မဲခေါင်၊ အောက်တိုဘာ ၂၇

ကရင်ပြည်နယ်၊ ကော့ကရိတ်မြို့တွင်း ရုံးတွေမှာ တပ်စွဲထားတဲ့ စစ်ကောင်စီတပ်ကို KNLA ပူးပေါင်းတပ်တွေ ၀င်ရောက် တိုက်ခိုက်ရာက တိုက်ပွဲ ပြင်းထန်နေပြီး စစ်တပ်ဘက်က ပစ်တဲ့ လက်နက်ကြီး ကျည်ကြောင့် ဒေသခံ တချို့ ထိခိုက်ဒဏ်ရာ ရထားတယ်လို့ ဒေသခံတွေက ဒီကနေ့ ပြောပါတယ်။

ဒီနေ့ အောက်တိုဘာ ၂၇ ရက်၊ မနက် ၅ နာရီဝန်းကျင်မှာ စစ်ကောင်စီတပ်စွဲထားတဲ့ တံတားဦး၊ တောင်ကြာအင်းနဲ့ ရုံးနေရာတွေမှာ ပစ်ခတ်သံတွေ ထွက်ပေါ်ခဲ့ပြီး စစ်ကောင်စီဘက်က လက်နက်ကြီးတွေနဲ့ အဆက်မပြတ် ပြန်လည် ပစ်ခတ်နေတာပါ။

“အခြေအနေက မကောင်းဘူးရော။ လက်ရှိအချိန်ထိ လက်နက်ကြီးလည်းထု၊ မြို့ခံတချို့ ဒဏ်ရာ ရနေကြတာ ရှိတယ်။ အိမ်တွေလည်း ထိခိုက်မှု ရှိနေတယ်” လို့ ကော့ကရိတ် ဒေသခံ တစ်ဦးက ဆိုပါတယ်။

ဒီနေ့ မနက်ပိုင်း တိုက်ပွဲ အတွင်း ခလရ (၉၇) အနောက်ဘက်မှာရှိတဲ့ စစ်ကေင်စီ လက်အောက်ခံ ရဲရုံးနဲ့ စစ်ဘက်ဆိုင်ရာ လုံခြုံရေးရုံးတို့ မီးရှို့ တိုက်ခိုက်ခံရတယ်လို့ ဒေသတွင်း သတင်းရင်းမြစ်တွေထံက သိရပေမယ့် မဲခေါင်သတင်းဌာန အနေနဲ့ သီးခြား အတည်မပြုနိုင်သေးပါဘူး။

စစ်တပ်ရဲ့ လက်နက်ကြီး ပစ်ခတ်မှုတွေကြောင့် မြို့တွင်းမှာ လူနဲ့ အဆောက်အအုံ ထိခိုက်မှုတွေ ရှိနေတယ်လို့ ဒေသခံတွေက ပြောပေမယ့် တိုက်ပွဲ အခြေအနေတွေကြောင့် စာရင်း အတိအကျ မရရှိသေးပါဘူး။

လက်ရှိ ကော့ကရိတ်မြို့တွင်းနဲ့ မြို့ပြင် ပတ်လည်မှာ လက်နက်ကြီး၊ လက်နက်ငယ် ပစ်ခတ်သံတွေ ထွက်ပေါ်နေပြီး ကော့ကရိတ်မြို့တွင်းက ထွက်ချင်တဲ့ မြို့ခံတချို့လည်း ပိတ်မိနေတယ်လို့ ဒေသခံတွေက ပြောပါတယ်။

ဒီနေ့မနက်ပိုင်း စစ်တပ် ပစ်ခတ်တဲ့ လက်နက်ကြီး ၃ လုံး အံဖကြီးကျေးရွာ အတွင်း ကျရောက် ပေါက်ကွဲခဲ့ပြီး နေအိမ် ၅ လုံးထိမှန်ကာ ၃ လုံး ပျက်စီးမှုများပြီး ၂ လုံးကတော့ အနည်းငယ် ထိခိုက် ပျက်စီးခဲ့တယ်လို့ ကရင်လူ့အခွင့်အရေးအဖွဲ့က ထုတ်ပြန်ထားပါတယ်။

အောက်တိုဘာ ၂၄ ရက်နေ့ကလည်း စစ်ကြောင်းထိုးလာတဲ့ စစ်တပ်နဲ့ တော်လှန်ရေးပူးပေါင်းတပ်တွေ တိုက်ပွဲ ဖြစ်ပွားရာ စစ်ကောင်စီဘက်က တပ်ရင်းမှူး အပါအဝင် စစ်သား ၆ ဦး သေဆုံးခဲ့ပါသေးတယ်။

MK–009

#MekongNews

#ကော့ကရိတ်မြို့

#KNLA

#လက်နက်ကြီး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)