ကရင်နီပြည်ကို စစ်ကောင်စီ နှစ်ရက်ဆက်တိုက် ဗုံးကြဲ
မဲခေါင်၊ ဇန်နဝါရီ ၂
ကရင်နီပြည်ထဲက စစ်ဘေးရှောင်နေရာတွေကို ပြီးခဲ့တဲ့နှစ်ရက်မှာ စစ်ကောင်စီက လေကြောင်းကနေ ဗုံးကြဲတိုက်ခိုက်တာတွေ ဆက်တိုက် ပြုလုပ်ခဲ့ရာမှာ ကလေးငယ်အပါအဝင် သုံးဦးသေဆုံးတယ်လို့ဒေသခံတွေဆီကသိရပါတယ်။
၂၀၂၄ခုနှစ်၊ ဒီဇင်ဘာ ၃၁ ရက်၊ ညနေ ၄ နာရီမှာ လွိုင်ကော်အရှေ့ဖက်ခြမ်းမှာရှိတဲ့ စစ်ရှောင်စခန်းအနီးနဲ့ ည ၁၁ နာရီကျော်မှာ ဒီးမော့ဆို အနောက်ဖက်ခြမ်း။ မနေ့က( ဇန်နဝါရီလ ၁) ညနေ ၅ နာရီကျော်မှာ ဒီးမော့ဆိုအနောက်ဖက်ခြမ်း နှစ်နေရာကို နှစ်ရက်ဆက်တိုက် ဗုံးကြဲခဲ့ပါတယ်။
“ဘေးပတ်ဝန်းကျင်ကို ကြဲတာမဟုတ်ဘူး၊ တည့်တည့်လိုက်ကြဲတာ၊ ရွေ့စရာနေရာလည်း မရှိတော့ဘူးပဲ၊ မတတ်နိုင်တော့ဘူး ၊ နေ့စဉ်စိုးရိမ်စိတ်နဲ့နေနေရတာ” လို့ စစ်ရှောင်အမျိုးသမီးတစ်ဦးက ပြောပါတယ်။
ဗုံးကြဲခံရတာကြောင့် အသက် တစ်နှစ်ကျော်ကလေးငယ်အပါအဝင် စစ်ဘေးရှောင်ပြည်သူ သုံးဦးသေဆုံးခဲ့တဲ့အပြင် နှစ်ဦးထိခိုက်ဒဏ်ရာရရှိကာ ကလေးငယ်အပါအဝင် သေဆုံးသူတွေကို ဒီနေ့ နာရေးပြုလုပ်ပေးတယ်လို့ သိရပါတယ်။
စစ်ကောင်စီရဲ့ အဲ့ဒီလုပ်ရပ်အပေါ် ကရင်နီကြားကာလအုပ်ချုပ်ရေးကောင်စီ IEC ရဲ့ အတွင်းရေးမှူး ၂- ဦးဗညားက “ သူတို့က စစ်ရဲ့အရှိန်ကိုပြချင်တာလည်းပါမယ်၊ နောက် လူထုတွေကို အကြောက်တရားရှိပြီး အမြဲတမ်းကြောက်ရွံ့နေအောင် လုပ်တဲ့ပုံစံမျိုးလို့ပြောလို့ရတယ်၊ နောက်ပြီး ၂၀၂၅ ကစစ်ရေးအရကလည်း ပြင်းထန်လာနိုင်ခြေရှိတယ်လို့ ပြောထားတာရှိသလို ကရင်နီက စစ်တပ်စခန်းတွေကို သိမ်းမယ်ဆိုတာ နည်းနည်းစီပါမယ်ထင်တယ်၊ အဲ့တာမျိုးကြောင့် သဲကြီးမဲကြီး ဗုံးလာကြဲတာဖြစ်နိုင်တယ်”လို့ မဲခေါင်ကိုပြောပါတယ်။
၂၀၂၄ ခုနှစ်အတွင်း စစ်ကောင်စီက ကရင်နီပြည်ထဲကို လေကြောင်းတိုက်ခိုက်မှုပေါင်း ၇၈၁ ကြိမ်ပြုလုပ်ခဲ့ပြီး လေကြောင်းရန်၊ လက်နက်ကြီးရန်နဲ့ ဒရုန်းရန်တို့ကြောင့် သေဆုံးခဲ့တဲ့ အရပ်သားပြည်သူ ၇၉ ဦးရှိကာ စစ်ဘေးရှောင်နေချိန် သေဆုံးခဲ့ရတဲ့ ပြည်သူ ၂၆ ဦးရှိတယ်လို့ တိုးတက်သောကရင်နီ ပြည်သူ့အင်အားစု က ဇန်နဝါရီလ ၁ ရက်က ထုတ်ပြန်ထားပါတယ်။
CJ- 004
#MekongNews
