မဲခေါင်၊ ဇူလိုင် ၁၆
ရှမ်းမြောက်၊ သီပေါက ခလရ-၂၃ တပ်စခန်းကို ယာယီအပစ်ရပ် ၄ ရက် စာထုတ်ထားတဲ့ MNDAA က မနေ့က ဝင်ရောက်တိုက်ခိုက်သိမ်းယူလိုက်တယ်လို့ သီပေါအရပ်ဘက်အသိုင်းအဝန်းဆီက သိရပါတယ်။
မနေ့ ဇူလိုင်လ ၁၅ ရက် ညနေပိုင်း ၆ နာရီခန့်မှာ သီပေါနဲ့ မိုင်းရယ်မြို့အကြားက ခလရ-၂၃ တပ်စခန်းကို MNDAA က ဝင်ရောက်ပစ်ခတ် သိမ်းပိုက်လာတာလို့ သိရပါတယ်။
“အရင်ရက်တွေကတည်းက အဲစိန်ကျော့ဘက် ကို ကိုးကန့်တွေ စုနေတာကြားတယ်၊ ပလောင်တွေလဲပါတယ်၊ မြို့ထဲတံတားစောင့်တပ်အသိက အဲသတင်းပြောပြတာ လူတော့နည်းပါတယ်၊ စခန်းစောင့် တပ်စိတ် ၁ စိတ်လောက်ပဲရှိတာ၊ သီပေါလဲ လက်နက်ကြီးကတော့ ပစ်ခတ်နေတာပဲ၊ ဘယ်နေ့ ဝင်တိုက်မလဲသာမသိတာ”လို့ သီပေါ အရပ်ဘက်ဝန်ထမ်း ၁ ဦးက မဲခေါင်သတင်းဌာနကို ပြောပါတယ်။
တပ်စခန်းရှိတဲ့နေရာဟာ စိန်ကျော့ ပြည်သူ့စစ် နယ်မြေမှာ ရှိတဲ့ ခလရ-၂၃ အထိုင်ချ တပ်စခန်း ဖြစ်ကာ စစ်ကောင်စီရဲ့ သီပေါ အခြေစိုက်ခလရ-၂၃ ရဲ့ ရှေ့တန်း တပ်စခန်း ၁ ခုဖြစ်တယ်လို့ သိရပါတယ်။
တရုတ်အစိုးရရဲ့ စိုးရိမ်မှုကို အကြောင်းပြပြီး ယာယီ ၄ ရက် အပစ်ရပ်တယ်လို့ တနေ့ ဇူလိုင် ၁၄ က မှ စာထုတ်ထားတဲ့ MNDAA အဖွဲ့ဟာ မိုင်းရယ်ကို ဝင်ထိန်းထားတဲ့ SSPP ရဲ့ မိုင်းရယ်နယ်အစပ်မှာ စစ်ကောင်စီတပ်စခန်းကို တိုက်ခိုက်သိမ်းပိုက်ခဲ့တာဖြစ်ပါတယ်။
လက်ရှိမှာ MNDAA ဟာ လားရှိုးကို တိုက်ခိုက်နေဆဲဖြစ်ပြီး စစ်မျက်နှာစာကို သီပေါ၊ မိုင်းရယ်ဘက် ချဲ့လိုက်တာဖြစ်ပြီး မိုင်းရယ်က လွိုင်ဟိုတုံ စခန်းကိုလည်း ပြီးခဲ့တဲ့ ဇူလိုင် ၇ ရက် ညပိုင်းက ဒရုန်းစစ်ဆင်ပြီး သိမ်းပိုက်ရရှိထားပါသေးတယ်။
MK-012
