မဲခေါင်၊ အောက်တိုဘာ ၁၀
မန္တလေးတိုင်း၊ သပိတ်ကျင်းမြို့နယ်၊ ဖော့တောကျေးရွာက စစ်ဆေးရေးဂိတ်ကို တအာင်းအမျိုးသား လွတ်မြောက်ရေးတပ်မတော် – TNLA က အောက်တိုဘာ ၇ ကစပြီး ပိတ်ထားတာကြောင့် မိုးကုတ်မြို့အတွင်း ဝင်ရောက်မယ့် ကားအစီးရေ ရာနဲ့ချီပိတ်မိနေတယ်လို့ ယာဉ်မောင်းတွေထံက သိရပါတယ်။
ပိတ်မိနေတဲ့ကားတွေထဲမှာ ခရီးသည်တင်ကားတွအပါအဝင် ဆေးဝါးနဲ့ ရိက္ခာတင်တဲ့ကားတွေလည်းပါဝင်ပြီး တချို့ကားတွေဟာ ၅ရက်လောက် ညအိပ်စောင့်နေရတယ်လို့ ယာဉ်မောင်းတစ်ဦးက ပြောပါတယ်။
လက်ရှိမှာ ၅ ညအိပ်စောင့်နေရတဲ့ ယာဉ်တွေက အောက်တိုဘာလ ၈ရက်က ဟွန်းတီးဆန္ဒပြခဲ့ကြပြီး မြို့ခံတွေဘက်က ဆင်နဲ့ ပစ္စည်းသယ်ချင်ပေမယ့်လည်း TNLA ဖက်က ခွင့်မပြုသေးဘူးလို့ ခရီးသည်တစ်ဦးက ပြောပါတယ်။
“ကားတက်မရတော့ ဆေးတွေ၊ ကုန်တွေက မရောက်နိုင်တော့ဘူး။ ကားတွေ ပေးမတက်ရင် ဆင်တွေနဲ့ ပေးသယ်ကြပါလား။ CDM လုပ်ထားတဲ့ဆင်တွေ မိုးကုတ်ကို တက်လာတာ ရာကျော် ရှိတယ်” လို့ သူက ပြောပါတယ်။
သပိတ်ကျဉ်းမြို့နယ်ကို မန္တလေး PDF က အလုံးစုံထိန်းချုပ်ထားပေမယ့် ကျောက်ကြီးစခန်း အပါအဝင် သိပ္ပံနဲ့ နည်းပညာတက္ကသိုလ် အနီးတစ်ဝိုက်မှာ စစ်ကောင်စီသတင်းပေးတွေ ကျန်ရှိနေသေးတာကြောင့် မိုးကုတ်မြို့တွင်း နောက်ထပ် ဝင်မလာရအောင် ပိတ်ထားတာလို့ မြို့အုပ်ချုပ်ရေးနဲ့ နီးစပ်တဲ့အသိုင်းအဝိုင်းက သိရပါတယ်။
ပြီးခဲ့တဲ့ ရက်ပိုင်းတွေကလည်း မိုးကုတ်မြို့မှာ ပစ်မှတ်တစ်ခုကို ၁၀ သိန်းနဲ့ သတင်းပေးနေတဲ့ စစ်ကောင်စီခန့် ဒလန်တွေကို TNLA က လိုက်လံရှာဖွေ ဖမ်းဆီးခဲ့သေးတယ်လို့ နီးစပ်တဲ့ စစ်ရေးသတင်းအရင်းအမြစ်တွေဆီက သိရပါတယ်။
TNLA က ဖော့တော့ဂိတ်ကို ပိတ်ထားတာကြောင့် စဉ့်ကူးမြို့နယ်၊ ရွှေပြည်ကျေးရွာက စစ်ဆေးရေးဂိတ်ကိုလည်း မန္တလေး PDF က ဖြတ်သန်းခွင့် မပေးတော့ဘူးလို့ သိရပါတယ်။
လက်ရှိမှာ မိုးကုတ် – ပြင်ဦးလွင် – မန္တလေးလမ်း၊ မိုးကုတ် – နောင်ချို လမ်းတွေ ပိတ်ထားတဲ့အပြင် မဘိန်း၊ မိုးမိတ်တို့ဘက်ကလည်း ကုန်ပစ္စည်းတွေ မဝင်တော့တာကြောင့် မိုးကုတ် – သပိတ်ကျဉ်း – စဉ့်ကူး လမ်းကနေ ကုန်ပစ္စည်းနဲ့ ဆေးတွေ သယ်ယူနေရတယ်လို့ ဆိုပါတယ်။
လက်ရှိမိုးကုတ်မြို့တွင်းမှာ လမ်းပိတ်ဆို့မှုကြောင့် ကုန်စည်စီးဆင်းမှု နှောင့်နှေးလာပြီး ကုန်ပစ္စည်းနဲ့ ဆေးတွေပြတ်လာလာရင် စားဝတ်နေရေး ခက်ခဲလာနိုင်တယ်လို့ မြို့ခံတွေက သုံးသပ်ပါတယ်။
“ကားသမားတွေနဲ့ ခရီးသည်တွေ စကားများကြတယ်။ ရဲဘော်တစ်ယောက်က သေနတ်ပြပြီး အကုန်ပစ်သတ်မယ်လို့ ခြိမ်းခြောက်တယ်။ အဲဒီမှာ ညီမလေးတယောက်က နင်တို့လည်း စစ်ကောင်စီတွေနဲ့ အတူတူပဲဆိုတော့မှ ပြန်တောင်းပန်တယ်” လို့ ခရီးသည် တစ်ဦးက ပြောပါတယ်။
ဖြစ်စဉ်နဲ့ ပတ်သက်ပြီး TNLA ရဲ့ ပြောရေးဆိုခွင့်ရှိသူ လွေးယေဦးကို မေးမြန်းခဲ့ရာမှာ ပြန်လည်ဖြေကြားမှု မရှိခဲ့ပေမယ့် အုပ်ချုပ်ရေးပိုင်းနဲ့ ဆက်စပ်တဲ့ သတင်းအရင်းအမြစ် တစ်ဦးကတော့ အတည်ပြုထားပါတယ်။
မိုးကုတ်မြို့ကို TNLA ဦးဆောင်တဲ့ မဟာမိတ်တပ်တွေက ဇူလိုင်လ ၂၄ ရက်နေ့မှာ တိုက်ခိုက်သိမ်းယူခဲ့ပြီး အုပ်ချုပ်ရေး ယန္တရား စတင်လည်ပတ်နေတာဖြစ်ပါတယ်။
MK-014
