ဇန်နဝါရီ တစ်လမပြည့်ခင်မှာပင် စစ်ကောင်စီလက်ချက်ကြောင့် တအာင်းဒေသတွင်းမှာ အရပ်သားနဲ့ CDM ဝန်ထမ်း ငါးဦးသေဆုံးကာ ၃၀ ကျော်ဒဏ်ရာရ
မဲခေါင်၊ ဇန်နဝါရီ ၂၇
လွန်ခဲ့တဲ့ ၂ ရက်က ကျောက်မဲဆေးရုံကို ဗုံးကြဲတဲ့ ဖြစ်စဉ်အပါအဝင် ဇန်နဝါရီ တစ်လမပြည့်ခင်မှာပင် တအာင်းဒေသကို စစ်ကောင်စီ ဗုံးကြဲခဲ့တာကြောင့် CDM ဝန်ထမ်းအပါအဝင် အရပ်သား ငါးဦးသေဆုံးကာ ၃၀ ကျော်ဒဏ်ရာရှိခဲ့ပါတယ်။
လွန်ခဲ့တဲ့ ၂ ရက်၊ ဇန်နဝါရီ ၂၅ ရက်က ကျောက်မဲမြို့ ပြည်သူ့ဆေးရုံကို စစ်ကောင်စီက ဗုံးလေးလုံးကြဲတဲ့ဖြစ်စဉ်မှာ ဆေးကုသရေး CDM အမျိုးသမီးဝန်ထမ်း နှစ်ဦးနဲ့ ဆေးကုသမှုခံယူနေတဲ့ လူနာတစ်ဦးသေဆုံးခဲ့ပြီး ကျန်းမာရေးဝန်ထမ်းနဲ့ CDM ဝန်ထမ်းအပါအဝင် ဆေးကုသမှုခံယူနေတဲ့ လူနာ ၂၀ ကျော်ထိခိုက်ဒဏ်ရာရကာ ဆေးရုံအဆောက်အအုံလည်းပျက်စီးသွားတယ်လို့ TNLA က မနေ့က ထုတ်ပြန်ပါတယ်။
နိုင်ငံတကာအနေနဲ့ စစ်ကောင်စီကို အရေးယူနိုင်ရေး ကူညီပေးကြဖို့နဲ့ အဲ့ဒီလုပ်ရပ်ဟာနိုင်ငံတကာနည်းဥပဒေအရ လူ့အခွင့်အရေးကိုချိုးဖောက်နေတာဖြစ်ပြီး စစ်ပွဲတွေဖြစ်နေရင်တောင်မှ ဆေးရုံ၊ စာသင်ခန်း၊ ဘာသာရေးအဆောက်အအုံနဲ့ အရပ်သားတွေအပေါ် ပစ်ခတ်တိုက်ခိုက်လို့မရဘူးလို့ NUG ရဲ့ ဝန်ကြီးချုပ်ရုံးပြောခွင့်ရပုဂ္ဂိုလ်ဦးနေဘုန်းလတ်က မဲခေါင်ကိုပြောပါတယ်။
“စစ်အုပ်စုကပြည်သူကို ပိုပိုပြီးရန်ပြုနေတယ်ဆိုတာ ပေါ်လွင်စေပါတယ်၊ အပြင်းအထန်ရှုံ့ချပါတယ်၊ ဒီကိစ္စမှာတာဝန်ရှိတဲ့သူတွေကို ဥပဒေရှေ့မှောက်ကို တရားစီရင်နိုင်ဖို့ကိုလည်း အစွမ်းကုန်ကြိုးစားသွားမှာဖြစ်တယ်” ဝန်ကြီးချုပ်ရုံးပြောခွင့်ရပုဂ္ဂိုလ်ဦးနေဘုန်းလတ်က မဲခေါင်ကိုပြောပါတယ်။
ပြည်သူကို စစ်ရေးပစ်မှတ်ထားကာ တိုက်ခိုက်နေတဲ့ စစ်ကောင်စီကို အမြန် အဆုံးသတ်နိုင်ရေးနဲ့ပြည်သူထိခိုက်မှုကို ပိုမိုအလေးပေးကူညီသင့်ကြောင်း လွတ်လပ်စွာထုတ်ဖော်ပြောဆိုခွင့်အရေးလှုပ်ရှားနေတဲ့ အသံအဖွဲ့ရဲ့ ပြောရေးဆိုခွင့်ရှိသူက မဲခေါင်ကိုပြောပါတယ်။
“ဆေးရုံကို ပစ်မှတ်ထားပြီး တိုက်ခိုက်တယ်ဆိုတာ ပြည်သူကိုတိုက်ရိုက် လူသားမဆန်စွာ တိုက်ခိုက်တဲ့ နည်းလမ်းပါပဲ” လို့ သူကပြောပါတယ်။
ကျောက်မဲပြည်သူ့ဆေးရုံ ဗုံးကြဲတိုက်ခိုက်ခံရမှုအပေါ် အမျိုးသားညီညွတ်ရေးအစိုးရ(NUG)ရဲ့ ကျန်းမာရေးဝန်ကြီးဌာန၊ တအောင်းပြည် ကျန်းမာရေးကောင်စီ၊ ကျန်းမာရေးမိသားစု- မန္တလေးတို့ကနေ ဝမ်းနည်းကြောင်းသဝဏ်လွှာတွေပေးပို့ခဲ့ကြပြီး အရပ်သားပြည်သူတွေထိခိုက်သေဆုံးမှုအပေါ် ဝမ်းနည်းကြောင်းနဲ့ အာဏာရှင်စနစ်ပြုတ်ကျသည်အထိ တိုက်ပွဲဝင်သွားမှာဖြစ်ကြောင်း အသီးသီးရေးသားဖော်ပြထားပါတယ်။
