မဲခေါင်၊ သြဂုတ် ၁၄
ရှမ်းအရှေ့ကို တိုက်ပွဲတွေ ကူးစက်လာနိုင်လို့ စစ်ကောင်စီအသိုင်းအဝန်းက အသင့်အနေအထား ရှိနေဖို့ တပ်တွင်းနဲ့ လက်အောက်ခံဌာနတွေကို သတိပေးချက်တွေ ထွက်ပေါ်နေတယ်လို့ သိရပါတယ်။
ရှမ်းအရှေ့မှာ UWSA မြောက်ပိုင်းနဲ့ NDAA တို့ ရှိသလို UWSA တောင်ပိုင်းစစ်ဒေသလဲ ရှိနေပြီး RCSS ရဲ့ စခန်းကုန်းတွေလဲရှိနေတာ ဖြစ်လို့ အခု ထွက်ပေါ်လာနေတဲ့ သတိပေးချက်ဟာ ဒေသခံ အရပ်သားပြည်သူတွေအတွက်လည်း စိုးရိမ်ဖွယ်အနေအထားလို့ သိရပါတယ်။
ရှမ်းအရှေ့မှာ စစ်ကောင်စီရဲ့ ကျိုင်းတုံအခြေစိုက် တြိဂံဒေသတိုင်းစစ်ဌာနချုပ်ရှိသလို ၊ မိုင်းဖြတ် အခြေစိုက် စကခ-၁၈ နဲ့ မိုင်းဆတ်အခြေစိုက် စကခ-၁၄ တို့ရှိကြကာ ဒေသစစ်ဗျူဟာတွေလဲရှိနေကြပါတယ်။
ကျိုင်းတုံ တသခ လက်အောက်မှာ တိုက်ခိုက်ရေးတပ်ရင်းနဲ့ လက်ရုံးတပ် ၂၃ တပ်၊ မိုင်းဖြတ် စကခ-၁၈ မှာ တပ် ၈ တပ်၊ မိုင်းဆတ် မှာစကခ-၁၄ နဲ့ တပ် ၁၁ တပ်၊ မိုင်းတုံမှာ စစ်ဗျူဟာနဲ့ ၇ တပ်၊တာချီလိတ်မှာ စစ်ဗျူဟာ နဲ့ တပ်ရင်း-၃ ရင်း၊ ကျိုင်းတုံနားက မိုင်းနူန်မှာ အမြောက် မစခ ဌာနချုုပ်နဲ့ အမြောက် ၃ တပ်၊ မိုင်းယန်း ၂ ရင်း၊ မိုင်းခတ် ၃ ရင်း၊ မိုင်းပြင်း ၄ ရင်း၊ ကုန်းဆာ ၂ ရင်း၊ မန်လီမှာ ခလရ-၂၄၄၊ မိုင်းယောင်းနဲ့အနီးမှာမှာ ၅ ရင်း၊ လွိုင်မွေ ၂ ရင်း၊ မိုင်းဖြတ် နဲ့ မိုင်းယောင်းလမ်းမှာ ခလရ-၂၂၁ ၁ ရင်း၊ မိုင်းတွမ််း ၂ ရင်း၊ မိုင်းယောင်း ၄ ရင်း၊ နားကောင်းမူ ခလရ-၆၅ နဲ့စုစုပေါင်း တိုက်ခိုက်ရေးနဲ့ လက်ရုံးတပ် ၈၄ တပ်ရှိတယ်လို့ စစ်အင်္ဂါစဉ်အရ သိရပါတယ်။
“တပ်တွေပဲရှိတာ အခု တပ်တွေမှာ သပိတ်သွပ်လာတာတွေ များသလို ကိုယ့်တပ်မှာမဟုတ်ဘဲ အခြားနေရာ စစ်ထွက်နေရတော့ အင်အားမရှိပါဘူး၊ တချို့ဆို အိုနာ ကျိုးကန်း ဆေးအဆင့်တွေနဲ့ မိသားစုတွေပဲကျန်တယ်၊ အဓိက ကျန်တာက စကခ-၁၈ ပဲ ၊ ခုထိ ဘယ်တိုက်ပွဲမှ ပါတာမတွေ့ရသေးဘူး”လို့ စစ်ရေးလေ့လာနေသူ ၁ ဦးက မဲခေါင်ကို ပြောပါတယ်။
