ဖရဲနဲ့ တခြားသီးနှံတွေ တာလောမှာ ဈေးမရ၊ ငွေပေါ်ဖို့ အနိမ့်ဈေးနဲ့သာ ရောင်းနေရ
မဲခေါင်၊ ဒီဇင်ဘာ ၆
ရှမ်းအရှေ့၊ မိုင်လားနဲ့ ရှမ်းမြောက်က ဖရဲနဲ့ တခြားသီးနှံတွေ တရုတ်နိုင်ငံ တာလော့ သီးနှံစျေးကွက်မှာ စျေးမရလို့ ငွေပေါ်အနေနဲ့ ဈေးအနိမ့်နဲ့သာ ရောင်းချနေကြရတယ်လို့ ဖရဲစျေးကွက်က သိရပါတယ်။
အရင်ကဒီလို ဖရဲရာသီဖြစ်တဲ့ ဒီဇင်ဘာလဟာ ဖရဲတွေ စျေးကောင်းရနေပေမယ့် ခုချိန်မှာတော့ အမြတ်ထက် ငွေပေါ်ရောင်းချနိုင်ဖို့သာ သယ်ဆောင်ရောင်းချနေရတာလို့ ဖရဲပွဲရုံတွေက ပြောပါတယ်။
“ ဂိတ်တွေကပိတ်၊ ဟိုဘက် ဒီဘက်က မငြိမ်တော့ တရုတ်ဘက်ကလည်း အဝယ်မများ၊ ဒီဘက်ကလည်း အရှုံးများတော့ အရမ်းမတင်ရဲနဲ့ စျေးကွက်လှုပ်နေတယ်ဆိုတဲ့ အနေအထားပဲဖြစ်နေတာ” လို့ မူဆယ်အခြေစိုက် ဖရဲပွဲရုံတစ်ခုက မဲခေါင်ကိုပြောပါတယ်။
သစ်သီးပွဲရုံတာဝန်ရှိသူတစ်ဦးက “မနေ့ က(ဒီဇင်ဘာ၅) တာလော့ဖရဲဈေးကွက်မှာ ဖရဲ တစ်တန်ကို ယွမ်၂၅၀၀ ရှိတယ်၊ တာလော့အရောက် ကုန်ကျစရိတ်စုစုပေါင်းက တစ်တန်ကိုယွမ် ၂၅၀၀ကနေ၂၆၀၀အထိကျပါတယ်၊ နှစ်နိုင်ငံ ကုန်သွယ်ရေးကတော့ အဆိုးဆုံးအခြေအနေမှာ ဆိုက်နေတာပါ၊ ဖရဲပို့ကုန်ကတော့ အောက်မှာထားလဲရှုံး ပို့လာရင်လဲရှုံးဖြစ်နေတာ”လို့ ပြောပါတယ်။
၁၇တန်တင်ကားတစ်စီးစာ စိုက်ခင်းကုန်ကျငွေ ကျပ်သိန်း၁၀၀၊ ကားတင်အလုပ်သမားခ ကားတစ်စီးအတွက် ကျပ်၁၀သိန်း၊ ဘေးကာကကျပ် ၁၀သိန်း၊ ကားခက ပျမ်းမျှ ကျပ် သိန်း၇၀ ကုန်ကျစရိတ်ရှိတယ်လို့ သိရပါတယ်။
ဂျူတီဆောင်ခအနေနဲ့ (ပို့ကုန်ရငွေ ၂၅ ဒသမ ၇၅) ၁၀၀ရာခိုင်နှုန်းဆောင်ရပါက ကျပ်ကိုးသိန်းခန့်၊ မိုင်လားဒေသအခွန် ဒီဇင်ဘာ၄ရက် ငွေစျေး ၆၂၅ယွမ်နဲ့၁၄၄၀ယွမ်၊ FormEနဲ့ ပိုးမွှားစစ်ဆေးခ ၁၂၀၀၀၀ကျပ်၊ တရုတ်နိုင်ငံတာလော့ဘက်မှာ ဂျူတီ၊ ကွင်းကြေးစတာက ယွမ်၄၀၀၀၊ ဖရဲသီး အလေအလွင့်အပုပ်၊ အလျော့ ၁၅ရာခိုင်နှုန်းရှိနေလို့ လက်ရှိဖရဲစျေးကွက်ရဲ့ ပကတိအခြေအနမှန် ကုန်ကျစရိတ်အရ အရှုံးများလို့ ငွေပေါ်သာ ရောင်းနေကြရတာလို့ သိရပါတယ်။
“ ဒါတောင်မှ လမ်းကြာလို့ ပျက်စီးရင် အပုပ်အလျော့က ၃တန်ကနေ ၁၅ တန်အထိရှိတယ်”လို့ ဖရဲကုန်သည် တစ်ဦးက ပြောပါတယ်။
တောင်ကြီး- ကျိုင်းတုံ- မိုင်းလားလမ်းကလာတဲ့ ဖရဲကားတွေ မရှိသလောက်ဖြစ်နေပေမယ့် လတ်တလော ရှမ်းမြောက်က ဖရဲကားတွေကတော့ ကွတ်ခိုင်က MNDAA ရုံးမှာ ထောက်ခံချက်ယူပြီး သိန္နီ-ကွမ်းလုံ-နမ့်တစ်ကနေ ပန်ဆန်းလမ်းကြောင်းအတိုင်း လာနေတယ်လို့ သိရပါတယ်။
“ ဗမာဆိုစစ်တော့ ရှမ်းလို ပြောသွားရတယ်၊ ဒီလမ်းက တိုင်းရင်းသားမှအဆင်ပြေမယ်၊ အရင်ကထက် ပိုကုန် ပိုခက်ပေမယ့် မတတ်နိုင်ဘူးလေ၊ ဒီလိုပဲလုပ်စားရတာကိုး” လို့ မူဆယ်ဘက်က ဖရဲကုန်သည်တစ်ဦးက ပြောပါတယ်။
အရင်က ဖရဲနဲ့ သစ်သီးဝလံကားတွေ ရာသီချိန်ကာလမှာ ကားစီးရေ ထောင်ချီရှိနေပေမယ့် ဒီကနေ့ ဖရဲကွင်းမှာတော့ ကားစီးရေဆယ်ဂဏန်းတောင် မရှိဘူးလို့ သိရပါတယ်။
MK-012
#MekongNews
