မဲခေါင်၊ ဇူလိုင် ၃၀
ရှမ်းပြည်မြောက်ပိုင်း၊ ကျောက်မဲမြို့မှာ တိုက်ပွဲတွင်းသေဆုံးတဲ့အလောင်းတွေကို နီးရာပြောင်းခင်းတွေထဲမှာပဲ သင်္ဂြိုဟ်နေရတယ်လို့ ဒေသခံ ဆေးအဖွဲ့အစည်းတခုထံက သိရပါတယ်။
မနေ့ဇူလိုင်လ ၂၉ ရက်မှာ ဒေသခံတွေပါဝင်တဲ့ ပြည်သူ့အကျိုးပြု ဆေးအဖွဲ့ဟာ ကျောက်မဲမြို့က တိုက်ပွဲတွေအတွင်းသေဆုံးခဲ့ရတဲ့ အလောင်းတွေကို အေးချမ်းသာ သချိုင်းကို မပို့နိုင်တော့ပဲ နီးရာ ပြောင်းခင်းတွေထဲမှာပဲ သဂြိုလ်ပေးခဲ့ရတယ်လို့ ပြောပါတယ်။
“ပရဟိတတွေလဲ အလောင်းတွေများလွန်းလို့ ခြေကုန်လက်ပန်းကျနေပြီ၊ ကားတွေလဲ ဆီမရှိတော့ဘူး၊ အလောင်းတွေကလဲ ရက်ကြာတော့ ကိုင်တွယ်ရတာမကောင်းတော့တဲ့အပြင် အနံ့အသက်လဲ တမြို့လုံးခံနေရပြီ၊ အေးချမ်းသာသချိုင်းမပို့နိုင်တော့လို့ နီးရာပြောင်းခင်းတွေထဲမှာပဲသဂြိုလ်ရတော့တယ်၊ အလောင်းတွေက အစုံဆိုတော့ တချို့အဖွဲ့တွေတေင်းဆိုလို့ လက်မောင်းတံဆိပ်တွေ ခွာပေးရတယ်၊ ဒီအတိုင်းမီးရှို့ရတာ၊ ကိုယ်တွေမှာပါနေတဲ့ ခဲယမ်းတွေကြောင့် မီးရှို့ပြီး ပြေးပဲ၊ မီးနဲ့ပေါက်ကွဲတာလေ ၊ ဓာတ်ပုံတော့ မရိုက်ရဘူး” လို့ ယင်းဆေးအဖွဲ့ဝင် ၁ ဦးက မဲခေါင်ကိုပြောပါတယ်။
ပန်ဟတ်၊ ကျောက်မဲကြီး၊ အင်ကြင်းတောင်က အဆိုပါအလောင်းများကို နီးရာပြောင်းခင်းအတွင်း သဂြိုလ်ခဲ့ကြပြီး အရပ်သားထက် စစ်ကောင်စီတပ် တပ်မ-၁၁ နဲ့ တော်လှန်ရေးတပ်ဖွဲ့ဝင်အလောင်း များပြားကာ အရေအတွက် ၄၀ ကျော်သဂြိုလ်ခဲ့ရတယ်လို့ ဆိုပါတယ်။
တော်လှန်ရေးတပ်တွေကတော့ စကခ-၁ ရဲ့စိုးမိုးကုန်း နတ်တောင်ကို ရရှိဖို့ တိုက်ခိုက်ခိုက်နေသလို ခမရ-၅၀၁၊ ၅၀၂ တပ်တွေကဘန်ကာတွေ ကို ထိုးဖောက်နေရပြီး မိုင်းကွင်းအတားအဆီးကြောင့် အပြင်းအထန်တိုက်ခိုက်နေရတယ်လို့ တော်လှန်ရေးတပ်တွေဆီက သိရတယ်လို့ပြောပါတယ်။
ရိက္ခာပြတ်တောက်နေတဲ့ စစ်ကောင်စီတပ်တွေကို လေကြောင်းက ချပေးတဲ့ ရိက္ခာထုတ် ၈ ထုပ်ကို ချကွင်းမှားပြီး ပြင်ပရောက်လာလို့ တော်လှန်ရေးတပ်တွေက သိမ်းဆည်းရမိတယ်လို့လဲ သိရပါတယ်။
စစ်ကောင်စီလေတပ်ဟာ ဂျက်ဖိုက်တာနဲ့ ဗုံး ၃ လုံး ငြိမ်းချမ်းရေးကုန်းဘက်ကို ကြဲချခဲ့ပြီး ရဟတ်ယာဉ် ၂ စီးက စက်သေနတ်နဲ့လာပစ်ပေမယ့် မြို့တွင်းမထိခိုက််ပဲ တပ်စခန်းတွေဘက်ကို တိုက်နေတဲ့ တော်လှန်ရေးတပ်ဖွဲ့တွေကိုပဲ တိုက်ခိုက်နေတာလို့ သိရပါတယ်။
ကျောက်မဲ တိုက်ပွဲတွေအတွင်း စစ်ကောင်စီတပ်ရဲ့ တပ်မ-၁၁၊ ခမရ-၅၀၁ တို့က လက်နက် ၃၇ လက်နဲ့ စစ်အသုံးအဆောင်ပစ္စည်းတွေသိမ်းဆည်းရမိတယ်လို့ TNLA က မနေ့ ဇူလိုင် ၂၉ ရက်မှာ ထုတ်ပြန်ပါတယ်။
MK-012
