မဲခေါင်၊ ဇွန် ၁၉
ရှမ်းတောင်၊ ပင်လောင်းနဲ့ ဖယ်ခုံနယ်စပ် ဆောင်လန်စစ်ရှောင်စခန်းနဲ့ ဗန်းမောက်ရွာကို စစ်ကောင်စီက လက်နက်ကြီးနဲ့ပစ်ခတ်တာမှာ ကျရောက်ပေါက်ကွဲပြီး အမျိုးသမီးနဲ့ ကလေးငယ်တွေ ပြင်းထန်ဒဏ်ရာရရှိခဲ့တယ်လို့ စစ်ရေး သတင်းအရင်းအမြစ်တွေထံက သိရပါတယ်။
ဇွန်လ ၁၉ ရက် မနက်ပိုင်းမှာ စစ်ကောင်စီက လက်နက်ကြီးပစ်ခတ်ရာမှာ ဆောင်လန်စစ်ရှောင်စခန်းထဲ ကျရောက်ပေါက်ကွဲခဲ့တာဖြစ်ပြီး ကလေးငယ် ၂ ဦး ပြင်းထန်ပြီး စိုးရိမ်ရတဲ့ ဒဏ်ရာရှိခဲ့တဲ့အပြင် ဗန်းမောက်ကျေးရွာက အမျိုးသမီးကိုတော့ ခြေထောက်မှာ လက်နက်ကြီးစ ထိမှန်ကာ ပြင်းထန်ဒဏ်ရာ ရရှိခဲ့တယ်လို့သိရပါတယ်။
လက်ရှိမှာတော့ ဒဏ်ရာရသူတွေကို နီးစပ်ရာဆေးရုံတွေမှာ ကုသပေးနေပြီး ဒဏ်ရာပြင်းထန်တဲ့အတွက် တောင်ကြီးမှာ ကုသနိုင်ဖို့ လုပ်ဆောင်နေတယ်လို့လဲ သိရပါတယ်။
ပင်လောင်းမြို့နယ်နဲ့ ဖယ်ခုံနယ်၊ နမ်းဖာမူး၊ နောင်ဝိုး၊ ဗန်းမောက်၊ ကုန်းပေါ၊ လဲလောင်းရွာတွေမှာ ပြီးခဲ့တဲ့ ဇွန်လ ၁၇ ရက်ကတဲက စစ်ကောင်စီနဲ့ တော်လှန်ရေးတပ်ဖွဲ့တွေ တိုက်ပွဲပြင်းထန်နေပြီး မနေ့ ဇွန်လ ၁၈ ရက်နေ့အထိ တနေကုန်တိုက်နေကြတာလို့ သိရပါတယ်။
ဇွန်လ ၁၈ ရက်နေ့က ဖြစ်ပွားခဲ့တဲ့ တိုက်ပွဲမှာ စစ်ကောင်စီလက်အောက်ခံ PNO ပြည်သူ့စစ် ၂ ဦးကို ဖမ်းဆီးမိပြီး တိုက်ပွဲနဲ့ သက်ဆိုင်ခြင်းမရှိတဲ့ ဒေသခံ အသက်မပြည့်သေးတဲ့ လူငယ်တစ်ဦး ခွန်တူပေ ဆိုသူမှာလဲ ပင်လောင်းမြို့နယ်၊ နောင်တရားမှာ သေဆုံးခဲ့တယ်လို့ ဒေသသတင်းအရင်းအမြစ်ထံက သိရပါတယ်။
MK-012
