မဲခေါင်၊ သြဂုတ် ၂၉
စစ်ကောင်စီက အခြေခံစားသောက်ကုန်ဖြစ်တဲ့ ဆန်နဲ့ စားအုန်းဆီဈေးတွေကို ပေါက်ဈေးထက် လျော့ချရောင်းချဖို့နဲ့ လက်လီရောင်းချသူတွေကို အမြတ် ၁၀ ရာခိုင်နှုန်းထက် မပိုတဲ့ဈေးနဲ့ရောင်းချခိုင်းပြီး လိုက်နာမှုမရှိပါက အရေးယူမယ်လို့ သိရပါတယ်။
မြန်မာနိုင်ငံ ဆန်စပါးလုပ်ငန်းရှင်အသင်းတာဝန်ရှိသူတွေနဲ့ ဆန်ဒိုင်တာဝန်ရှိသူတွေက ဆန်ကုန်သည်တွေ ထုတ်ပြန်ချက်ကို လိုက်နာရမယ်လို့တင်းကြပ်နေပြီး၊ ဆီလုပ်ငန်းရှင်များကလည်း သတ်မှတ်ဈေးနှုန်းတွေကို တင်းကြပ်စွာထုတ်ပြန်ထားတယ်လို့ ကုန်သည်များထံကသိရပါတယ်။
“သတ်မှတ်ဈေးထက် ပိုရောင်းရင်အရေးယူမယ်ဆိုတော့ ဆန်ဈေးက သူတို့ရဲ့ မူဝါဒ၊ အခြားငွေဈေး အပြောင်းအလဲတွေကြောင့် အတက်ဈေးတွေနဲ့ ဖြစ်နေတာ၊ အခု လျော့ချရောင်းရမယ်ဆိုတော့၊ ဆန်ဈေးကွက်တောင် မဖွင့်ရဲဘူး၊ ရွှေတို့ ဒေါ်လာတို့လိုဖြစ်နေပြီ၊ ဖြစ်နေတာကို ဆန်းစစ်မှုမရှိဘဲ၊ လုပ်ရင်မှောင်ခိုဈေးကွက်ဖြစ်လာမယ်။ ကုန်သည်က ကိုက်အောင်ရောင်းတဲ့အခါမှာ စားသုံးသူက ကျန်းမာရေးနဲ့မညီညွတ်တာတွေ စားသုံးရမယ်၊ အရောတွေ ဖြစ်လာမယ်၊ အရည်သွေးပိုင်းတွေ ညံ့လာမယ်” လို့ ဆန်လက်လီ၊ လက်ကားရောင်းချသူ ကုန်သည်တစ်ဦးက ပြောပါတယ်။
အခုလိုမြေပြင်အခြေနေနဲ့ ကွဲလွဲချက်ဖြစ်နေတယ်တဲ့ သတ်မှတ်ချက်တွေကို ဩဂုတ်လ ၂၃ ရက်နေ့ကစစ်ကောင်စီ စီပွားရေးနဲ့ ကူးသန်းရောင်းဝယ်ရေးဝန်ကြီး ဦးအောင်နိုင်ဦး ဦးဆောင်တဲ့ ပြည်ထောင်စု ကုန်ဈေးနှုန်း တည်ငြိမ်ရေးကော်မတီ အစည်းအဝေး အပြီးမှာ ထွက်ပေါ်လာတယ်လို့ သိရပါတယ်။
စစ်ကောင်စီရဲ့ သတ်မှတ် လက်ကားဈေးမှာ ရွှေဘိုပေါ်ဆန်း ၁ အိတ် ၁၂၅၀၀၀ ကျပ်၊ ဧရာဝတီ ပေါ်ဆန်း ၁ အိတ် ၁၁၀၀၀၀ ကျပ်၊ ပေါ်ကျွဲ ၁ အိတ် ၉၅၀၀၀ ကျပ်၊ ဆန်ကြမ်း ၁ အိတ် ၇၂၀၀၀၀ ကျပ် ဖြစ်ပါတယ်။
