မဲခေါင်၊ မတ် ၂၂
မြောက်ပိုင်းမဟာမိတ် – FPNCC အဖွဲ့ဝင်တွေဖြစ်တဲ့ ‘ဝ’၊ မိုင်းလား၊ SSPP ၃ဖွဲ့နဲ့ အာဏာသိမ်းစစ်ကောင်စီတို့ ဒီနေ့ မတ်လ ၂၂ရက်က နေပြည်တော်မှာ တွေ့ဆုံခဲ့တယ်လို့ စုံစမ်းသိရပါတယ်။
ဒီတကြိမ်တွေ့ဆုံမှုဟာ ၂ရက်ခန့်ကြာနိုင်ပြီး ဒေသတွင်းတည်ငြိမ်ရေးနဲ့ အေးချမ်းရေးကိုပဲ ဆွေးနွေးသွားမှာ ဖြစ်တယ်လို့ UWSA ‘ဝ’ တပ်ဖွဲ့ ပြောခွင့်ရပုဂ္ဂိုလ် ဦးညီရမ်းက မဲခေါင်ကို ပြောပါတယ်။
“ထွေထွေထူးထူးတော့ မရှိပါဘူး။ တွေ့နေကျအတိုင်းပဲ ထပ်တွေ့တာပါ၊ ဒေသတွင်း တည်ငြိမ်ရေး၊ လုံခြုံရေး၊ အေးချမ်းရေး ဒါတွေပဲ အဓိက ဆွေးနွေးမှာ ဖြစ်ပါတယ်” လို့ သူက ပြောပါတယ်။
ဒီလပိုင်းအတွင်းမှာ မြောက်ပိုင်းမဟာမိတ် – FPNCC အဖွဲ့ဝင်တွေဟာ တရုတ်အထူးကိုယ်စားလှယ်နဲ့ ၂ကြိမ်တွေ့ဆုံထားသလို အဖွဲ့ဝင်အချင်းချင်းကြားလည်း အစည်းအဝေးပြုလုပ်ထားပါတယ်။
အာဏာသိမ်းစစ်ကောင်စီကလည်း တရုတ်အထူးကိုယ်စားလှယ်နဲ့ ဒီလထဲ နေပြည်တော်မှာ တွေ့ထားပါသေးတယ်။
မှတ်ချက် – ပုံဟောင်း
MK – 004
#MeKongNews
