မဲခေါင်၊ ဇွန် ၂၇
မန္တလေးတိုင်း၊ မိုးကုတ်မြို့ အနောက်ပိုင်း ကျပ်ပြင်ရဲစခန်းကို TNLA နဲ့ ပူပေါင်း မိုးကုတ်ဗျူဟာ တပ်ရင်း ၄ရင်းက ဝင်တိုက်မှာဖြစ်လို့ ဒီနေ့မနက်တပိုင်းထိ အနီးနားက နေအိမ်တွေကို ပြောင်းရွှေ့ချိန်ပေးထားတယ်လို့ သိရပါတယ်။
မနေ့က ရဲစခန်းဘက်ကို စစ်ကြောင်းရွှေ့လာတဲ့ TNLA နဲ့ ပူပေါင်း မိုးကုတ်ဗျူဟာ တို့ဟာ ဒီကနေ့ မနက်မှာတော့ ကျပ်ပြင်ရဲစခန်းပတ်လည်ကို ဝိုင်းထားပြီး အနားကအိမ်တွေကို မနက်ပိုင်းအပြီး နေ့လည် ၁၂ နာရီ မတိုင်မီ ရွှေ့ပေးဖို့ပြောဆိုတယ်လို့ ဒေသခံတွေဆီက သိရပါတယ်။
အဲ့လို ရှောင်ခိုင်းထားပေမယ့် ရဲစခန်းဘက်နဲ့ တောင်ပေါ်က TNLA ပူးပေါင်းအဖွဲ့တို့ အပြန်အလှန် ပစ်ခတ်တာတွေရှိနေလို့ ဒေသခံတွေ တိမ်းရှောင်ဖို့ အခက်ခဲရှိနေတယ်လို့ ဆိုပါတယ်။
“ပြည်သူ့အိမ်တွေ ထွက်လို့ရအောင် ရဲစခန်း အပေါ်နဲ့အောက်ပစ်နေတာတွေ ရပ်ပေးသင့်ပါတယ်။ အခုက ၁၂ အတွင်းရှောင်းခိုင်းလည်း မထွက်ရဲကြဘူး” လို့ ဒေသခံတစ်ဦးက ပြောပါတယ်။
ရဲစခန်းအတွင်းက စစ်ကောင်စီတွေကို TNLA နဲ့ ပူးပေါင်းတပ်တွေက လက်နက်ချဖို့ ပြောဆိုနေပေမယ့် ပြန်ခုခံပစ်ခတ်နေတာလို့ ဒေသခံတွေအဆိုအရ သိရပါတယ်။
စစ်ကောင်စီတွေဟာ ရွှေမြင်ဝင်း ဘုန်းကြီးကျောင်းဝန်း၊ စစ်တပ်ကုန်း၊ မစိုးရိမ်ကျောင်း နဲ့ ရေအေးရွာအဝင်တို့မှာ စခန်းချ၊ လက်နက်ကြီး အထိုင်တွေချထားနေဆဲဖြစ်ပါတယ်။
မိုးကုတ်မှာ ဒီနေ့နဲ့ဆိုရင် တိုက်ပွဲဖြစ်တာ ၃ရက်မြောက်ပြီ ဖြစ်ပြီး မနေ့က ဒေါ်နန်းကြည်တောင်၊ ပန်းသပြေ၊ ရွှေသာယာ၊ ဖြူရောင်ကုန်းက စစ်ကောင်စီစခန်းတွေကို TNLA နဲ့ ပူပေါင်း မိုးကုတ်ဗျူဟာ တပ်ရင်း ၄ရင်းက သိမ်းပိုက်နိုင်ခဲ့ပါတယ်။
CJ-001
