ပြင်ပ လက်လီဈေးကွက်မှာ စားသုံးဆီဈေး ကျဆင်းနေစဉ် စားသုံးဆီကော်မတီက နိုဝင်ဘာ ၁၄ ရက်မှ ၂၀ ရက်အထိ ရန်ကုန်အထိုင် ရည်ညွှန်းဈေးကို တစ်ပိဿာ ၄၃၅၀ ကျပ် သတ်မှတ်လိုက်တာဖြစ်ပြီး ယခင် ရည်ညွှန်းဈေး ၄,၃၃၀ ကျပ်ထက် ထပ်မံ မြင့်တက် သတ်မှတ်တာကြောင့် ဆီကုန်သည်တွေကြား ဝေဖန်မှုတွေ ရှိနေပါတယ်။
ဆီက နိုဝင်ဘာလ အစမှာ ဈေးတွေတက်ပြီး ပြန်ကျတာ ၂ ပတ်လောက်ပဲ ရှိသေးတယ်။ ကမ္ဘာဈေး ကျလို့ ကျသွားတာ။ လောလောဆယ်တော့ ဈေးကွက်ထဲ ၆,၀၀၀ ဝန်းကျင်ပဲ ရှိတော့တယ်။ ရည်ညွှန်းဈေးတိုးပြီး သတ်မှတ်လိုက်တာပေါ့။ ဆီကရှိပြီး ဝယ်သူက မရှိတာ ရောင်းအားကျတာ။ အရင်တုန်းကတော့ ဝယ်ဖို့ခက်တဲ့ အနေအထား။ ဆီဈေးက အရမ်း ထပ်မတက်နိုင် လောက်တော့ဘူး
လို့ ဆီလုပ်ငန်းရှင် တစ်ဦးက ပြောပါတယ်။
လက်ရှိ သတ်မှတ်တဲ့ ရည်ညွှန်းဈေးဟာ ဗဟိုဘဏ်က ဒေါ်လာ အခြေနေပေါ် မူတည် တွက်ချက် ထိန်းချုပ် သတ်မှတ်တာဖြစ်ပြီး ပြင်ပပေါက်ဈေး ကျဆင်းချိန် ရည်ညွှန်းဈေး တိုးမြှင့် သတ်မှတ်မှုကြောင့် ဆီကုန်သည်များကြား ဝေဖန်မှုတွေ ရှိနေတယ်လို့ သူကပြောပါတယ်။
လက်ရှိ ပြင်ပဈေးကွက်မှာ စားသုံးဆီ တစ်ပိဿာ ၆,၀၇၀ မှ ၆,၃၀၀ ကျပ် ဝန်းကျင် ဖြစ်နေပြီး ယခင် တစ်ပတ် ဈေးနှုန်းထက် အနည်းငယ် ထပ်မံကျဆင်းတာဖြစ်ကာ သယ်ယူပို့ဆောင်ရေး စရိတ်၊ အလုပ်သမားခ ကုန်ကျမှုတွေကြောင့် ဒေသအလိုက် ဈေးနှုန်းကွာခြားမှု ရှိနိုင်ပါတယ်။