ရှမ်းလက်နက်ကိုင် တော်လှန်ရေးအဖွဲ့အချင်းချင်းကြား ဖြစ်ပွားနေသည့် တိုက်ပွဲများနှင့် ရှမ်းပြည်နယ်အတွင်းရှိ တိုင်းရင်းသားလက်နက်ကိုင်အဖွဲ့များကြား တိုက်ပွဲများ လျော့နည်းရပ်တန့်သွားစေရန် နည်းလမ်းရှာကာ စေ့စပ်ညှိနှိုင်းနေကြောင်း ရှမ်းပြည်ညီညွတ်ရေးကော်မတီ-CSSU က ၎င်း၏ ရှမ်းအမျိုးသားလူ့အခွင့်အရေး ထုတ်ပြန်ကြေညာချက်တွင် ဖော်ပြထားသည်။
ဇွန်လ ၁၆ရက်က ထုတ်ပြန်သည့် ယင်းထုတ်ပြန်ချက်တွင် တိုက်ပွဲများရပ်တန့်သွားစေရန် လုပ်ဆောင်နေသည့်အပြင် ရှမ်းပြည်နယ်အတွင်း မူလ လူ့အခွင့်အရေးများဖြစ်သည့် လွတ်လပ်စွာပြောဆိုခွင့်၊ လွတ်လပ်စွာသတင်းရယူခွင့်၊ လွတ်လပ်စွာနေထိုင်ခွင့်၊ လွတ်လပ်စွာ ပစ္စည်းဥစ္စာပိုင်ဆိုင်ခွင့်နှင့် လွတ်လပ်စွာ ရှင်သန်ခွင့်တို့ ရရှိပါစေကြောင်းလည်း ကိုယ်ချင်းစာနာစွာ ဆန္ဒပြုလိုက်ကြောင်း ဖော်ပြထားသည်။
ရှမ်း၊ ကချင်၊ ကရင်နီနှင့် ကရင်ပြည်တို့တွင် ဖြစ်ပွားနေသည့်တိုက်ပွဲများကြောင့် စစ်ဘေးရှောင်နေရသည့် ပြည်သူများ ဂုဏ်သိက္ခာရှိစွာ နေရပ်ပြန်နိုင်ရေးနှင့် အခြေခံလူ့အခွင့်အရေးများ ဆုံးရှုံးစေရေးအတွက်လည်း သက်ဆိုင်သည့်အဖွဲ့အစည်းများဖြင့် ပူးပေါင်းဆောင်ရွက်သွားမည်ဟု ဖော်ပြထားသည်။
ဖက်ဒရယ်ဒီမိုကရေစီအတွက် တိုက်ပွဲဝင်နေသည့် အဖွဲ့များအနေဖြင့်လည်း လက်တွဲဆောင်ရွက်ကြရန် တိုက်တွန်းထားသည်။
၁၉၉၇ ခုနှစ် ဇွန်လ ၁၆ရက်တွင် မြန်မာ့စစ်တပ် ခမယ ၅၁၃ က ရှမ်းပြည်နယ်၊ ကွန်ဟိန်မြို့နယ်၊ ကျိုင်းလုံကျေးရွာတွင် ကျေးရွာသား ၂၇ဦး ကိုလည်ကောင်း ခလယ ၂၄၆ က ဆိုင်းခေါင်ရွာတွင် ကျေးရွာသား ၂၉ဦးကိုလည်ကေင်း သတ်ဖြတ်ခဲ့သည့်အတွက် ဇွန်လ ၁၆ရက်ကို ရှမ်းအမျိုးသားလူ့အခွင့်အရေးနေ့အဖြစ် သတ်မှတ်ထားခြင်း ဖြစ်သည်။