မဲခေါင်၊ ဇူလိုင်
ရှမ်းမြောက်၊ လားရှိုး-မိုင်းရယ် နှင့် မိုင်းကိုင်-မိုင်းရှုးလမ်းဘက်ကနေ တောင်ကြီးအထိ ယခင် သွားနိုင်ခဲ့ပေမယ့် ခုတော့ မိုင်းရယ်ဘက်ပါ စစ်ရေးကျယ်ပြန့်လာနေလို့ ကိုးကန့် MNDAA တပ်တွေက စစ်ဘေးရှောင်တွေကို သွားခွင့်မပြုတော့ဘဲ ပြန်လှည့်ခိုင်းနေတယ်လို့ သိရပါတယ်။
“နမ့်ပေါင်က အမျိုးတွေ မိုင်းရယ်ဘက်ကို သွားတာ ကိုးကန့်တွေက အန္တရာယ်ရှိလို့ မသွားနဲ့တားလို့ လာလမ်းအတိုင်းပြန်လာပြီး စဉ့်အင်ဘက်ကို ပြောင်းပြီးသွားနေပြီလို့ ဖုန်းရတယ်၊ သူက မိုင်းရယ်ဘက်ကနေ ရှမ်းတောင်ဘက် အရင်က သွားမလို့ ခုတော့ သွားလို့မရတော့ဘူး၊ သူပြောတာတော့ ကိုးကန့်တပ်တွေ လမ်းမှာ အများကြီးတွေ့ရတယ်လို့ ပြောတယ်”လို့ စစ်ဘေးရှောင်သူရဲ့ ဆွေမျိုးတစ်ဦးက ပြောပါတယ်။
မိုင်းရယ်မြို့နယ် ၊ ခိုလောင်းအခြေစိုက် စစ်ကောင်စီတပ်ရင်း ခလရ-၆၇ က အနီးနားကရွာတွေကို လက်နက်ကြီးနဲ့ ရမ်းသမ်းပစ်ခတ်နေသလို လားရှိုး-နမ့်ပေါင် လမ်းက စစ်ရှောင်တွေကို MNDAA က သွားခွင့်မပြုတော့ဘူးလို့ သိရပါတယ်။
မနေ့ ဇူလိုင်လ ၄ ရက် ညနေ ၃း၃၀ နာရီအချိန်ခန့်မှာ ခလရ-၆၇ ဟာ နမ့်တုံနဲ့ ကုံးမုံရွာတွေဘက်ကို လက်နက်ကြီး ၆ လုံး ပစ်ခတ်ခဲ့သလို တန့်ယန်းမြို့နယ် လွယ်လိန်းတောင်ဘက်ကိုလည်း လက်နက်ကြီး ၃ လုံးပစ်ခတ်ခဲ့တယ်လို့ TNLA က ယနေ့မှာထုတ်ပြန်လာပါတယ်။
လက်နက်ကြီးကျည်တွေဟာ မနေ့ ညနေ ၃ နာရီမှာ ဝမ်လုံထမင်းဆိုင်၊ အထကကျောင်းနားကျခဲ့ပြိး ည ၇:၃၀ အချိန်မှာတော့ ဟိုယကျေးရွာထဲကျတာ လူသူအထိအခိုက်မရှိဘူးလို့ သိရပါတယ်။
ယနေ့ ဇူလိုင် ၅ ရက် နေ့လယ် ၁၂း၃၀ ကျော်မှာတော့ မနေ့က ဟိုယဘက်ကို ထပ်မံပစ်ခတ်တယ်လို့ သိရပါတယ်။ ယင်းလို ခလရ-၆၇ ကလက်နက်ကြီး ပစ်ခတ်လို့ ဟိုယကျေးရွာအုပ်စု ပန်ညောင်နဲ့ ဝမ်လုံရွာတွေက ဒေသခံတွေ ဟာ လွယ်ဟန်းနဲ့ကောင်းမောင်ကျေးရွာဘက်ကိုပြေးလာကြတယ်လို့ သိရပါတယ်။
မိုင်းရယ်ဟာ လားရှိုးကနေ ၅၄ မိုင်ဝေးကွာပြီး အရှေ့ဘက်မှာ UWSA “၀”ဒေသ ပန်ဆန်း ရှိနေတာဖြစ်ကာ ရှမ်းမြောက် ၁၀၂၇ စစ်ဆင်ရေး အပိုင်း ၂ မှာ စစ်ဘောင်ကျယ်ပြန့်လာပြီး ပါဝင်လာနိုင်မယ့် နေရာဒေသ ဖြစ်နိုင်တယ်လို့ စစ်ရေးလေ့လာသူတွေက ပြောနေကြပါတယ်။
MK-012
