စစ်ရေးပဋိပက္ခကြောင့် ရှမ်းပြည်တောင်ပိုင်းမှာ တစ်နှစ်အတွင်း ကလေး ၁၆ ဦး အပါအဝင် အရပ်သား ၁၂၇ ဦး သေဆုံးခဲ့
မဲခေါင်၊ ဇန်နဝါရီ ၁၄
ဒေသတွင်း အရပ်ဘက်အဖွဲ့အစည်းတစ်ခုရဲ့ စာရင်းတွေအရ ရှမ်းပြည်တောင်ပိုင်းမှာ စစ်ရေးပဋိပက္ခတွေကြောင့် ၂၀၂၄ ခုနှစ် တစ်နှစ်တာအတွင်း ကလေး ၁၆ ဦးအပါအဝင် အရပ်သား ၁၂၇ ဦး သေဆုံးခဲ့ပါတယ်။
ပအိုဝ်းတိုင်းရင်းသား အများဆုံးနေထိုင်ရာဖြစ်တဲ့ ဆီဆိုင်၊ ဟိုပုံး၊ လွိုင်လင်၊ ပင်လောင်း၊ မောက်မယ်၊ ညောင်ရွှေနဲ့ ဖယ်ခုံမြို့နယ်တွေမှာ စစ်ကောင်စီက လေကြောင်းကနေဗုံးကြဲတာ၊ မိုင်းထိတာနဲ့ စစ်ရေးပစ်မှတ်မဟုတ်တဲ့နေရာတွေကိုပစ်တဲ့ လက်နက်ကြီးကျည်ကျရောက်ပေါက်ကွဲတာတွေကြောင့် အရပ်သား ၁၂၇ ဦးသေဆုံးကာ ၁၈၉ ဦးဒဏ်ရာရတယ်လို့ ပအိုဝ်းလူငယ်အစည်းအရုံး (PYO) က ဇန်နဝါရီ ၁၃ မှာ ZOOM APP နဲ့ပြုလုပ်တဲ့ သတင်းစာရှင်းလင်းပွဲမှာပြောပါတယ်။
အမျိုးသား၊ အမျိုးသမီး အတည်မပြုနိုင်သူ ခြောက်ဦး၊ ကလေး ၁၆ ဦး၊ အမျိုးသမီး ၁၆ ဦးနဲ့ အမျိုးသား ၈၉ ဦး သေဆုံးခဲ့ပြီး အမျိုးသား၊ အမျိုးသမီးအတည်မပြုနိုင်သူ ၃၄ ဦး၊ ကလေး ၂၆ ဦး၊ အမျိုးသမီး ၃၉ ဦးနဲ့ အမျိုးသား ၉၀ ဦး ထိခိုက်ဒဏ်ရာရရှိခဲ့တာပါ။
အရပ်သားသေဆုံးခဲ့မှုတွေဟာ စစ်ကောင်စီက အကြောင်းမဲ့ ဖမ်းဆီး သတ်ဖြတ်တာ ၃၈ ရာခိုင်နှုန်း၊ လက်နက်ကြီးနဲ့ ကျေးရွာတွေထဲပစ်ခတ်တာကြောင့် သေဆုံးတာ ၂၂ ရာခိုင်နှုန်း၊ လေကြောင်းဗုံးကြဲချတာကြောင့်သေဆုံးတာ ၁၆ ရာခိုင်နှုန်း၊ ဒရုန်းဗုံးကြဲတာကြောင့်သေဆုံးတာ ၆ ရာခိုင်နှုန်း၊ မိုင်းနင်းမိတာနဲ့ စစ်ရှောင်စဉ် အခြေခံဆေးဝါးလိုအပ်ချက်ကြောင့် သေဆုံးခဲ့တာတွေဖြစ်တယ်လို့ သိရပါတယ်။
၂၀၂၄ ခုနှစ်၊ ဇန်နဝါရီလ ၂၁ ရက် ဟိုပုံးမြို့နယ်၊ မဲနယ်တောင် စံဖူး/လုံးဟီး ဒေသမှာဖြစ်ပွားခဲ့တဲ့ စစ်ကောင်စီနဲ့ ပအိုဝ်းအမျိုးသားလွတ်မြောက် ရေးတပ်မတော် PNLA ရဲ့ ထိတွေ့တိုက်ပွဲကစတင်ပြီး ရှမ်းတောင်ဒေသအသီးသီးမှာ တိုက်ပွဲတွေ တဖြည်းဖြည်းကျယ်ပြန့်လာခဲ့တာ ဖြစ်ပါတယ်။
“အရပ်သားဖမ်းဆီးမှုတွေ၊ ပျောက်ဆုံးမှုတွေ ၊အစအန ဖျောက်ခံရတာတွေကို တချို့သော အချက်အလက်တွေထဲမှာ ကျွန်တော်တို့တွေ့မြင်နေရတယ်”လို့ PYO တာဝန်ရှိသူတစ်ဦး ကပြောပါတယ်။
အရပ်သားပြည်သူတွေ ထိခိုက်ဒဏ်ရာရရှိခဲ့မှုအများဆုံးဟာ စစ်ကောင်စီရဲ့ လက်နက်ကြီးပစ်ခတ်မှုနဲ့ လေကြောင်းတိုက်ခိုက်မှုတွေကြောင့် ဖြစ်တယ်လို့ သိရပါတယ်။
၂၀၂၄ ခုနှစ်၊ တစ်နှစ်အတွင်းမှာ ရှမ်းပြည်နယ်တောင်ပိုင်းရှိ မြို့ ခုနစ်မြို့ကို စစ်ကောင်စီတပ်တွေက လက်နက်ကြီးနဲ့ ၅၁၈၆ ကြိမ်ပစ်ခတ်ခဲ့ပြီး လေကြောင်းက အကြိမ် ၅၀၀ နီးပါးဗုံးကြဲချခဲ့တယ်လို့ PYO စာရင်းတွေအရသိရပါတယ်။
CJ-017
#MeKongNews
