မဲခေါင်၊ အောက်တိုဘာ ၁၅
ရှမ်းပြည်တောင်ပိုင်း၊ ကရင်နီပြည် နယ်စပ်တစ်ကြောမှာ ဖြစ်ပွားနေတဲ့ တိုက်ပွဲတွေကြောင့် ဒီးမော့ဆိုမြို့နယ် အနောက်ဘက်ခြမ်းမှာ ကုန်ပစ္စည်းအဝင် နည်းလာပြီး တဖြည်းဖြည်း ပြတ်လပ်လာတယ်လို့ ဒေသခံတွေက ပြောပါတယ်။
ပအိုဝ်းကိုယ်ပိုင် အုပ်ချုပ်ခွင့်ရဒေသ၊ ပင်လောင်းမြို့နယ်၊ ပင်လောင်း – ဖယ်ခုံ လမ်းမကြီး တစ်လျှောက်က လဲလျောင်း၊ နောင်ဝိုး၊ နမ့်ဖာမူ၊ လင်ခမ်း စတဲ့ ကျေးရွာတွေမှာ တိုက်ပွဲပြင်းထန်နေတာကြောင့် ကရင်နီပြည်ဘက်ကို ကုန်ပစ္စည်း မဝင်နိုင်သေးတာပဲ ဖြစ်ပါတယ်။
“လမ်းလည်း ပိတ်ထားတယ်လေ။ ဘာဝင်တော့မလဲ။ ဆန်ဆို နောက်အပတ်မှ ဝယ်လို့မရရင် မလွယ်ဘူး။ ဒီမှာက လက်လုပ်လက်စားတွေဆိုတော့ တစ်ပြည်ချင်းပဲ ဝယ်စားကြတာလေ။ ဘယ်သူက ဆန်အိတ်လိုက် ဝယ်စားနိုင်မလဲ” လို့ ဒေသတွင်း စစ်ဘေးရှောင် တစ်ဦးက ပြောပါတယ်။
လက်ရှိမှာ ကြက်ဥတစ်လုံး တစ်ထောင်ကျပ်၊ စားအုန်းဆီ ၃ သောင်းကျပ်နဲ့ ဆန်အပါအဝင် တခြားကုန်ပစ္စည်းတွေက ပြတ်လပ်နေတာကြောင့် ကြိုက်ရောင်း၊ ကြိုက်ဝယ် အနေအထား ဖြစ်နေတယ်လို့ ဆိုပါတယ်။
ဒီးမော့ဆိုမြို့နယ်အတွင်း တိုက်ပွဲကြောင့် လမ်းပိတ်ထားရတဲ့ ကာလတွေမှာ ကရင်ပြည်ဘက်နဲ့ ထိုင်းနိုင်ငံတို့ကဝင်တဲ့ ကုန်ပစ္စည်းတွေကို အဓိက မှီခိုနေရပြီး လုံလောက်မှုလည်း မရှိဘူးလို့ ဒေသခံတွေ တစ်ဦးက ပြောပါတယ်။
“အရင်က တောင်ငူဝင်ရင် ရတယ်။ ဈေးတော့ များတာပေါ့။ အရင်ပတ်က တောင်ငူဘက် တံတားကျိုးလို့ တော်တော်ကြာမှ တစ်ခေါက်ဝင်တယ်။ အဓိက အရေးကြီးတဲ့ ဆန်ကို ဝယ်လို့မရနေတာ”
လက်ရှိမှာ ပင်လောင်း – ဖယ်ခုံလမ်းတစ်ကြောမှာ တိုက်ပွဲ ပြင်းထန်နေသလို ဒီးမော့ဆို – တောင်ငူကို ဆက်သွယ်ထားတဲ့ ဇလဲတံတားဟာလည်း အောက်တိုဘာ ၄ ရက်နေ့က မိုင်းခွဲဖျက်ဆီးခံရတာကြောင့် လမ်းကြောင်း ၂ ဆင့် သယ်ယူနေရတဲ့အတွက် နှောင့်နှေးကြန့်ကြာပြီး ကုန်ပစ္စည်း ပြတ်လပ်လာပဲ ဖြစ်ပါတယ်။
ဇလဲတံတားဟာ ဩဂုတ်လတုန်းကလည်း တစ်ကြိမ် မိုင်းခွဲခံခဲ့ရပေမယ့် ပျက်စီးဆုံးရှုံးမှု နည်းပါးခဲ့ပြီး အချိန်မီပြင်ဆင်နိုင်ခဲ့တာကြောင့် ကုန်စည်စီးဆင်းမှု အဆင်ပြေခဲ့ကြတယ်လို့ သိရပါတယ်။
MK-014
