မဲခေါင်၊ စက်တင်ဘာ ၉
ရှမ်းပြည်တောင်ပိုင်း၊ နောင်တရားကထွက်တဲ့ ခရမ်းချဉ်သီးတွေဟာ စက်တင်ဘာလ ဒုတိယပတ်မှာ တစ်ပိဿာ တစ်ရာကျပ်အောက်အထိ ဈေးကျဆင်းလာတာကြောင့် သွန်ပစ်နေရတယ်လို့ ဒေသတွင်း တောင်သူတွေက ပြောပါတယ်။
ပအိုဝ်းကိုယ်ပိုင် အုပ်ချုပ်ခွင့်ရဒေသ၊ ပင်လောင်းမြို့နယ်၊ နောင်တရားမြို့နယ်ခွဲက ထွက်တဲ့ ခရမ်းချဉ်သီးတွေဟာ စက်တင်ဘာလအတွင်း အထွက်နှုန်း များလာတဲ့အပြင် အင်းလေးဒေသဘက်က ထွက်ရှိတဲ့ အင်းသီးတွေနဲ့လည်း တိုက်ဆိုင်နေပြီး လက်ရှိ တိုက်ပွဲအခြေတွေအရ အဝေးကိုတင်ပို့လို့ မရတော့တာကြောင့် တစ်ပိဿာ တစ်ရာကျပ်အောက်အထိ ဈေးကျလာတာလို့ တောင်သူတွေက ပြောပါတယ်။
“အသီးက ရောင်းမရတော့ရင် ဒီတိုင်းထားလည်း မရဘူးကော ပုတ်ကုန်မှာလေ။ ဒါကြောင့် ကျမတို့ လိုင်းပေါ်မှာလည်း တင်ထားတယ်။ လာယူပေါ့ အလကား ပေးပါမယ်။ ယူမယ့်သူ မရှိတော့ အကုန်သွန်ပစ်လိုက်ရတယ်” လို့ တောင်သူတစ်ဦးက ပြောပါတယ်။
ဧပြီလအထိ တစ်ပိဿာ တစ်သောင်းကျပ်အထိ ဈေးရခဲ့တဲ့ ခရမ်းချဉ်သီးတွေဟာ မေလ လယ်ခန့်မှာ ၅ ထောင်ကျပ်၊ ဇူလိုင်လမှာ ၂၅၀၀ ကျပ်၊ ပြီးခဲ့တဲ့ ဩဂုတ်လမှာ တစ်ထောင်ကျပ်အထိ ကျဆင်းခဲ့ပြီး လက်ရှိမှာ မယုံနိုင်စရာကောင်းလောက်အောင် ၅၀၊ ၈၀ ကျပ်ဝန်းကျင်ခန့်သာ ပေါက်ဈေးရှိတော့တယ်လို့ ဆိုပါတယ်။
“အရင်တစ်ပတ်တောင် ၃၀၀ လောက်ရသေးတယ်။ ဒီတစ်ပတ်မှ တော်တော်ဆိုးသွားတာ။ ပွဲရုံအထိ ရောင်းရင်တော့ ၁၀၀ ရတယ်။ ဒါပေမယ့် ဘာလုပ်မလဲ ဆီဖိုးနဲ့ ထမင်းစရိတ်တောင် မကာမိဘူး” လို့ အခြားတောင်သူတစ်ဦးက ပြောပါတယ်။
နောင်တရားဒေသခံတွေဟာ ဒီနှစ်အတွင်း ပိုးသတ်ဆေး၊ မြေဩဇာ၊ မျိုးစေ့နဲ့ လုပ်သားခတွေ ဈေးတက်လာတာကြောင့် အရင်နှစ်ထက် ကုန်ကျစရိတ် ၃ ဆခန့်ပိုပြီး လက်ရှိမှာ အကြွေးတင်နေကြတယ်လို့ သိရပါတယ်။
အရင်က ရှမ်းတောင်ဒေသထွက် ခရမ်းချဉ်သီးတွေကို ရှမ်းပြည်မြောက်ပိုင်း အပါအဝင် ရန်ကုန်၊ မန္တလေး၊ စစ်ကိုင်းတိုင်းနဲ့ တရုတ်နိုင်ငံအထိ တင်ပို့ကြပေမယ့် အခုချိန်မှာတော့ တိုက်ပွဲတွေကြောင့် ဒေသတွင်းမှာပဲ ရောင်းချနေရပြီး ဈေးနှုန်းလည်း ဆိုးဆိုးရွားရွားကျဆင်းလာတယ်လို့ ဆိုပါတယ်။
ခရမ်းချဉ်သီးကို ရှမ်းပြည်တောင်ပိုင်း ပင်လောင်း၊ ဆီဆိုင်၊ ပင်းတယ၊ ရွာငံ၊ ကလော စတဲ့မြို့နယ်တွေမှာ ကုန်းပေါ်နည်းနဲ့ စိုက်ပျိုးကြပြီး ညောင်ရွှေမြို့နယ်၊ အင်းလေးဒေသမှာလည်း ကျွန်းမျှောစိုက်ခင်းအဖြစ် စိုက်ပျိုးကြပါတယ်။
MK-014
