မဲခေါင် ဇူလိုင် ၁၉
ရှမ်းပြည်နယ်မြောက်ပိုင်း လားရှိုးမြို့မှာ MNDAA နဲ့ ပူးပေါင်းတပ်ဖွဲ့ ဘက်က ၄ ရက်ကြာ စစ်ဆင်ရေး နားပြီးနောက် ဒီနေ့ ဇူလိုင်လ ၁၉ ရက်နေ့ မနက်ပိုင်းက မြို့အဝင် စည်ပင် နယ်နိမိတ်အထိ တိုက်ပွဲ ပြင်းထန်လာနေပြီဖြစ်ကြောင်း ဒေသခံတွေဆီက သိရပါတယ်။
“အောင်သစ္စာ၊ တာပုံ၊ ရှမ်းကုန်း၊ ၄၁ ဂိတ် ဘက်တိုက်ပွဲ ပြင်းထန်နေတယ်။ မုဒ်ဦးအနီးက ၄၁ တပ်ထဲ တိုက်ပွဲပြင်းထန်နေပြီး မီးပါလောင်နေတယ်။ အဲဒီ နေရာတွေ ဘက်ကလွဲလို့ ဒီနေ့ မနက်ပိုင်းတော့ မြို့ထဲရပ်ကွက် အကုန်အခြေအနေ ကောင်းပါတယ်။ ဖုန်းလိုင်းတွေဝောာ့ ပျက်နေတယ်။ အခုက သိန္နီ ဘက်က ပိုဆိုးနေတာ။” လို့ ဒေသခံ အမျိုးသား တစ်ဦးကပြောပါတယ်။
မနေ့က လားရှိုးဈေးထဲ လက်နက်ကြီးကျည်ကျလို့ ပြည်သူ တစ်ယောက် ထိခိုက်ဒဏ်ရာရသွားပြီး ကုန်စိမ်းဈေးဘက် ဆိုင်ခန်းတန်းလျား မီး လောင်ပေမယ့် ခဏ ဆို ငြိမ်းလိုက်နိုင်ခဲ့တယ်လို့ သူက ပြောပါတယ်။
“ပြီးခဲ့တဲ့ ရက်ပိုင်းက ကျွန်မတို့ လားရှိုးမြို့ကနေ ရှောင်ထွက် လာခဲ့တယ်။ ဆိုင်ကယ်နဲ့ ဟိုပိတ်တိုးဂိတ်ကို ကွင်းပြီး လမ်းမတည့်တည့်ပဲ မောင်းလာခဲ့တယ်။ မြို့ပြင်ဘက်က ရွာတွေမှာ နေအိမ် တွေ အများကြီး ပျက်စီးနေတာ တွေ့ရတယ်။ လူတွေက အကုန်ရှောင်သွားတာတွေ့ရတယ်။ တစ်ချို့အိမ်တွေမှာ တယောက်စ၊ နှစ်ယောက်စ ပဲ တွေ့ခဲ့ရတယ်” လို့ စစ်ရှောင် အမျိုးသမီး တစ်ဦးက ပြောပါတယ်။
လက်ရှိမှာဝော့ လားရှိုးမြို့ကို MNDAA နဲ့ ပူးပေါင်းအဖွဲ့တွေ ဝိုင်းရံပိတ်ဆို့ထားပြီး စစ်ကောင်စီဘက်က ခြေလျင်နဲ့ ထိုးစစ်ဆင်တဲ့ အခြေအနေ မတွေ့ရပဲ လေကြောင်းနဲ့ အပြင်းအထန် ဗုံးကြဲနေတယ်လို့ ဆိုပါတယ်။
စစ်ကောင်စီ ဝါဒဖြန့် သူတွေက လားရှိုး ၅၀၇ စစ်ကောင်စီ တပ် ကျသွားရင် လားရှိုးကျတာနဲ့ တူကြောင်း လူမှုကွန်ယက်မှာ ရေးသား ဖော်ပြထားပါတယ်။
လားရှိုးမြို့ထဲ စစ်ကောင်စီ တပ်စခန်း ၂၀ ကျော်ရှိတာဖြစ်ပြီး လက်ရှိမှာတော့ MNDAA နဲ့ ပူးပေါင်းတပ်ဖွဲ့တွေက စစ်ကောင်စီတပ်စခန်းအကြီးတွေ တစ်ခုမှ ပြတ်ပြတ်သားသား သိမ်းပိုက်ထားတာ မတွေ့ရသေးဘူးလို့ ဒေသခံတွေက ပြောပါတယ်။
ပြီးခဲ့တဲ့ ဇူလိုင်လ ၃ ရက်နေ့ကစ လားရှိုးမြို့နဲ့ မြို့ ပတ်ပတ်လည်ကို MNDAA နဲ့ ပူးပေါင်း တပ်ဖွဲ့တွေက စစ်မျက်နှာ ၄ ခု ထက်မနည်း ဖွင့်ပြီး ၁၀၂၇ ကျော့ပြန် စစ်ဆင်ရေး ပြန်လည် စတင်လာတာ ဖြစ်ပါတယ်။
CJ-008
