မဲခေါင်၊ မေ ၁၈
စစ်ကောင်စီက အုပ်ချုပ်ရေးယန္တရား ပြန်လည်ပတ်ဖို့ကြိုးစားနေတဲ့ ကရင်နီပြည်(ကယားပြည်နယ်) မှာ တကျော့ပြန်တိုက်ပွဲတွေ ပြန်ဖြစ်ပွားနိုင်တယ်လို့ တော်လှန်ရေးအဖွဲ့တွေက ပြောကြပါတယ်။
လက်ရှိမှာ စစ်ကောင်စီတပ်ဟာ လွိုင်ကော်မြို့တွင်း ဆေးရုံ၊ ဌာနဆိုင်ရာတွေနဲ့ အုပ်ချုပ်ရေးယန္တရားတွေ ပြန်လည်ပတ်ဖို့ တပ်ပြင်ထွက် စစ်ကြောင်းထိုးတာတွေ လုပ်ဆောင်နေတာကြောင့် ထိတွေ့မှု ရှိနေပါတယ်။
လွိုင်ကော်အခြေစိုက် စစ်ကောင်စီတပ်ရဲ့ ခလရ-၂၆၁ မှ အင်အား ၁၀၀ ခန့်ပါ စစ်ကြောင်းဟာ ဒီရက်ပိုင်းအတွင်း လွိုင်ကော်မြို့အနီး စစ်ကြောင်းထိုးဖို့ ပြင်ဆင်နေတာကြောင့် တိုက်ပွဲတွေ ထပ်ဖြစ်နိုင်တယ်လို့ ဆိုပါတယ်။
“တစ်ချို့ စစ်ကြောင်းတွေက အပျောက်ဖြစ်နေတယ်။ ရှာဖို့ လဲ ခက်တဲ့ အနေအထားပါ။ ရန်သူက သူ့ဆီ ဝင်လာဖို့စောင့်နေတာလဲ ဖြစ်နိုင်လို့ ပါ” လို့ Loikaw PDF ပြန်ကြားရေးတာဝန်ခံ ကိုလင်းလင်း က မဲခေါင်သတင်းဌာနကို ပြောပါတယ်။
လွိုင်ကော်မြို့ကို စစ်ကောင်စီနဲ့ တော်လှန်ရေးတပ်တွေက တစ်ဝက်စီထိန်းချုပ်ထားတဲ့ အနေအထားဖြစ်လို့ စစ်ကောင်စီတပ်လှုပ်ရှားမှုတွေကို အကုန်မသိနိုင်ဘူးဆိုပေမယ့် မြို့ပတ်လည်ကို ဂရုစိုက်ရမယ့် အနေအထားလို့ သူက ဆက်ပြောပါတယ်။
စစ်ကောင်စီဟာ လွိုင်ကော်ဆေးရုံပြန်ဖွင့်လှစ်နိုင်ဖို့အပါအဝင် ဌာနဆိုင်ရာအများစု ပြန်လည်ပတ်ဖို့ လုပ်နေတယ်လို့ သိရပါတယ်။
“သူတို့(စစ်ကောင်စီ) ပြန်ထိန်းနိုင်တယ်ဆိုတဲ့ အသိ ပြည်သူတွေကို လုပ်ပြတာပေါ့။ ပြည်သူတွေကို မြို့ထဲ ပြန်လာနေဖို့ ပြန်ဆွယ်တဲ့ သဘောပေါ့” လို့ လွိုကော်စစ်ဘေးရှောင်တွေကို ကူညီပေးနေသူတစ်ဦးက မဲခေါင်သတင်းဌာနကို ပြောပါတယ်။
လက်ရှိမှာ ကျောင်းဖွင့်ရာသီအတွက် စစ်ကောင်စီဟာ လွိုင်ကော်မြို့တွင်း ကျောင်းဖွင့်ဖို့လုပ်နေပေမယ့် လာတက်မယ့်သူ မရှိလောက်ဘူးလို့ သူက ဆက်ပြောပါတယ်။
“မြို့ပျက်ကြီးထဲ ကျောင်းတက်ဖို့ မလွယ်လောက်ဘူး” လို့ သူက ပြောပါတယ်။
လွိုင်ကော်မှာ စစ်ကောင်စီတပ်တွေဟာ ပြန်လှုပ်ရှားလာတဲ့အတွက် ဒေသခံတွေကို ဖမ်းဆီးပြီး လူသားဒိုင်းအဖြစ် အသုံးချနိုင်တာကြောင့် သတိထားကြဖို့ KA စစ်ရေးချုပ် ဗိုလ်မှူးကြီးဘုန်နိုင် က မဲခေါင်သတင်းဌာနကို ပြောကြားထားပါတယ်။
လွိုင်ကော်မှာ စစ်ကောင်စီရဲ့ ဒေသကွပ်ကဲမှုစစ်ဌာနချုပ် (ဒကစ)၊ ခလရ-၂၆၁၊ ခလရ-၂၅၀၊ ခလရ-၅၄၊ အမြောက်တပ်(အမတ)-၃၂၆ တို့အပြင် ထောက်ပို့တပ်တွေလည်း အခြေစိုက်ကြပါတယ်။
အဲ့ဒီတပ်အများစုဟာ တပ်ပြင်ပမထွက်သည်မှာ လအတန်ကြာပြီဖြစ်ပြီး ဒီရက်ပိုင်းတွင်းမှ ခလရ-၂၆၁ ဟာ တပ်ပြင်ပြန်ထွက်လာတာဖြစ်ပါတယ်။
အဲ့ဒီတပ်တွေထဲမှ ခလရ-၂၆၁ နဲ့ ခလရ-၅၄ တပ်တွေဟာ ကရင်နီတော်လှန်ရေးအဖွဲ့တွေနဲ့ ဖြစ်တဲ့တိုက်ပွဲတွေမှာ လက်နက်ကြီးပစ်ကူပေးခဲ့တဲ့ တပ်တွေဖြစ်ပါတယ်။
မြို့သိမ်းတိုက်ပွဲတွေကြောင့် တိုက်ပွဲပြင်းထန်ခဲ့တဲ့ လွိုင်ကော်မြို့ကို ပြန်လည်ထိန်းချုပ်နိုင်ပြီလို့ ၂၀၂၃ ခုနှစ်၊ နိုဝင်ဘာလမှာ စစ်ခေါင်းဆောင်မင်းအောင်လှိုင်က စစ်ကောင်စီအစည်းအဝေးမှာ ပြောခဲ့ပါတယ်။
အဲ့ဒီလိုပြောပြီးမကြာမီ KNDF ဒုစစ်ဦးစီးချုပ်မာဝီက ဗြောင်လိမ်နေတာဟုဆိုကာ လွိုင်ကော်မြို့ ထေးငှားလျားကန်မှာရှိတဲ့အကြောင်း သူ့လူမှုကွန်ရက်ကနေ အသိပေးခဲ့ပါသေးတယ်။
MK-001
ပုံစာ- ၁၁၁၁ စစ်ဆင်ရေးအတွင်း လွိုင်ကော်မြို့နဲ့ KNDF ရဲဘော်များ
Photo- KNDF B-02
