မဲခေါင်၊ ဇူလိုင် ၃
ရှမ်းပြည်မြောက်ပိုင်းက လားရှိုးမြို့မှာ ဇူလိုင်လ ၂ရက် ည ၁၁နာရီလောက်ကစပြီး စစ်ကောင်စီတပ်နဲ့ ကိုးကန့်တပ် – MNDAA တို့ စတင်တိုက်ပွဲဖြစ်တယ်လို့ ဒေသသတင်းရင်းမြစ်တွေထံက သိရပါတယ်။
ဇူလိုင်လ ၂ ရက် ည ၁၁ နာရီကနေစပြီး စစ်ကောင်စီတပ်နဲ့ MNDAA တို့ နှစ်ဖက် လက်နက်ကြီးပစ်ခတ်လာတာမှာ ဇူလိုင် ၃ ရက်နေ့ မနက် ၈ နာရီခွဲလောက်အထိ ကြိမ်ရေ ၂၀ ကျော်ရှိလာပြီး နမ့်ပေါင်က ဒေသခံ နမ့်ပေါင်ဒေသခံ တစ်ဦး သေဆုံးပြီး တစ်ဦး ဒဏ်ရာရတယ်လို့ ဒေသခံ တစ်ဦး ကပြောပါတယ်။
“ညကြီး အိမ်ပေါ် လက်နက်ကြီးကျတာ၊ အမျိုးသမီးက ပေါင်ထိပြီး သွေးလွန်လို့သေတယ်။ သူ့အမျိုးသားကတော့ ဆေးရုံယူသွားတယ်။ အိမ်ကတော့လုံးဝ ပျက်စီးသွားပြီ” လို့ သူက ပြောပါတယ်။
ဒါ့အပြင် လားရှိုးမြို့ပေါ် ၁ ရပ်ကွက်၊ ဗျူဟာလမ်းခွဲ၊ ရမခစစ်တိုင်းအဝင်က သာယာလမ်းက အိမ်ပေါ်ကျလို့ ၄ ဦးသေလို့ ပရဟိတကားတွေနဲ့ ဆေးရုံကို ပို့နေတယ်လို့သိရပါတယ်။
ဇူလိုင်လ ၂ ရက်နေ့ည ၁၁ နာရီကနေ မနက် ၄ နာရီအထိ လားရှိုးမြို့နယ်၊ မိုင်းတင်း၊ နမ့်ပေါင်နဲ့ မြို့ရှောင်လမ်းတွေမှာ တိုက်ပွဲတွေဖြစ်နေတာဖြစ်ပြီး လားရှိုး-မိုင်းရယ်ကြားက နမ့်ပေါင်ကျေးရွာမှာရှိတဲ့ နမ္မဗောဓ တံတားကျိုးသွားတယ်လို့လဲ သိရပါတယ်။
“မန်ဆန်ရေကျဘက်လဲ တိုက်ပွဲဖြစ်တယ်။ လက်နက်ကြီးတွေကတော့ မြို့ထဲ အိမ်တွေပါတုန်တယ်။ ခလရ-၄၁ ဘက်ကလဲ လက်နက်ကြီးသံ အဆက်မပြတ်ဘူး။ တန့်ယန်းဘက်လဲ ဖြစ်နေတယ်။ လက်နက်ကြီးတင်မက ဒရုန်းတွေ ဒုံးတွေ နှစ်ဖက်လုံးသုံးနေတာဖြစ်နိုင်တယ်`လို့ ဒေသခံ တစ်ဦးထံက သိရပါတယ်။
လက်ရှိမှာ လားရှိုးမြို့ပတ်ပတ်လည် တိုက်ပွဲတွေဖြစ်နေပြီး မြို့ပေါ် ရပ်ကွက် ၁၂ ရပ်ကွက်က ပြည်သူတွေလည်း တတ်နိုင်သမျှ စစ်ပွဲရှောင်ဖို့ ကြိုးစားနေတယ်လို့ ဒေသခံတွေထံက သိရပါတယ်။ မြို့ပေါ်မှာ အချို့လည်း ပုံမှန်လိုသွားလာနေကကြဆဲပဲလို့ မြို့ခံတွေက ဆိုပါတယ်။
ဇွန်လ ၂၅ ရက်က စခဲ့တဲ့ ၁၀၂၇ စစ်ဆင်ရေး အပိုင်း(၂) ရဲ့ တိုက်ပွဲတွေဟာ ၈ ရက်မြောက်ဖြစ်တဲ့ ယနေ့ဇူလိုင် ၃ ရက်နေ့မှာတော့ လားရှိုးမြို့အထိ ရောက်ရှိလာတာ ဖြစ်ပါတယ်။
MK – 012
