မဲခေါင်၊ ဇွန် ၂၅
ရှမ်းပြည်နယ်မြောက်ပိုင်း၊ လားရှိုးမြို့၊ ကုန်းညောင်ရွာ အနီးမှာ ဇွန်လ ၂၃ ရက်နေ့ မနက်ပိုင်းက စစ်ကောင်စီနဲ့ MNDAA တို့အကြား မိနစ် အနည်းငယ် ထိတွေ့တိုက်ပွဲ ဖြစ်ပွားကြောင်း ဒေသခံတွေဆီက သိရပါတယ်။
“လားရှိုး ရပ်ကွက် ၅ ရဲ့ ဟိုဘက်လေ။ ကုန်းညောင်ဘက်မှာ ဖြစ်တာ။ ကုန်းညောင်၊ ပိန်းကန်း တကြောထဲပဲလေ။ ခဏ ပဲ ဖြစ်တာပါ။ MNDAA စစ်သားတွေတော့ မှာလိုက်တယ်။ ၂၅ ရက် ကစပြီး အရေးမကြီးရင် ခရီးမသွားဖို့ မှာလိုက်တယ်” လို့ ဒေသခံအမျိုးသမီး တစ်ဦးက ပြောပါတယ်။
MNDAA တပ်တွေ ရှိတဲ့ နေရာကို စစ်ကောင်စီတွေ ရောက်ရှိလာလို့ ထိတွေ့တိုက်ပွဲ ဖြစ်သွားတာဖြစ်တယ်လို့ ဒေသခံအမျိုးသား တစ်ယောက်က ပြောပါတယ်။
“MNDAA ဘက်က တပ်ဆုတ်ထားတာ မရှိဘူးလို့ ပြောတယ်။ ဒီကြားထဲ တိုက်ပွဲ သတင်း နားစွင့်ပြီးမှ သွားလာသင့်တယ်။ မဖြစ်လာရင်လည်း ဘာမှဖြစ်ဘူးပေါ့။” လို့ ယာဉ်ပိုင်ရှင် တစ်ဦးက ပြောပါတယ်။
အခု ဇွန်လ ၁၂ ရက်နေ့ကစ လားရှိုးမြို့ ပတ်ပတ်လည်က အဝင်/အထွက် လုပ်လို့ရတဲ့ လမ်းတွေ မှန်သမျှကို စစ်ကောင်စီက မြေကော်စက်နဲ့ မြေတူး လမ်းဖြတ်တောက်လိုက်တာဖြစ်ပါတယ်။
လားရှိုး၊ သီပေါ၊ ကျောက်မဲ၊ နောင်ချို မြို့နယ်တွေမှာ စစ်ရေး အခြေအနေ တင်းမာနေပြီး ကျောက်မဲမြို့တွင်း ခရိုင်ရဲတပ်ဖွဲ့ရုံးနဲ့ မြို့ပြင်နေရာတွေမှာတော့ ဒီနေ့ ၂၅ ရက်နေ့မနက်မှာ တိုက်ပွဲဖြစ်ပွားနေတာတွေရှိပြီး အသွားအလာတွေ ရပ်တန့်နေတယ်လို့ သိရပါတယ်။
CJ-008
