အမြဲပြုံး မဲလုံးရေးသည်
တချို့က စာရူး၊ ကဗျာရူး။ တချို့က အချစ်ရူး။ တချို့က ရုပ်ရှင်ရူး.၊ တချို့က ဥစ္စာရူး။ တချို့က အာဏာရူး။ အဲလို အရူးမျိုးတွေထဲမှာ upper class အရူးက အာဏာရူးဖြစ်မယ်ထင်ပါတယ်။ ဘာဖြစ်လို့လဲဆိုတော့ အာဏာရူးဟာ ကျန်တဲ့အရူးတွေကို လွှမ်းမိုး အနိုင်ယူလိုစိတ်နဲ့ ရူးတာဖြစ်လို့ပါ။
အာဏာရူးတွေကို ထပ်မံခွဲခြမ်းစိပ်ဖြာလေ့လာကြည့်တော့ တချို့က ညွှန်မှူးရူး၊ တချို့က ဝန်ကြီးရူး၊ တချို့က ဥက္ကဌရူး။ တချို့က ဗိုလ်ချုပ်ရူး။ တချို့က သမ္မတရူး စသဖြင့် ရှိနေတာကိုတွေ့ရပါတယ်။ အဲဒီအာဏာရူးတွေထဲမှာ ထိပ်ဆုံးက အရူးက သမ္မတ ရူးပါ။ သူက အရူးတကာ ထိပ်ခေါင် ပါပဲ။ အဲဒီအရူးက လူသားအားလုံး တနည်းပြောရရင် အရူးအားလုံးထက် ခေါင်တလုံးပိုမြင့်နေတတ်ပါတယ်။ ဒါပေမယ် အရူးတကာထက် ခေါင်းတလုံးပိုနိမ့်ပြီး သမ္မတရူး ရူးနေရင်တော့ အရူးစဉ်မမှီပဲ ရူးနေသူမို့ ကုရာနတ္တိ ဆေးမရှိပါဘူး။ ဆေးရှိလည်း ဒေါ်လာဈေးတက်နေလို့ ဝယ်နိုင် အံ့မထင်ပါ။
ထိုသို့သော သမ္မတရူးမျိုးသည် ဘာမဆို လုပ်ရဲသူများဖြစ်တော်မူသောကြောင့် သူ့ကို အားပေးထောက်ခံရုံမှ တပါး အခြားမရှိပြီ။ အရူးဘုံမြောက်ဆိုသောစကားသည် အကြောင်းမဲ့ပေါ်လာခြင်းမဟုတ်သလို ရှေးခေတ် ဂျန်လီးများက ဂျင်းထည့်ထားခြင်းလည်း မဟုတ်သည်ကို သတိချပ်သင့်ပါတယ်။
ထိုကြောင့် အဖက်ဖက်က ပိတ်ဆို့ခံနေရသော ကျွန်ုပ်၏ စီးပွားရေး ကို အရှိန်အဟုန်ဖြင့် ဦးမော့ ဖင်ထောင် လာစေခြင်းငှာ သမ္မတရူးများကို စုစည်းကာ အွန်လိုင်းပေါ်မှ ကျူရှင်ပေးခြင်း လုပ်ငန်းကို စတင်ဖို့ ဆုံးဖြတ်လိုက်တာပါ။
သမ္မတရူးများ ဟူသည်ကား အသိဉာဏ်မရှိသလို ဘာအရည်အချင်းမှ မရှိပဲ ထိပ်ဆုံးနေရာကို ရလိုသူများဖြစ်ခြေ၏။ ထိုကြောင့် ကျွန်ုပ်အကြံအဖန် စီးပွားရေဈေးကွက်းတွင် ထို သမ္မတရူးများသည် သားကောင်းရတာနာများ ဧကံဖြစ်ခြေတကား။
တကယ်တော့ သမ္မတရူးတစ်ယောက်အဖို့ သမ္မတယောက်ဖြစ်ရန် ဘာမှ မခက်ကြောင်း ကျွန်ုပ်၏ ဖေါက်သည်များ ဦးစွာ သဘောပေါက်ထားဖို့သာလိုပါတယ်။
ကျွန်ုပ်ကျူရှင် တက်လိုသူ သမ္မတရူးများကို
၁။ ဘာမဆိုလုပ်ရဲသော အရူးဓါတ်ခံ အပြည့်ရှိရန်လေ့ကျင့်သင်ကြားပေးမည်
၂။ ဗျူတီပါလာ တခုဖွင့်နိုင်သည်အထိ အလှဖန်တည်းရှင်ဖြစ်အောင်လေ့ကျင့်ပေးမည်။
သို့မှသာ တောထဲမှမိလာသောဆင်မဲကို ဗျူတီပါလာတွင် မျက်နှာပေါင်းတင်ရေချိုး စကင်းကဲ (skin care) လုပ်ကာ ဆင်ဖြူတော်အဖြစ် အရှက်မရှိကြေညာနိုင်မည်ဖြစ်သည်။
၃။ ကိုယ်ပိုင် အမေရိကန်ဒေါ်လာရိုက်စက်တစ်ကို ကျွမ်းကျင်စွာရိုက်နှိပ်တတ်သည်အထိသင်ကြားပေးမည်။
အနောက်နိုင်ငံတွေက စီးပွားရေးအနိုင်ကျင့်လို့ ဒေါ်လာဈေးတက်လျှင် တစ်ဒေါ်လာတစ်ကျပ် နူံးနဲ့ အမြန်ဆုံးလဲလှယ်နိုင်ရန် ဒေါ်လာများကို ချက်ချင်းရိုက်နိုပ်ဖြန်ဝေနိုင်ရန်ဖို့ဖြစ်ပါသည်။
၄။ sex doll မယ်တော်ကြီးများ ဦးဆောင်သော ဓါတ်ခန်းကို ကိုယ်တိုင်ဦးဆောင်နိုင်သည်အထိ လေ့ကျင့်ပေးမည်။
သိုံမှသာ ဓါတ်ပေါင်းဖိုများတည်ဆောက်ရန်နှင့် ဓါတ်ရထားများပြေးဆွဲရန် စီစဉ်နိုင်မည်ဖြစ်သည်။
၅။ မားကက်တင်းနည်းပညာ အသစ်ချပ်ချွတ်များကို သင်ကြားပေးမည်။
သို့မှသာ တနှစ် နှစ်တန်းတက်သော စာတတ်သူပပျောက်ရေးစီမံချက်၊ ဘုရားဖူးများကို အခမဲ့ဝန်ဆောင်မူဖြင့် နိဗ္ဗာန်သို့ အမြန်ရောက်စေသော သာသနာရေးဖွံ့ဖြိုးရေးစီမံချက်များ စသည်တို့ကို အောင်မြင်စွာအကောင်ထည်ဖေါ်နိုင်မည် ဖြစ်သည်။
အထက်ပါအကြောင်းအရာများသည် အမြည်းခေါ် နမူနာမျှသာဖြစ်ပါသည်။ အသေးစိတ်သိလိုပါက မြဝတီသတင်းမှန်ပြန်ကြားရေးတွင် စုံစမ်းနိုင်ပါသည်။