တအာင်းဒေသတွင်းမှာ အခုလအတွင်း စစ်ကောင်စီ ဗုံးကြဲတာကြောင့် CDM ဝန်ထမ်းအပါအဝင် အရပ်သား ငါးဦးသေဆုံးကာ ၃၀ ကျော်ဒဏ်ရာရကြောင်းနဲ့ ကျောက်မဲဆေးရုံကိုဗုံးကြဲတဲ့ဖြစ်စဉ်မှာ သုံးဦးသေဆုံးပြီး ၂၀ ကျော်ဒဏ်ရာရတယ်သာဖေါ်ပြထားပြီး နှစ်ဦးသေဆုံးပြီး ၁၀ ဦးကျော်ဒဏ်ရာရတဲ့ဖြစ်စဉ်ကို ထည့်သွင်းဖေါ်ပြမထားသလို မဲခေါင်ကဆက်သွယ်မေးမြန်းပေမယ့် ပြန်လည်မဖြေကြားပါဘူး။
စစ်ကောင်စီက ကျောက်မဲမြို့ကို ဗုံးကြဲတဲ့ ဇန်နဝါရီ၂၅ ရက်ဖြစ်စဉ်ဟာ လေးကြိမ်မြောက်ဖြစ်ပြီး ဇန်နဝါရီ ပထမပတ်ထဲမှာ အေးရှားဝေါ စက်ရုံအနီးကို တတိယအကြိမ်အဖြစ်ဗုံးကြဲခဲ့ပါတယ်။
ဒုတိယအကြိမ်အဖြစ် ၂၀၂၄ခုနှစ်၊ နိုဝင်ဘာ ၃၀ ၊ ညနေ ၆ နာရီခွဲဝန်းကျင်က ကျောက်မဲမြို့၊ အင်ကြင်းတောင်ရပ်ကွက်ကိုဗုံးကြဲခဲ့တာကြောင့် အောင်ဆုပန်ကျောင်းတိုက်မှ ကိုရင်တစ်ပါးနဲ့ဒေသခံခြောက်ဦး နေရာတွင်ပင် သေဆုံးခဲ့ကာ ပြင်းထန်ဒဏ်ရာရရှိသူ ၁၂ ဦးရှိခဲ့ပါတယ်။ ဒဏ်ရာရရှိသူတွေထဲမှ ဆေးရုံးအရောက် နှစ်ဦးသေဆုံးခဲ့ပါတယ်၊ ပြင်းထန်ဒဏ်ရာနဲ့ဆေးရုံးမှာ ဆေးကုသမှုခံယူနေတဲ့ ဦးအိုက်စံမှာ ဒီဇင်ဘာ ၅ ရက်မှာ ထပ်မံသေဆုံးခဲ့တာကြောင့် စုစုပေါင်းသေဆုံးသူ ကိုးဦးအထိရှိလာခဲ့ပါတယ်။ ဗုံးထိမှန်ပြီးအိမ် ၂၀ အဆိုးရွားဆုံးထိခိုက်ပျက်စီးဆုံးရှုံးခဲ့ပြီး အပေါ်ပိုင်းထိခိုက်ပျက်စီးခဲ့တဲ့နေအိမ် ၂၈ လုံးရှိခဲ့တယ်လို့သိရပါတယ်။
ပထမအကြိမ်အဖြစ် ၂၀၂၄ခုနှစ်၊ ဇွန် ၃၀၊ ည ၁၂ နာရီက ဂျက်ဖိုက်တာနဲ့ ပေါင် ၅၀၀ ဗုံးကြဲခဲ့တုန်းကလည်း အမျိုးသမီးတစ်ဦးသေဆုံးကာ ဘုန်းကြီးကျောင်းအပါအဝင် နေအိမ် ၂၀ ခန့်ပျက်စီးပြီး ဆီဆိုင်တစ်ဆိုင်မီးလောင်ခဲ့ပါတယ်။
စစ်ကောင်စီအနေနဲ့ စစ်ရေးနဲ့သက်ဆိုင်ခြင်းမရှိတဲ့ ဆေးရုံ၊ ဘာသာရေးအဆောက်အအုံ၊ စာသင်ကျောင်း၊ လူနေအိမ်နဲ့ စစ်ရှောင်စခန်းတွေကို ဗုံးကြဲတိုက်ခိုက်နေတာကြောင့် ဝန်ထမ်းနဲ့အရပ်သားများ အစုလိုက်အပြုံလိုက်သေဆုံးစေတာ၊ အစုလိုက်အပြုံလိုက်ဒဏ်ရာရရှိစေတာတွေဟာ နိုင်ငံတကာက တားမြစ်ထားတဲ့ စစ်ရာဇဝတ်မှုကို ကျူးလွန်နေတာဖြစ်သလို လူ့အခွင့်အရေးကိုချိုးဖေါက်နေတာဖြစ်တယ်လို့ TNLA က ထုတ်ပြန်စာမှာဖေါ်ပြပါတယ်။
MK – 016
#MeKongNews
