လင်းမောင်
အာဏာသိမ်းပြီးနောက် မြန်မာနိုင်ငံကို ပထမဆုံးလာရောက်တဲ့ တရုတ်အဆင့်အမြင့်ဆုံး သံတမန် ချင်းဂန်း (နိုင်ငံခြားရေးဝန်ကြီး) ရောက်လာတော့ မြန်မာနိုင်ငံတစ်ဝန်း မကျေမနပ်ဆန္ဒပြမှုတွေ ဖြစ်တည်လာခဲ့တယ်။
စစ်အစိုးရနဲ့ တရုတ်ပူးပေါင်းပါဝင်ပတ်သက်နေမှုကို လုံးလုံးလက်မခံနိုင်ကြောင်းကို အခိုင်အမာ ပြဆိုတဲ့ ဆန္ဒပြမှုတွေပါ။ စစ်ကိုင်းက တရုတ်ပိုင် လက်ပန်းတောင်းတောင် ကြေးနီသတ္တုမိုင်းအနီး ချင်းဂန်းဓာတ်ပုံ ပိုစတာတွေကို မီးရှို့၊ တရုတ် အလံတွေ မီးရှို့ပြီး အပြင်းအထန် ဆန္ဒပြခဲ့ကြတယ်။
ဒါကြောင့် မင်းအောင်လှိုင်ဓာတ်ပုံ၊ ချင်းဂန်း ဓာတ်ပုံ၊ တရုတ်အလံတွေကို မီးရှို့မှုဟာ လက်ပန်းတောင်းတောင်မှာ သာမက မကွေး၊ ရန်ကုန်၊ မန္တလေး၊ စစ်ကိုင်းစတဲ့ ဒေသတွေက တော်လှန်ရေးအင်အားစုတွေကပါ မကျေမနပ် ဆန္ဒပြခဲ့ကြတာဖြစ်ပါတယ်။ ကိုင်စွဲထားကြတဲ့ ဆိုင်းဘုတ် တွေမှာ ဖက်ဆစ်စစ်တပ်ကို ထောက်ပံ့ကူညီမှုဆက်မလုပ်ပါနဲ့၊ မြန်မာပြည်သူတွေရဲ့ အသံကို လေးစားပေးပါ ဆိုတာမျိုးတွေလည်း ပါတယ်။
စစ်အစိုးရဆန့်ကျင်ရေးအဖွဲ့ဖြစ်တဲ့ အထွေထွေသပိတ်ညှိနှိုင်းရေးအဖွဲ့ General Strike Coordination Body (GSCB) က ဒီဆန့်ကျင်မှုတွေဟာ အာဏာသိမ်းစစ်အစိုးရအပေါ် တရုတ်က လူသိရှင်ကြားပူးပေါင်းဆောင်ရွက်နေသရွေ့ မြန်မာပြည်တွင်းမှာသာမက တစ်ကမ္ဘာလုံးမှာပါ ဆက်လက်ဆန္ဒပြသွားကြမှာ ဖြစ်ကြောင်း ထုတ်ပြန်ခဲ့ပါတယ်။
ချင်းဂန်းဟာ မြန်မာ နိုင်ငံကို လာရောက်စဉ် မင်းအောင်လှိုင်နဲ့သာမက အနားယူထားတဲ့ သူတို့ဆရာတပ်ချုပ်ဟောင်း သန်းရွှေနဲ့ပါ တွေ့ဆုံခဲ့တယ်။ မြန်မာနိုင်ငံကို လာရောက်လည်ပတ်စဉ် ချင်းဂန်းဟာ
စီးပွားရေး ပူးပေါင်းဆောင်ရွက်ဖို့၊ မြန်မာပြည်သူတွေအပေါ် ကူညီ ထောက်ပံ့ပေးဖို့၊ မြန်မာ့စီးပွားရေးပြန်လည်ဖွံ့ဖြိုးလာဖို့၊ မြန်မာ့နိုင်ငံရေးပြန်တည်ငြိမ်ဖို့၊ မြန်မာပြည်သူတွေ လူနေမှုဘ၀ မြင့်တက်စေဖို့၊ ဖြစ်သင့်တဲ့ ဖွံ့ဖြိုးတိုးတက်မှုတွေ ဖြစ်တည်စေဖို့လို့ ကြေညာချက်ထုတ်ပြန်ခဲ့ပါတယ်။ ဒါပေမဲ့ တရုတ်ဟာ ဒီစကားလုံးချိုချိုတွေနောက်ကွယ်မှာ အကြံအစည်တွေရှိနေတာကို မြန်မာပြည်သူတိုင်းက သိရှိနား လည်နေကြပါပြီ။ ချင်းဂန်းက နှစ်နိုင်ငံရဲ့ ရှည်ကြာလှတဲ့ ပေါက်ဖော် ဆက်ဆံရေးဆက်လက် တည်တံ့စေရေးရမယ်ဆိုတဲ့ စကားပြောခဲ့ပါသေးတယ်။
အခုနောက်ဆုံး ဆန္ဒပြမှုတွေဟာ ၂၀၂၁ ခုနှစ်က မြန်မာစစ်တပ်ဟာ အရပ်သားအစိုးရကို ဖြုတ်ချပြီး စစ်အာဏာသိမ်းမှုနောက်ကွယ်မှာ တရုတ်ဟာ စစ်ကောင်စီကို အားပေးထောက်ခံနေဆဲဖြစ်တာကို တစ်နိုင်ငံလုံးအတိုင်းအတာနဲ့ မကျေနပ်ကြောင်း ဆန္ဒထုတ်ဖော်မှုဖြစ်တယ်။ တရုတ်ဟာ မြန်မာနိုင်ငံကသူတို့ စီမံကိန်းတွေ ပြီးမြောက်အောင်မြင်ရေးအတွက် စစ်အာဏာသိမ်းအဖွဲ့ကို လက်ခံလိုက်တာမျိုးဖြစ်ပဲ။သူတို့ရဲ့ မဟာဗျူဟာ ရည်မှန်းချက် အထမြောက်ဖို့ စစ်ကောင်စီကို လက်ခံဆက်ဆံတာမျိုးပဲ။ အထူးသဖြင့် ယူနန်နဲ့ ဘင်္ဂလားပင်လယ်ကို မြန်မာနိုင်ငံကိုဖြတ်ပြီး ဖောက်မယ့် နိုင်ငံဖြတ်ကျော် လမ်းမကြီးစီမံကိန်းက တရုတ်ရဲ့ အဓိကမဟာဗျူဟာ ရည်မှန်းချက်ပဲ။ ဒီလို စစ်ကောင်စီနဲ့ ဆက်လက်ပူးပေါင်းဆွေးနွေးနေခြင်းဟာ မြန်မာနိုင်ငံ မှာ ဘယ်တုန်းကမှ စစ်အာဏာမသိမ်းခဲ့ဘူးလို့ တရုတ်ဘက်က သက်သေခံသလိုပုံစံလည်း ဖြစ်နေခဲ့တယ်။ တရုတ်ရဲ့ လိုက်လျောညီထွေဖြစ်စေလိုတဲ့သဘောနဲ့ စစ်ကောင်စီအပေါ် ချဉ်းကပ်မှုမှာ အန္တရာယ်တချို့ပါဝင်နေတယ်။ ချင်းဂန်းလာတုန်းက ဆန္ဒပြမှုတွေဟာ အကောင်းဆုံးအချိန်တွေမှာတောင် ဘယ်တော့မှ မြန်မာနိုင်ငံအပေါ် မကောင်းခဲ့တဲ့ တရုတ်ရဲ့ ဂုဏ်သတင်းကို ပြသလိုက်တာပဲ။ အခုတော့ တော်လှန်ရေးအင်အားစုတွေရော၊ ပြည်သူအားလုံးကြားမှာပါ တရုတ်ရဲ့ ဂုဏ်သတင်းဟာ အနိမ့်ကျဆုံးအဆင့်ကို ထပ်ရောက်သွားတာပဲ။ တကယ်လို့ NUG အစိုးရရဲ့ တော်လှန်ရေးအောင်မြင်သွားခဲ့ပြီးရင်တော့ တရုတ်နိုင်ငံဟာ ရက်စက်တဲ့ အာဏာသိမ်းစစ်ကောင်စီကို ထောက်ပံ့ခဲ့မှုတွေအတွက် အပြည့်အ၀တာဝန်ခံရမှာဖြစ်ပါတယ်။
#MeKongNews
#တရုတ်ဆန့်ကျင်ရေး
#ဆန္ဒပြမှု