မဲခေါင်၊ စက်တင်ဘာ ၆
ကရင်နီပြည်နယ်နဲ့ ရှမ်းပြည် နယ်စပ်၊ ဖယ်ခုံမြို့နယ်၊ လအိကျေးရွာအနီးနားက ဘန်ကောက်စစ်ရှောင်စခန်းကို မနေ့ည (စက်တင်ဘာလ ၅ရက်) ၁၀ နာရီဝန်းကျင်မှာ လေကြောင်းကနေ စစ်ကောင်စီက ဗုံးကြဲတိုက်ခိုက်ခဲ့တာကြောင့် စစ်ရှောင်ကျောင်းသားကလေးငယ်နဲ့ ဆရာ၊ ဆရာမ ၉ ဦး သေဆုံးပြီး ဒဏ်ရာရသူလည်း များပြားတယ်လို့ စစ်ရှောင် အရေးကူညီပေးသူတွေထံက သိရပါတယ်။
“လေယာဥ်က လာတာနဲ့ တန်းကြဲပြီး အကြာကြီး ဝဲနေသေးတယ်။ ပစ်သွားတာကလည်း ဘန်ကောက်စစ်ရှောင်စခန်းကို ပစ်သွားတာ။ ပြည်သူတွေကို တမင်ကြီးလုပ်တာကတော့ လွန်လွန်းပါတယ်။ တိုက်ပွဲလည်း မရှိဘဲနဲ့လေ။ ထိခိုက်မိသူတွေလည်းများတယ်။ ပြောစရာစကားတောင် မရှိတော့ပါဘူး။ စွံ့အမိတယ်” လို့ စစ်ရှောင်ကူညီသူတစ်ဦးက ပြောပါတယ်။
လေကြောင်းကနေ ဗုံးကြဲရခံမှုကြောင့် သေဆုံးသူတွေအပြင် ဒဏ်ရာပြင်းထန်သူ ၉ ဦးလည်း ရှိခဲ့သလို စစ်ရှောင်စခန်းနဲ့ အနီးနားကနေအိမ်တွေလည်း ထိခိုက်ပျက်စီးခဲ့ရတယ်လို့ သိရပါတယ်။
“အဲဒီနေရာက စစ်ရှောင်ကလေးတွေကို စာသင်ပေးတဲ့နေရာပါ။ ခုကလေးတွေဆို ငိုယိုနေကြတယ်။ မနေ့ညကလည်း တညလုံးမအိပ်ရဘူး လေယာဥ်တွေ တောက်လျှောက်ဝဲနေတာ။ ပျောက်တဲ့သူလည်းရှိတယ်”လို့ စစ်ရှောင်အမျိုးသမီးတဦးက ပြောပါတယ်။
ဘန်ကောက်စစ်ရှောင်စခန်းမှာ အိမ်ခြေ ၁၀၀ ကျော်ရှိပြီး လူဦးရေ ၆၀၀ ကျော် နေထိုင်ကာ ကလေးငယ်တွေရဲ့ ပညာရေးအတွက် စာသင်ကြားပေးနေတဲ့ နေရာတခုဖြစ်တယ်လို့ သိရပါတယ်။
ပြီးခဲ့တဲ့ စက်တင်ဘာလ ၄ ရက်နေ့ ညနေပိုင်းမှာလည်း စစ်ကောင်စီတပ်ကနေ နန်းမယ်ခုံအနီးနားကို လေကြောင်းကနေ ဗုံးကြဲတိုက်ခိုက်ခဲ့တာကြောင့် ပြည်သူ ၂ ဦးသေဆုံးခဲ့ရပြီး ထိခိုက်မိသူတွေရှိတဲ့အပြင် အဆောက်အအုံ ပျက်စီးမှုတွေလည်းရှိတယ်လို့ သိရပါတယ်။
Photo – ဒေသခံ
CJ-004