ဆန်လက်လီ ရောင်းချရာမှာ ရွှေဘိုပေါ်ဆန်း ၁ အိတ် အမြင့်ဆုံး ၁၄၀၀၀၀ ကျပ်၊ ဧရာဝတီ ပေါ်ဆန်း ၁ အိတ် ၁၂၀၀၀၀ ကျပ်နဲ့ ဆန်ကြမ်း ၁ အိတ် ၈၀၀၀၀ ကျပ်ထက် ဈေးတင်မရောင်းရဘူးလို့ အစည်းအဝေးမှာ သတ်မှတ်ကြောင်း တက်ရောက်ခဲ့သူ ကုန်သည်တစ်ဦးက ပြောပါတယ်။
ဆန်ကုန်စည်ဒိုင်တွေမှာ လက်ကား ရောင်းချနေတဲ့ ကုန်သည်၊ ပွဲစားတွေက သတ်မှတ်ဈေးနဲ့ ရောင်းချနေပေမယ့် တွက်ခြေကိုက်ရန် အရည်အသွေးနိမ့်တဲ့ ဆန်များကိုသာ ရောင်းချကာ ဆန်အကောင်းနဲ့ အကျိုးအကြေ ပါတဲ့ ဆန်ကြမ်းတွေနဲ့ ရောနှော ရောင်းချတာတွေ ရှိတယ်လို့ ကုန်သည်တွေထံက သိရပါတယ်။
စားအုံးဆီးဈေးမှာလည်း ရန်ကုန်အထိုင် စားအုန်းဆီအခြေခံရည်ညွန်းလက်ကားဈေးအဖြစ် တစ်ပိဿာ ၄၁၅၅ ကျပ်လို့ သတ်မှတ်ထားပြီးလက်ရှိ လက်လီဈေးကွက်မှာတော့ တစ်ပိဿာ ကျပ် ၁၀,၀၀၀ အထက်မှာ ရှိနေတယ်လို့ ဈေးကွက်အတွင်းသတင်းတွေအရသိရပါတယ်။
ပြည်ပကနေ စားအုန်းဆီတင်သွင်းမှုအတွက် သုံးစွဲရတဲ့ နိုင်ငံခြားငွေ ၅၀ ရာခိုင်နှုန်းကို အစိုးရထောက်ပံ့ဈေးနဲ့ သွင်းကုန်သမားတွေကို ရောင်းပေးနေပေမယ့် လက်လီဈေးကွက်မှ စားအုန်းဆီတပိဿာ ၁ သောင်းကျပ် ဖြစ်နေခြင်းက နိုင်ငံတော်ရဲ့ စေတနာနဲ့ ပံ့ပိုးပေးထားတဲ့ ဆောင်ရွက်မှုတွေက အရာမထင်တဲ့ ပုံစံမျိုးပေါက်နေတယ်လို့ ရင်းနှီး/စီးပွား (MIFER) ဒုတိယဝန်ကြီး ဒေါက်တာဝါဝါမောင်က ပြောကြားထားပါတယ်။
အခြေခံ စားသောက်ကုန်များ အပါအဝင် ဆန်၊ ဆီဈေးနှုန်းများ အဆမတန် မြင့်တက်နေမှုကို ထိန်းချုပ်ရန် ဟုဆိုကာ စစ်ကောင်စီက ပြည်ထောင်စု ကုန်ဈေးနှုန်း တည်ငြိမ်ရေး ကော်မတီကို ဖွဲ့စည်း လုပ်ဆောင်သွားမယ်လို့ ဩဂုတ်လ ၁ ရက်တွင် ကြေညာခဲ့ပါတယ်။
MK-006
#MeKongNews
#ဆန်ဈေး
#ဆီဈေး
#စစ်ကောင်စီ
#ဈေးတင်