မဲခေါင်၊ ဇူလိုင် ၂၉

နိုင်ငံတော်က ခွဲထွက်မယ်ဆိုတဲ့ သတင်းအတု ဖန်တီးဖြန့်ချိနေသူတွေကို ဖော်ထုတ်ပြီး ပြင်းထန်စွာအရေးယူမယ်လို့ MNDAA က မနေ့ရက်စွဲနဲ့ ထုတ်ပြန်ပါတယ်။

အသိဉာဏ်မဲ့ပြီး အောက်တန်းကျတဲ့ သူ တချို့က “တိုင်းရင်းသားလက်နက်ကိုင် တော်လှန်ရေး အဖွဲ့အစည်းများသည် နိုင်ငံတော်က ခွဲထွက်ပြီး နိုင်ငံတော်အသစ် ထူထောင်တော့မည်” ဆိုတဲ့ ခေါင်းစဉ်အပြင် အခြားသောခေါင်းစဉ်များ၊ ညံ့ဖျင်းတဲ့ တရုတ်ဘာသာ အရေးအသားတွေနဲ့ တိကျမှန်ကန်မှုမရှိတဲ့ အရေးအသားတွေ၊ Photoshop တွေအသုံးပြုပြီး အဖွဲ့အစည်းတွေရဲ့ တံဆိပ်တွေကို အသုံးပြုပြီး အချက်အလက်အတုတွေနဲ့ ဆက်သွယ်ရေးကွန်ရက်က တဆင့် ထုတ်ပြန်ချက်တွေ ဆက်တိုက်ပြုလုပ်နေတဲ့အပေါ် MNDAA က ဖြေရှင်းချက် ထုတ်ပြန်လိုက်တာပါ။

တရုတ်ဘာသာနဲ့ထုတ်ပြန်ချက်မှာ ယင်းသို့ အတုပြုလုပ်ကာ အသိဉာဏ်မဲ့ စိတ်ဓာတ်အောက်တန်းကျစွာ နိုင်ငံရေးအရ ထိုးနှက်တိုက်ခိုက်နေတာဟာ အီလက်ထရောနစ်ဥပဒေနဲ့ လူ့ဘောင်အဖွဲ့အစည်းစနစ်ကို ပြင်းထန်စွာချိုးဖောက်နေတာဖြစ်လို့ ဆက်သွယ်ရေးကွန်ရက်ဟာ ဥပဒေကင်းလွတ်တဲ့နေရာမဟုတ်ဘဲ မှတ်ဉာဏ်ရှိကြောင်း၊ သတင်းအတုတွေ ထုတ်ပြန်နေသူတွေရဲ့ IP Address ကတဆင့် စုံစမ်းစစ်ပြီး နောက်နောင်တချိန်တွင် စုံစမ်းဖော်ထုတ်ကာ ပြင်းထန်စွာ အရေးယူသွားမယ်လို့ ဆိုပါတယ်။

မြောက်ပိုင်း မဟာမိတ် ၃ ဖွဲ့ဖြစ်တဲ့ MNDAA, TNLA, AA တို့ရဲ့ တံဆိပ်တွေနဲ့ ထုတ်ပြန်ချက်ကို ဖော်ပြထားတာဖြစ်လို့ ယင်း ၃ ဖွဲ့လုံးက သတင်းအတုနဲ့ နိုင်ငံရေးအရ တိုက်ခိုက်နေသူတွေကို တုံ့ပြန်သွားမယ်လို့ အသိပေးလိုက်တာဖြစ်ပါတယ်။

လက်ရှိမှာ အဆိုပါ တိုင်းရင်းသားတော်လှန်ရေး ၃ ဖွဲ့စလုံးဟာ စစ်ကောင်စီကို စစ်ရေးအရတိုက်ခိုက်နေလို့ စစ်ကောင်စီရဲ့ စစ်တိုင်းဌာနချုပ်၊ တပ်စခန်းတွေ၊ မြို့တွေကို သိမ်းပိုက်ရရှိနေတာမှာ အခုလို နိုင်ငံရေးအရ သတင်းအတုတွေ၊ နိုင်ငံရေးအောက်လမ်းနည်းတွေနဲ့ အပုပ်ချတိုက်ခိုက်နေတာဖြစ်ပါတယ်။

MK-012

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)