ရှမ်းပြည်နယ်တောင်ပိုင်း၊ ပင်လုံနယ်အတွင်း ရှမ်းပြည်ပြန်လည်ထူထောင်ရေး ကောင်စီ – RCSS နှင့် ရှမ်းပြည်တိုးတက်ရေးပါတီ – SSPP တို့ ယနေ့ ဇူလိုင် ၂၀ ရက်၊ နံနက်ပိုင်းက ပစ်ခတ်မှုဖြစ်ပွားခဲ့ကြောင်း သိရသည်။
ယနေ့ နံနက် ၆ နာရီခန့်က စတင်ကာ ပစ်ခတ်ပစ်ခတ်မှုဖြစ်ပွားခြင်းဖြစ်ပြီး နောင်လှိုင်နှင့် ဝမ်ယိမ်းကျေးရွာကြားတွင် ဖြစ်ကြောင်း ဒေသခံတစ်ဦးက မဲခေါင်သတင်းသို့ ပြောသည်။
“ပစ်ခတ်မှုက ခဏပဲဖြစ်တာပါ။ သိပ်တော့ မပြင်းထန်ပါဘူး။ အခုလက်ရှိထိတော့ ပစ်ခတ်သံတွေ မကြားရတော့ဘူး။ SSPP နဲ့ မဟာမိတ်တွေက ပင်လုံ၊ ရပ်စောက်ဘက်မှာ အင်အားထပ်တိုးထားတယ်လို့ သိရတယ်” ဟု ၎င်းက ပြောသည်။
ထို့အတူ ဇူလိုင် ၁၅ ရက်ကလည်း RCSSနှင့် SSPP တို့သည် ရှမ်းပြည်နယ်အရှေ့ပိုင်း၊ ကျိုင်းတုံမြို့မြောက်ဘက်ရှိ မိုင်းလားနှင့် ဝမ်ဟိုင်းဒေသ၊ ရှမ်းပြည်နယ်တောင်ပိုင်း၊ ရပ်စောက်မြို့နယ်ရှိ ကျောက်ဂူဒေသနှင့် လွိုင်လင်မြို့နယ်၊ ပင်လုံဒေသတို့တွင် ထိတွေ့မှုဖြစ်ပွားခဲ့ခြင်း ဖြစ်သည်။
ဇူလိုင် ၈ ရက်ကလည်း ကျောက်ဂူဒေသတွင် RCSS တပ်ဖွဲ့က အင်အား ၅၀ ကျော်ဖြင့် ဝင်ရောက်လာပြီးနောက် စစ်ရေးတင်းမာနေပြီး ဖေဖော်ဝါရီ ၉ ရက်ကလည်း ကျောက်ဂူရွာအနီးတွင် တိုက်ပွဲဖြစ်ပွားခဲ့ခြင်းကြောင့် ရပ်စောက်မြို့ပေါ်သို့ ဒေသခံများ ထွက်ပြေးတိမ်းရှောင်ခဲ့ကြောင်း သိရသည်။
အာဏာသိမ်းစစ်ကောင်စီက မိုင်းရှူးနယ်နှင့် ပင်လုံနယ်မှ SSPP ၏ တပ်စခန်းများကို ဆုတ်ခွာခိုင်းသည့်အတွက် စစ်ရေးတင်းမာမှုရှိနေပြီး ထိတွေ့တိုက်ပွဲများလည်း ဆက်တိုက်ဖြစ်ပွားနေသည်။