CDM ဗိုလ်ကြီးဇင်ယော်ကလည်း စကခ-၁၈ တပ်မှူးဟာ စစ်ခေါင်းဆောင်နဲ့အတော် အဆင်ပြေတဲ့သူဖြစ်လို့ ခုထိ သူ့တပ်ကို ဥထားဆဲလို့ မှတ်ချက်ပြပါတယ်။
ရှမ်းမြောက် အခြပြု ပန်ဆန်းဗဟိုပြု တပ်မဟာ ၄ ခုမှာ တပ်မဟာ ၃၁၈ ၊ ၆၁၈၊ ၄၁၈ နဲ့၄၆၈ တို့ ဖြစ်ကာ အမြောက်၊ သံချပ်ကာနဲ့လေယာဉ်ပစ်တပ်၊ ဒုံးတပ်တွေ နဲ့ ဖြန့်ခွဲထားတယ်လို့ သိရပါတယ်။
ရှမ်းအရှေ့ အခြေပြု UWSA စစ်ဒေသ ၁၇၁ ဟာ မိုင်းဆတ်-မိုင်းတုံ မှာ အခြေစိုက်ထားပြီး စစ်နယ်မြေ ၃ ခုမှာ တပ်မဟာတွေဖြစ်တဲ့ ၇၇၂၊ ၇၇၅၊ ၇၇၈၊ ၂၄၈ နဲ့ ၅၁၈ တို့ကို ဖြန့်ခွဲထားကာ တောင်+မြောက်အင်အား ၂၅၀၀၀ နဲ့ ၃၀၀၀၀ ကြားရှိတယ်လို့ ခန့်မှန်းထားပါတယ်။
“တပ်တွင်းမှာ ၁၇၊ ၁၈၊ ၁၉ ရက်တွေမှာ ကျိုင်းတုံတိုင်းရုံးကို UWSA “ဝ”တပ်တွေ ဝင်တိုက်မယ်လို့ သတင်းတွေထွက်နေတယ်၊ ရှိတဲ့ရဲမေတွေတောင် လုံခြုံရေးအတွက် အသင့်နေခိုင်းထားတယ်”လို့ တပ်တွင်း သတင်းရင်းမြစ်ကပြောပါတယ်။
လက်ရှိမှာတော့ UWSA နဲ့ NDAA မိုင်းလားတို့ဟာ ဘက်မလိုက်မူကိုဆွဲကိုင်ထားတယ်လို့ ကြေညာထားသလို ပြီးခဲ့တဲ့ ၂၀၂၃ ခုနှစ်၊ဇန်နဝါရီလအတွင်းက ကျိုင်းတုံမြို့ကို တိုက်ခိုက်မယ်ဆိုတဲ့သတင်းအပေါ် ငြိမ်းချမ်းရေးသဘောတူညီချက်ကို ထိန်းသိမ်းသွားမှာဖြစ်ပြီး ကျိုင်းတုံမြို့ကိုတိုက်ခိုက်မှာ မဟုတ်ဘူူးလို့ UWSA က ထုတ်ပြန်ခဲ့ဘူးပါတယ်။
လက်ရှိ နိုင်ငံတွင်း စစ်ဘောင်ကျယ်လာတဲ့ အနေအထားအရ ရှမ်းအရှေ့မြို့ဒေသခံတွေကတော့ ထိုင်းနိုင်ငံဘက်ကို ထွက်ပြေးတိမ်းရှောင်နိုင်ရေး ကြိုတင်ပြင်ဆင်မှုတွေ ရှိထားကြတယ်လို့ စုံစမ်းသိရပါတယ်။
MK-012
