အဓမ္မ စုဆောင်းခံရသူ စစ်ကောင်စီတပ်ဖွဲ့ဝင်တစ်ဦး မိုးဗြဲပြည်သူ့ကာကွယ်ရေးတပ်ထံ လက်နက်ဖြင့် အလင်းဝင်
မဲခေါင်၊ မတ် ၂၄
တိုက်ပွဲပြင်းထန်နေသည့် ကရင်နီနယ်စပ် မိုးဗြဲမြို့ ရှိ ခမရ ၄၂၂ တွင် လာရောက် အင်အားဖြည့်တွဲဘက်ထားသည့် ဗထူးအခြေစိုက် ခမရ – ၅၀၈မှ စစ်ကောင်စီ တပ်ဖွဲ့ဝင်တစ်ဦး လက်နက်နှင့်အတူ မတ်လ ၂၃ရက်နေ့တွင် အလင်းဝင်ရောက်လာကြောင်းအမှတ်(၁၀၀၁) မိုးဗြဲပြည်သူ့ကာကွယ်ရေးတပ်၊ လင်းယုန်တပ်ခွဲမှ သတင်းထုတ်ပြန်သည်။
ယင်းတပ်သားသည် စစ်မှုထမ်းဥပဒေအရ အတင်းစုဆောင်းခံရသူဖြစ်ပြီး စစ်ကောင်စီ၏ မတရားစေခိုင်းမှုကို မခံစားနိုင်သောကြောင့် ထွက်ပြေးလာခြင်းဖြစ်သည်ဟု ဆိုသည်။
မိုးဗြဲ တိုက်ပွဲတွင် စစ်ကောင်စီဘက်မှ အကျအဆုံးများပြားလျက်ရှိကြောင်းကိုလည်း ထိုတပ်သား၏ ပြောကြားချက်အရထပ်မံသိရသည်ဟု ဆိုသည်။
အလင်းဝင်တပ်သားကို တပ်ရင်းမှ ဆုငွေပေးအပ်ပြီးနောက် ဘေးကင်းလုံခြုံသည့် ထိန်သိမ်းရေးဌာနသို့ လွှဲပြောင်းရန်စီစဥ်လျက်ရှိသည်ဟု သိရသည်။
“တိုက်ပွဲပြင်းထန်နေတဲ့ မိုးဗြဲမှာ စစ်ရေးလိုအပ်ချက်များစွာရှိနေတဲ့အတွက် တော်လှန်ပြည်သူများအနေဖြင့်လည်း ကျွန်တော်တို့ မိုးဗြဲပြည်သူ့ကာကွယ်ရေးတပ်ကို တတ်နိုင်သလောက် ထောက်ပို့ကူညီပေးကြပါရန် အကူအညီတောင်းခံအပ်ပါတယ်”ဟု မိုးဗြဲ ၁၀၀၁ PDFတပ်ရင်းပြန်ကြားရေးမှ ပြောသည်။
ရှမ်းတောင်စစ်ဒေသခွဲ၊ အမှတ်(၁)ဗျူဟာမှလည်း ပြည်သူ့ဘက်တော်သား အဖြစ် ခံယူချင်သည့် ရဲဘော်များရှိခဲ့ပါက မြေပြင်မှာရှိသည့် တပ်ရင်းတပ်ဖွဲ့များထံဆက်သွယ်ပြီး ပူးပေါင်းပါဝင်ပေးကြရန် ဆက်လက်ဖိတ်ခေါ်နေပြီး ပူးပေါင်းလာသည့် တပ်သားကိုလည်း ရှမ်းတောင်စစ်ဒေသခွဲ ၊ အမှတ်(၁)ဗျူဟာ မှ လုံခြုံစွာဖြင့် ထိန်းသိမ်းစောင့်ရှောက်ထားကြောင်း ထုတ်ပြန်သည်။
မိုးဗြဲတွင် တော်လှန်အင်အားစုများ၏ တိုက်ခိုက်မှုများကြောင့် စစ်ကောင်စီတပ်သား ၁၅ ဦးသေဆုံးပြီး၊ လက်နက် ၉ လက် နှင့်ဆက်စပ်ပစ္စည်းများကိုသိမ်းဆည်းရမိခဲ့ကြောင်း ရှမ်းတာင်စစ်ဒေသခွဲ အမှတ် ၁ ဗျူဟာက မတ်လ၁၅ရက်က ထုတ်ပြန်ထားသည်။
မဟာ
Photo – Mobye PDF
