SSPP/SSA မြို့နယ်အဆင့်အုပ်ချုပ်ရေးတာဝန်ရှိသူတွေနဲ့ လူငယ်အသင်းတွေ ပူးပေါင်းပြီး သိန္နီမြို့နယ်၊ စယ်အူကျေးရွာအုပ်စုရှိ မူးယစ်ဆေးဝါး ရောင်းဝယ်ဖောက်ကားတဲ့ နေရာကို ဒီဇင်ဘာလ ၂၀ရက်က ရှင်းလင်းခဲ့တယ်လို့ ထုတ်ပြန်ထားပါတယ်။

အဲဒီပူးပေါင်း အဖွဲ့က နံနက် ၆ နာရီခွဲကနေ ည ၇ နာရီအထိ စယ်အူကျေးရွာအုပ်စု၊ မန်မိုင်ရွာအနီးမှာ ဈေးခင်းသဖွယ် ရောင်းဝယ်ဖောက်ကားနေတာဖြစ်ပြီး SSPP က မူးယစ်ရောင်းဈေးကို ရှင်းလင်းရာမှာ ဆေးသုံးစွဲသူ၊ ရောင်းဝယ်သူအပါအဝင် ၁၁ ယောက် ကိုဖမ်းဆီးရမိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ဒါ့အပြင် မူးယစ်ရောင်းဝယ်သုံးစွဲဖို့ အသုံးပြုတဲ့ အမိုးအကာတဲအိမ်တွေကိုလည်း မီးရှို့ဖျက်ဆီးခဲ့သလို ဖမ်းဆီးရမိသူတွေကို ဆက်လက်စစ်ဆေးမှာဖြစ်တယ်လို့ ထုတ်ပြန်ထားပါတယ်။

ဖမ်းဆီးရမိသူတွေအနက် ပြန်လည်ပြုစုပျိုးထောင်ကုသပေးနိုင်သူကို ကုသပေးမှာဖြစ်ပြီး ပြစ်ဒဏ်ပေးသင့်သူတွေကိုလည်း SSPPရဲ့ မူးယစ်ဆေးဝါးဆန့်ကျင်တိုက်ဖျက်နှိမ်နင်းရေးမူအတိုင်း ဆောင်ရွက်သွားမှာဖြစ်တယ်လို့လည်း ထုတ်ပြန်ချက်မှာ ပါရှိပါတယ်။

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)