မဲခေါင်၊ နိုဝင်ဘာ ၁၃

ရှမ်းပြည်နယ် မြောက်ပိုင်း၊ ကိုးကန့် ကိုယ်ပိုင်အုပ်ချုပ်ခွင့်ရဒေသ၊ လောက်ကိုင်မှာ ဆန်နဲ့ ခေါက်ဆွဲ ပြတ်လပ်နေပြီး လုံးဝ နီးပါး ဝယ်လို့ မရတော့ဘူးလို့ လောက်ကိုင်မြို့ခံ တစ်ဦးက မဲခေါင်သတင်းဌာနကို ဒီကနေ့ နိုဝင်ဘာ ၁၃ ရက်မှာ ပြောပါတယ်။

ဒီကနေ့မှာ စစ်ကောင်စီနဲ့ ညီနောင်မဟာမိတ်တပ် တိုက်ပွဲ ငြိမ်နေတာကြောင့် လောက်ကိုင်မြို့တွင်းက ကုန်စုံဆိုင်တွေ ပြန်ဖွင့်ပြီး ဆန်တစ်အိတ်ကို ယွမ် ၁,၈၀၀ အထိ စျေးပေါက်နေပေမဲ့ ဝယ်လို့ မရတော့ဘူးလို့ ဆိုပါတယ်။

“ဒီနေ့ ဆိုင်တွေကတော့ ပြန်ဖွင့်တယ်။ တိုက်ပွဲကလည်း ငြိမ်တယ်။ ဘာသံမှလည်း မကြားရတော့။ ဆန်ကတော့ စျေးတက်တယ်။ စျေးပဲရှိတာ ဆန်မရှိဘူး။ ဝယ်မရဘူး” လို့ မြို့ခံ တစ်ဦးက ရှင်းပြပါတယ်။

ဆန်အပြင် ခေါက်ဆွဲလည်း ဝယ်ယူလို့ မရတော့တာကြောင့် ခေါက်ဆွဲဆိုင်တွေနဲ့ ထမင်းဆိုင်တွေ အကုန် ပိတ်ထားပြီး ကုန်စုံဆိုင် တစ်ချို့က ဆေးဝါးနဲ့ တခြားပစ္စည်းတွေ ရောင်းချပေးနေတယ်လို့ ဆိုပါတယ်။

လက်ရှိ မြို့တွင်းမှာ ပြန်လည် သွားလာနေကြသလို လောက်ကိုင်မြို့ကနေ ကား၊ ဆိုင်ကယ်တွေနဲ့ အလုံးအရင်း ထွက်ခွာနေတာတွေလည်း ရှိတယ်လို့ မြို့ခံတစ်ဦးက ပြောပါတယ်။

ပြီးခဲ့တဲ့ ရက်တွေက MNDAA စစ်ကြောင်းတွေဟာ လောက်ကိုင်မြို့ကို ဦးတည်နေပြီး မြို့ကို သိမ်းပိုက်မှာ ဖြစ်တယ်လို့ တရားဝင် ပြောဆိုခဲ့ပြီးနောက် လောက်ကိုင်မြို့ခံတွေ အလုံးအရင်းနဲ့ မြို့ကို စွန့်ခွာနေတာ ဖြစ်ပါတယ်။

ဒီလို စစ်ဘေးရှောင်တဲ့ ပြည်သူတွေဟာ လောက်ကိုင်မြို့အထွက် တစ်ဆယ်တန်ဂိတ်နဲ့ ပါစင်ကျော် ကျေးရွာ ကြားမှာ အလုံးအရင်း ပိတ်မိနေတာကြောင့် နိုဝင်ဘာ ၇ ရက်ကစပြီး MNDAA က ကူညီကယ်ဆယ်ရေးတွေ လုပ်နေပေမဲ့ လူဦးရေ များပြားတာကြောင့် အခက်အခဲတွေ ရှိနေဆဲလို့ ဆိုပါတယ်။

နိုဝင်ဘာ ၁၁ ရက်၊ မွန်းလွဲပိုင်းကတော့ တစ်ဆယ်တန်ဂိတ်မှာ ပိတ်မိနေတဲ့ စစ်ရှောင် လူအုပ်ကြီးကို လောက်ကိုင် စစ်ကောင်စီ ဒကစ ကနေ ပစ်တဲ့ လက်နက်ကြီးကျည် ကျ‌ရောက် ပေါက်ကွဲခဲ့တာကြောင့် ပြည်သူ ၆ ဦးထက်မနည်း သေဆုံးပြီး ဒဏ်ရာ အပြင်းအထန် ရသူတွေ ရှိတယ်လို့ သိရပါတယ်။

MK-007

#MeKongNews

#လောက်ကိုင်မြို့

#ဆန်_ပြတ်လပ်

#တစ်ဆယ်တန်ဂိတ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)