မဲခေါင်၊ စက်တင်ဘာ ၁၂
ကချင်ပြည်နယ်၊ ဖားကန့်မြို့နယ်၊ ဆိုင်းတောင်ရွာက စစ်ကောင်စီ လက်အောက်ခံ ရဲစခန်းကို စက်တင်ဘာ ၁၀ ရက် ည ၁၀ နာရီခန့်မှာ KIA နဲ့ ပူးပေါင်းတပ်ဖွဲ့တွေ သိမ်းပိုက်လိုက်ကြောင်း KIA ရှေ့တန်း နဲ့ နီးစပ်သူတွေဆီက သိရပါတယ်။
“ဖားကန့် ဆိုင်းတောင် ရဲစခန်းကို မနေ့ည ၁၀ နာရီလောက်က ရသွားတာ။ စစ်ကောင်စီတွေက တောင့် မခံနိုင်လို့ ထွက်ပြေးသွားကုန်တာ” လို့ KIA ရှေ့တန်း နဲ့ နီးစပ်သူ သတင်းရင်းမြစ် တစ်ဦးက ပြောပါတယ်။
ဒီ မနက်ပိုင်း စခန်း ရှင်းလင်းရေးတွေ လုပ်လိုက်ပြီး ထွက်ပြေး သွားတဲ့ စစ်ကောင်စီတွေကိုလည်း လိုက်လံ ပစ်ခတ်ရှင်းလင်းနေတယ်လို့ ဆိုပါတယ်။
“ဟိုတယ်မှာ ကတည်းက စစ်ကောင်စီတွေကို တမင် မျှားခေါ်လိုက်တယ်။ ထွက်ပေါက်တွေပါ သေချာ ကြိုတင် စီစဉ်ထားတာ။ စစ်ကောင်စီဘက်က အင်အား တအားများသွားတယ်။ စစ်ကြောင်း သုံးကြောင်းနဲ့ လာခဲ့တာ။ ပြန်ထွက်လာဖို့ ခက်သွားတာပေါ့” လို့ နောက်ထပ် သတင်း ရင်းမြစ် တစ်ဦးက ပြောပါတယ်။
ဟိုတာကို ဝိုင်းထားတဲ့ စစ်ကောင်စီတွေကိုလည်း KIA နဲ့ ပူးပေါင်း တပ်ဖွဲ့တွေက ပြန်ပြီး ဝိုင်းဝန်း ပိတ်ဆို့ထားကာ ရဲစခန်းကိုပါ ထိုးစစ်ဆင် တိုက်ခိုက်ခဲ့တာလို့ သူက ပြောပါတယ်။
ပြီးခဲ့တဲ့ ဩဂုတ်လ ၁၅ ရက်နေ့ကလည်း ဖားကန့် လမောင် ဗျူဟာကုန်းနဲ့ တောမှော်စခန်းကို KIA နဲ့ ပူးပေါင်းအဖွဲ့က သိမ်းပိုက်ခဲ့တာ ဖြစ်ပါတယ်။
CJ-008
