ကိုရိုနာဗိုင်းရပ်စ် ပြန့်ပွားမှုမှာ တစ်ကမ္ဘာလုံးတွင် မြင့်မားလျှက်ရှိသည့်အတွက် ရှမ်းအမျိုးသားအဆင့် နိုင်ငံရေး ဆွေးနွေးပွဲများ ကျင်းပမှုကို နောက်ဆုတ်ရွှေ့ဆိုင်းထားရန် ရှမ်းတိုင်းရင်းသားများ ဒီမိုကရေစီအဖွဲ့ချုပ် – SNLD က တင်ပြထားကြောင်း သိရသည်။
ကိုရိုနာဗိုင်းရပ်စ် ပြန့်ပွားမှုမှာ မြင့်မားနေသည့် အတွက် လက်တွေ့ကျပြီး ထည့်သွင်းစဉ်းစားရန် လိုကြောင်း ရှမ်းအမျိုးသားအဆင့် နိုင်ငံရေးဆွေးနွေးပွဲများ ပြုလုပ်ရန် ဆွေးနွေးရာတွင် တင်ပြထားသည်ဟု SNLD အထွေထွေအတွင်းရေးမှူး ဦးစိုင်းညွန့်လွင်က မဲခေါင်သတင်းဌာနကို ပြောသည်။
“အရေးကြီးတဲ့အချက် တစ်ချက်ပေါ့။ ဘုရားပွဲတွေတောင် တစ်နှစ်ရပ်လိုက်တာမျိုးရှိတယ်လေ။ ဒီမှာ(ရှမ်းပြည်နယ်) ပိုပြီးသတိထားဖို့ ပြောကြတယ်” ဟု ၎င်းက ပြောသည်။
ထိုသို့ တင်ပြထားသော်လည်း RCSS တာဝန်ရှိသူများမှ မည်သို့ ဆုံးဖြတ်မည်ကို မသိရသေးကြောင်း ဦးစိုင်းညွန့်လွင်က ပြောသည်။
ရှမ်းအမျိုးသားအဆင့် နိုင်ငံရေးဆွေးနွေးပွဲများသာမက နေပြည်တော်တွင်ကျင်းပမည့် ၂၁ ရာစု ပင်လုံညီလာခံကဲ့သို့ လူအများအပြားစုဝေးမည့် ပွဲများပါ ရွှေ့ဆိုင်းသင့်ကြောင်း ၎င်းက ဆိုသည်။
ရှမ်းပြည်နယ်မှာ ကိုရိုနာဗိုင်းရပ် စတင်ဖြစ်ပွားရာ တရုတ်နိုင်ငံနှင့် နယ်နမိတ် မိုင်ပေါင်းများစွာ ထိစပ်နေသည့် အတွက် ပိုမို သတိထားရန်လိုကြောင်း ရှမ်းပြည်နယ်အရေးကျွမ်းကျင်သူ သတင်းစာဆရာ စိုင်းထွန်းအောင်လွင်က ပြောသည်။
ဖေဖော်ဝါရီလအတွင်းက NCA လက်မှတ်ထိုးထားသည့် တိုင်းရင်းသားလက်နက်ကိုင်များ NCA-S EAO နှင့် အစိုးရ ကိုယ်စားလှယ်တို့ ရန်ကုန်တွင် တွေ့ဆုံပြီးနောက်ပိုင်း အမျိုးသားအဆင့် နိုင်ငံရေးဆွေးနွေးပွဲများ ပြုလုပ်ရန် လမ်းပွင့်သွားပြီဟု RCSS မှ ပြောဆိုထားသည်။
ကမ္ဘာပေါ်တွင် ကိုရိုနာဗိုင်းရပ်စ်မှာ နိုင်ငံပေါင်း ၇၂ နိုင်ငံတွင် ပျံနှံနေပြီး လူပေါင်း ၉၀၀၀၀ ကျော်ကို ကူးစက်ထားသည်။ သို့သော် မြန်မာနိုင်ငံတွင်မူ ကူးစက်ခံထားရသူ မရှိသေးကြောင်း ကျန်းမာရေးနှင့် အားကစားဝန်ကြီးဌာန၏ ထုတ်ပြန်ချက်များအရ သိရသည်။
