မန်း PDF စစ်မျက်နှာတစ်ခု ထပ်တိုးဖို့ စစ်ကိုင်းမှာ တပ်မဟာသစ်ဖွဲ့စည်းမယ်
မဲခေါင်၊ ဇန်နဝါရီ ၁
ရှမ်းပြည်အပါအဝင် မန္တလေးနဲ့ စစ်ကိုင်းတိုင်းဘက်တွေမှာ ဆက်လက်တိုက်ပွဲဝင်ဖို့နဲ့ စစ်ရေးအရှိန်မြှင့်ဖို့အတွက် ပြည်သူ့ကာကွယ်ရေးတပ်မတော် ( မန္တလေး) Mandalay- PDF က စစ်ကိုင်းတိုင်းဘက်မှာ တပ်မဟာအသစ်ဖွဲ့စည်းသွားမယ်လို့ မဲခေါင်ကိုပြောပါတယ်။
စစ်ကောင်စီနဲ့ ထိတွေ့တိုက်ပွဲတွေ ဖြစ်ပွားနေတဲ့ ရှမ်းပြည်မြောက်ပိုင်းနဲ့ မန္တလေးတိုင်းက တပ်တွေကို ထုတ်နှုတ်ပြီး စစ်ရေးတွေကို စစ်ကိုင်းတိုင်းဘက်ကို ရွေ့ပြောင်းလိုက်တာမျိုးမဟုတ်ပဲ ထပ်တိုးစစ်မျက်နှာတစ်ခုအနေနဲ့ ဖွဲ့စည်းဖို့ပြင်ဆင်တာဖြစ်တယ်လို့ သိရပါတယ်။
“ အဓိကရည်ရွယ်တာကတော့ မန္တလေးတိုင်းနဲ့ စစ်ကိုင်းတိုင်းကို ဟန်ချက်ညီညီချိတ်ဆက်ပြီးတော့ စစ်ဆင်ရေးတွေဖော်ဆောင်ဖို့၊ စစ်ကောင်စီကိုအထိနာစေဖို့ လုပ်ဆောင်တာဖြစ်တယ်။ လက်ရှိလှုပ်ရှားမှုတွေ၊ ရင်ဆိုင်နေတဲ့ စစ်မျက်နှာတွေမှာလည်း ဆက်ပြီးတိုက်ပွဲဝင်သွားဖို့ရှိမယ်။ ရှမ်းမြောက်၊ မန္တလေးတိုင်းနဲ့ စစ်ကိုင်းတိုင်းနယ်မြေဒေသတွေမှာ ကျွန်တော်တို့အနေနဲ့ ဆက်လက်တိုက်ပွဲဝင်သွားမှာပါဗျ” လို့ Mandaly PDF ရဲ့တာဝန်ခံ ကိုအော်စမွန်က မဲခေါင်ကိုပြောပါတယ်။
စစ်ကိုင်းတိုင်းမှာဖွဲ့စည်းမယ့် တပ်မဟာသစ်မှာ Mandalay PDF က ဦးဆောင်ပြီး ဒေသအသီးသီးမှာရှိတဲ့ တော်လှန်ရေးရဲဘော်တွေနဲ့ ဖွဲ့စည်းဖို့အတွက် မဟာမိတ်ချိတ်ဆက်မှုတွေ၊ ဆွေးနွေးညှိနှိုင်းမှုတွေ လုပ်ဆောင်နေပြီး အတူတကွ ပူးပေါင်းမယ့် အင်အားစုတွေ၊ စစ်သည်တော်တွေကိုလည်း ကြိုဆိုကာ စစ်ကိုင်းတိုင်းမှာရှိနှင့်နေပြီးတဲ့ တော်လှန်ရေး တပ်ဖွဲ့တွေနဲ့လည်း စစ်ဆင်ရေးတွေကို ဟန်ချက်ညီညီပူးပေါင်းဆောင်ရွက်သွားမယ်လို့ ဆိုပါတယ်။
ပြည်သူ့ကာကွယ်ရေးတပ်မတော် ( မန္တလေး) က ၂၀၂၄ ခုနှစ် တနှစ်တာကာလအတွင်း စစ်ကောင်စီတပ်အထိနာစေတဲ့ စစ်ဆင်ရေးတွေကို မိတ်ဖက်တော်လှန်ရေးအင်အားစုတွေနဲ့အတူ တိုက်ပွဲတွေဖော်ဆောင်ခဲ့ပြီး နယ်မြေစိုးမိုးမှုတွေလည်း ရရှိထားကာ လက်ရှိမှာလည်း စစ်ကောင်စီတပ်နဲ့ ထိတွေ့တိုက်ပွဲတွေ ဖြစ်ပွားနေဆဲဖြစ်ပါတယ်။
CJ-004
#MekongNews
