ငြိမ်းချမ်းရေး ဆွေးနွေးရန် အဆင်သင့်ရှိကြောင်းTNLA ထုတ်ပြန်
မဲခေါင်၊ နိုဝင်ဘာ ၂၅
စစ်ရေးပဋိပက္ခတွေ အဆုံးသတ်ပြီး တည်ငြိမ်အေးချမ်းတဲ့ နိုင်ငံရေး အခြေအနေတည်ဆောက်ဖို့ တွေ့ဆုံဆွေးနွေးရန် အဆင်သင့်ရှိတယ်လို့ တအာင်း(ပလောင်) အမျိုးသားတပ်မတော်TNLAက ဒီကနေ့ (နိုဝင်ဘာလ ၂၅) မှာ ထုတ်ပြန်ပါတယ်။
တအာင်းဒေသအတွင်း နေ့စဉ်ရက်ဆက် ဖြစ်ပွားနေတဲ့ တိုက်ပွဲတွေမှာ စစ်ကောင်စီရဲ့ လေကြောင်းအပါအဝင် ပြင်းထန်တဲ့ တိုက်ပွဲတွေကြောင့် စစ်ဘေးဒဏ် ဆိုးရွားစွာ ခံစားနေရတဲ့ ဒေသပြည်သူတွေရဲ့ အကျိုးကို ငဲ့ညှာထောက်ထား၍သော်လည်းကောင်း၊ နယ်စပ်တည်ငြိမ်ရေးနဲ့ တိုက်ပွဲရပ်စဲရေး ကြားဝင်ကြိုးပမ်းဆောင်ရွက်နေတဲ့ တရုတ်နိုင်ငံရဲ့ ကြိုးပမ်းမှုကို လေးစားအသိအမှတ်ပြု၍သော်လည်းကောင်း တွေ့ဆုံဆွေးနွေးဖို့ အဆင်သင့်ရှိတယ်လို့ ထုတ်ပြန်လိုက်တာဖြစ်ပါတယ်။
စစ်ရေးပဋိပက္ခတွေကို အဆုံးသတ်ပြီး တည်ငြိမ်အေးချမ်းတဲ့ နိုင်ငံရေး အခြေအနေ တည်ဆောက်ဖို့အတွက် တရုတ်ရဲ့ ကြားဝင်စေ့စပ်မှုကို အပြုသဘောဆောင် ကောင်းကျိုးရှိတဲ့အမြင်နဲ့ အမြဲပူးပေါင်းဆောင်ရွက်ဖို့ ကြိုးပမ်းလျက်ရှိကြောင်း၊ ကောင်းမွန်တဲ့ရလဒ်တွေ ရရှိစေဖို့ ပူးပေါင်းဆောင်ရွက်သွားမှာဖြစ်ကြောင်း အဲဒီထုတ်ပြန်ချက်မှာ ဖော်ပြထားပါတယ်။
မြောက်ပိုင်းညီနောင်မဟာမိတ် သုံးဖွဲ့အနေနဲ့ ၁၀၂၇ စစ်ဆင်ရေး စတင်ချိန်မှစတင်ပြီး တအာင်းဒေသအတွင်း တိုက်ပွဲတွေ ပြင်းထန်စွာ ဖြစ်ပွားလာတာဟာ နှစ်ပတ်လည်လာခဲ့ပြီဖြစ်ကြောင်း၊ စစ်ကောင်စီတပ်ဖွဲ့ဝင်တွေ၊ စစ်စခန်းတွေ၊ စစ်ကြောင်းတွေကို မိမိတို့ရဲ့ မြို့ရွာ နယ်မြေများဒေသတွေမှာ ကင်းစင်အောင် ဖယ်ရှားတိုက်ထုတ်နိုင်ခဲ့ပြီဖြစ်ပေမယ့် စစ်တပ်က ပြည်သူကို ဦးတည်ပစ်မှတ်ထားကာ လေကြောင်းနဲ့ တိုက်ခိုက်နေတဲ့အတွက် အပြစ်မဲ့ ပြည်သူလူထု စစ်ဘေးဒဏ်ပေါင်းစုံ ဆိုးရွားပြင်းထန်စွာ ခံစားနေရတယ်လို့ TNLAက ဆိုပါတယ်။
တအာင်းလူမျိုးတွေ အဖိနှိပ်ခံဘ၀မှ လွတ်မြောက်ဖို့၊ တအာင်းပြည်နယ်ရရှိဖို့၊ လက်နက်ကိုင်တိုက်ပွဲဝင်ပြီး ကိုယ်ပိုင်ပြဋ္ဌာန်းခွင့်အာမခံတဲ့ ဖက်ဒရယ်ပြည်ထောင်စုနိုင်ငံကို တိုင်းရင်းသား မြန်မာပြည်သူတွေနဲ့ အတူတကွ တည်ဆောက်ဖို့ အမြဲတစေ ကြိုးပမ်းဆောင်ရွက်မှာဖြစ်ကြောင်း၊ ပြည်သူကို ထောက်ထားညှာတာမှုနဲ့အတူ မိမိကိုယ်ကို ခုခံကာကွယ်ပိုင်ခွင့် အခွင့်အရေးကို ကိုင်စွဲထားပြီး ပြဿနာအရပ်ရပ်ကို ဖြေရှင်းနိုင်ရေး တွေ့ဆုံဆွေးနွေး အဖြေရှာဖို့ အဆင်သင့်ရှိတယ်လို့ TNLAရဲ့ ကြေညာချက်မှာ ပါရှိပါတယ်။
၁၀၂၇စစ်ဆင်ရေးစတင်ချိန်ကစပြီး တအား(ပလောင်) အမျိုးသားတပ်မတော် TNLAအနေနဲ့ ရှမ်းပြည်နယ် မြောက်ပိုင်းမှာ မြို့ပေါင်း ၁၁မြို့အထိကို သိမ်းပိုက်ထားနိုင်တာဖြစ်ပေမယ့် စစ်ကောင်စီရဲ့လေကြောင်း တိုက်ခိုက်မှုအပြင် ကုန်စည်၊ စက်သုံးဆီအပါအဝင် ကန့်သတ်မှုမျိုးစုံကို ရင်ဆိုင်နေရတာဖြစ်သလို TNLA၊ MNDAA၊ အာရက္ခတပ်တော် (AA) အဖွဲ့တို့ကို အကြမ်းဖက်အဖွဲ့တွေအဖြစ် သတ်မှတ်ကြောင်းစစ်ကောင်စီကအခုနှစ် စက်တင်ဘာလ ၂ ရက်မှာ ထုတ်ပြန်ကြေညာထားတာလည်း ဖြစ်ပါတယ်။
CJ-003
#MekongNews
#ငြိမ်းချမ်းရေးဆွေးနွေးမယ်
#TNLA
#တအာင်းလူမျိုး
#၁၀၂၇စစ်ဆင်ရေး
နိုဝင်ဘာ ၉ ရက်က အထူးတိုက်ခိုက်ရေး စစ်သင်တန်းဆင်းပွဲမှာ တွေ့ရတဲ့ TNLA တပ်ဖွဲ့ဝင်များ (Photos- TNLA)
