ထွက်ပြေးသွားတဲ့ စစ်ကောင်စီတပ်ဖွဲ့ဝင် ၁၀၀ ခန့်သေတဲ့ အဲ့ဒီတိုက်ပွဲမှာ ၄ ယောက်ကိုလည်း အရှင်ဖမ်းမိခဲ့ပြီး လက်နက်အများအပြားနဲ့အတူ စစ်ကောင်စီတပ်ဖွဲ့ဝင်တွေထံက မူးယစ်ဆေးဝါးတွေကိုလည်း သိမ်းဆည်းရမိခဲ့တယ်လို့ ဆိုပါတယ်။
စစ်ကောင်စီက အခိုင်အမာတပ်စွဲထားတဲ့ ကုန်းကြမ်းတပ်စခန်းကို သိမ်းပိုက်ဖို့အတွက် MNDAA က နိုဝင်ဘာ ၂၄ ရက်ကတည်းက အပြင်းအထန်တိုက်ခိုက်ခဲ့ပါတယ်။
၅ ရက်ကြာတိုက်ခိုက်ပြီးနောက် နိုဝင်ဘာ ၂၈ ရက်မှာ ကုန်ကြမ်းတပ်စခန်းကို သိမ်းပိုက်နိုင်ခဲ့ပြီး အဲ့ဒီ့စခန်းမှာ တပ်စွဲထားတဲ့ ခလရ (၁၂၅) တပ်ရင်းတစ်ခုလုံး MNDAA ထံ အလံဖြူထောင် လက်နက်ချအလင်းဝင်ခဲ့ပါတယ်။ အဲ့ဒီလိုလက်နက်ချ အညံခံခဲ့သူတွေဟာ မိသားစုအပါ ၂၇၂ ယောက်ရှိခဲ့တယ်လို့ ဆိုပါတယ်။
အဲ့ဒီတိုက်ပွဲမှာလည်း စကခ ၁၆ တပ်ရင်းမှူးအပါ စစ်ကောင်စီတပ်ဖွဲ့ဝင် ၁၀၀ ခန့်ဟာ လက်နက်မချဘဲထွက်ပြေးသွားတယ်လို့ MNDAA ထံ လက်နက်ချအလင်းဝင်လာတဲ့ စစ်ကောင်စီတပ်ဖွဲ့ဝင်တွေက ပြောထားတာကို ကိုးကန့်တပ်ဖွဲ့က သတင်းထုတ်ပြန်ထားပါတယ်။
“စခန်းတွေ လိုက်သိမ်းချိန်မှာ ထွက်ပြေးသွားသူတွေ အများကြီးရှိတယ်၊ အခုချေမှုန်းလိုက်တဲ့သူတွေဟာ စကခ ၁၆ မှူးနဲ့အတူ ထွက်ပြေးသွားတဲ့ သူတွေတော့ မဟုတ်လောက်ဘူးထင်တယ်” လို့ MNDAA ပြောရေးဆိုခွင့်ရှိသူ လီကျားဝင်း က မဲခေါင်သတင်းဌာနကို ပြောပါတယ်။
အဲ့ဒီလို ထွက်ပြေးသွားသူတွေကို လက်နက်ချအလင်းဝင်ပါက ကောင်းမွန်စွာဆက်ဆံပြီး လုံခြုံတဲ့ နေရာပို့ပေးမှာဖြစ်ပြီး ပေကပ်ခေါင်းမာနေရင်တော့ လိုက်လံချေမှုန်းသွားမယ်လို့ MNDAA က ရာဇသံပေးထားပါတယ်။
မြောက်ပိုင်းမဟာမိတ် ၃ ဖွဲ့နဲ့ တော်လှန်ရေးတပ်ပေါင်းစုတို့ စတင်ခဲ့တဲ့ “၁၀၂၇ စစ်ဆင်ရေး” တစ်လကျော်အတွင်း စစ်ကောင်စီစခန်း ၂၀၀ ကျော်ကို သိမ်းပိုက်ထားပါတယ်။
ဒါ့အပြင် ရှမ်းပြည်နယ်မြောက်ပိုင်းက ချင်းရွှေဟော်၊ မုံးကိုး၊ ကွမ်းလုံ၊ ပန်ဆိုင်းနဲ့ ကုန်းကြမ်းမြို့တွေကိုလည်း မဟာမိတ်အဖွဲ့တွေက အလုံးစုံထိန်းချုပ်ထားပါတယ်။
တရုတ်-မြန်မာ နယ်စပ်ကုန်သွယ်ရေးဂိတ် ၄ ခုကိုလည်း MNDAA က သိမ်းပိုက်ထားပြီး တချို့မြို့တွေမှာလည်း စစ်ကောင်စီရဲ့ အုပ်ချုပ်ရေးနဲ့ တရားစီရင်ရေးတွေလည်း ပျက်စီးနေပါတယ်။
#MeKongNews
#ကိုးကန့်
#ချေမှုန်း
#စစ်ကောင်စီ
#သိမ်းပိုက်
#ထွက်ပြေး