လိမ်သွားတဲ့ သတင်းက ဟုတ်တယ်။ အိပ်စပို့ အင်ပို့ လုပ်နေတာပေါ့။ ကုမ္ပဏီ နာမည်က ရွှေစက်ဝန်း၊ သာဓုကံ စက်မှုဇုန်မှာ သူက ဆန်စက် ဌားထားတာရှိတယ်။ ဘုရင်နောင် ကုန်စည်ဒိုင်မှာလည်း ကုန်ကြမ်းတွေ လာဝယ်တယ်။ ဘုရင့်နောင် ကုန်စည်ဒိုင်မှာ ရောင်းတဲ့သူတွေကို ဆန်ဖိုးတွေ မပေးနိုင်လို့ ဒီကလူတွေက မရောင်းတော့ဘူး။ အခုက ကုမ္ပဏီ မလည်ပတ်နိုင်တော့လို့ ဒေဝါလီ ခံသွားတာ၊ ပိုင်ရှင်ပြေးတာပေါ့။ မန္တလေးက လူတွေ ရှယ်ယာရှင်တွေ ဆုံးရှုံးကြတာ များတယ်။ သတင်းတွေ စုစည်းချက်အရတော့ သိန်းပေါင်း တစ်သိန်းကျော် နီးပါးလောက် ပါသွားလောက်တယ်
လို့ ဘုရင့်နောင် ကုန်စည်ဒိုင်မှ ဆန်ကုန်သည် တစ်ဦးက ပြောပါတယ်။
ရွှေစက်ဝန်း ကုမ္ပဏီကို ၂၀၁၃ ခုနှစ်မှာ စတင်တည်ထောင်ခဲ့ပြီး ကာလအတန်ကြာကပင် ငွေကြေး အရှုပ်အရှင်း ဖြစ်နေလို့ ဘုရင့်နောင် ဆန်ကုန်စည်ဒိုင်ကနေ ကုန်ကြမ်း ရောင်းချပေးမှု ရပ်ဆိုင်းခဲ့တာ တစ်နှစ် နီးပါး ရှိပြီဖြစ်ပြီး အခု ဖြစ်စဉ်ကြောင့် မန္တလေးနဲ့ မူဆယ်က လုပ်ငန်းရှင် အများအပြားနဲ့ ရှယ်ယာရှင်တွေ ဆုံးရှုံးခဲ့ရတယ်လို့ သူကပြောပါတယ်။
အခုလို လိမ်လည်ခံရပြီဆို ဘယ်သူမှ အကူညီ မပေးနိုင်ဘူး။ ဆန်စပါး ကုန်သည်များ အသင်းတို့ ဆန်စပါး အသင်းချုပ်တို့ ဆိုတာက NGO တွေ၊ သူတို့က အာဏာလည်း မရှိဘူး။ ဘာမှ လုပ်ပိုင်ခွင့်လည်း မရှိပါဘူး။ လိမ်သွားတဲ့ သူကို အသင်းထဲက ထုတ်ပယ် လိုက်တာ ဘလက်လက်စ် သွင်းတာလောက်ပဲ လုပ်လို့ရတာ။ ဒါထက်ပိုပြီး ဘာမှ လုပ်မပေးနိုင်ဘူး။ လိမ်လည်မှုနဲ့ တရားစွဲလည်း တရားမမှုတို့ ဆိုတာကလည်း ပေးတဲ့ကမ်းတဲ့ သူက နိုင်သွားတာပါပဲ။ အခုက စွန့်စားပြီး လုပ်နေကတာ။ အခုပြည်တွင်းထဲမှာက ဆန်အရောင်းအဝယ်ကို အကြွေးစနစ်နဲ့ လုပ်နေရတာ။ ဘယ်ကုမ္ပဏီမှ လက်ငင်းချေပြီး မဝယ်နိုင်ဘူး။ ငွေလက်ငင်းကတော့ ဈေးမရဘူး ငွေရတယ်။ ငွေကို ရက်ဆိုင်းပေးရပြီဆို ဈေးရတယ် ငွေမရဘူး။ အဲလိုဖြစ်နေတာ
လို့ ပြည်ပသို့ ဆန်တင်ပို့နေတဲ့ ကုန်သည် တစ်ဦးက မှတ်ချက်ပြု ပြောပါတယ်။
၂၀၁၇ ခုနှစ်ကလည်း ဘုရင့်နောင် ကုန်စည်ဒိုင်မှာ ကျပ်သိန်းပေါင်း ၆ သောင်း ၈ ထောင် နီးပါး လိမ်လည်မှု ဖြစ်ပွားခဲ့ရာ တရားစွဲဆိုခဲ့ပေမယ့် လိမ်လည်သူ ထွက်ပြေး တိမ်းရှောင်သွားတဲ့ အတွက် သူ့ရဲ့ ပိုင်ဆိုင်မှုတွေကို တရားရုံးက သိမ်းဆည်းခဲ့ပြီး လိမ်လည်ခံရသူများ အမှုတန်းလန်းနဲ့ ငွေဆုံးရှုံးခဲ့ရပါတယ်။