မဲခေါင်၊ ဧပြီ ၁၈
ရှမ်းပြည်တောင်ပိုင်း၊ ရပ်စောက်မြို့နယ်၊ ဗထူးတပ်မြို့ အနီးက ကျေးရွာတွေမှာ သျှမ်းပြည်ပြန်လည် ထူထောင်ရေးကောင်စီ/ တပ်မတော် (RCSS/SSA) က တပ်သားသစ် အဓမ္မစုဆောင်းနေတယ်လို့ ဒေသတွင်း သတင်းအရင်းအမြစ်တွေက ပြောပါတယ်။
ဖေဖော်ဝါရီလ ၁၁ ရက်နေ့ စစ်ကောင်စီရဲ့ စစ်မှုထမ်းဥပဒေ စတင်ပြီးတဲ့နောက်မှာ RCSS ဘက်ကလည်း အပြိုင်အဆိုင် အကောင်အထည် ဖော်လာတာဖြစ်ပြီး စစ်မှုထမ်း မလိုက်နိုင်သူတွေကို ခြိမ်းခြောက်ငွေတောင်းနေတယ်လို့ ဆိုပါတယ်။
စစ်ကောင်စီတပ်နဲ့ နီးစပ်တဲ့ ဒေသခံတစ်ဦးက “ကားရှိရင် ရှိသလို စက်ရှိရင် ရှိသလို ကောက်ပါတယ်။ အဲဒါကို စစ်တပ်ကလည်း သိပါတယ်။ စစ်တပ်က မတားတဲ့အပြင် အလိုတူ အလိုပါ ဖြစ်နေတာပါ။ နားမလည်တဲ့ ရွာသားတွေက ကြောက်ပြီး ပေးကြပါတယ်” လို့ ပြောပါတယ်။
အရင်က တစ်ရွာကို တစ်ဦးနှုန်းနဲ့ ၂ နှစ်ပြည့်တဲ့အထိ တာဝန်ထမ်းဆောင်ရမယ်လို့ သတ်မှတ်ထားပေမယ့် ဧပြီလအကုန်ကစပြီး ရွာအနေအထားလိုက် တစ်ရွာကို လူအယောက် ၂၀ ကနေ ၇၀ အထိ ခေါ်ယူသွားမယ်လို့ ဒေသခံတွေဆီကနေ သိရပါတယ်။
RCSS အနေနဲ့ လက်ရှိ စစ်မှုထမ်းခေါ်ယူနေတဲ့အထဲမှာ ရှမ်းလူမျိုးတွေပဲ ပါဝင်ပြီး လူမျိုးခြားတွေကိုတော့ သိန်း ၂၀ နဲ့ ပြန်ရွေးခိုင်းနေတယ်လို့ ဆိုပါတယ်။
ဗထူးတပ်မြို့ တိုက်ခိုက်ရေးကျောင်း အနီးမှာ နေထိုင်သူ တစ်ဦးက “စစ်တပ်နဲ့ RCSS ဆိုတာ ကျောချင်းကပ်နေတာ သူတို့ ဘာသာပူးပေါင်းလည်း သူတို့ နယ်မြေ သေချာသတ်မှတ်ခိုင်းပီး လုပ်စားကြပါလား။ ဟိုးအရင်တွေကလည်း အဲ့လိုပဲ သူတို့ဘာသာနေနေတာကို စစ်တပ်ပေါင်းလိုက်မှ အရမ်း ရဲတင်းလာကြတာပါ။ RCSS ထဲမှာ ကာလကြာမြင့်တာရော လူဦးရေ အရမ်းများတာရောကြောင့် လူတိုင်းမိဘတိုင်း စိတ်ဆင်းရဲနေကြရပါတယ်။ RCSS တွေ ဒီလောက် ဆိုးသွမ်းနယ်ကျွံ ပြည်သူတွေ အတင်းခေါ်ပြီး ပိုက်ဆံတွေ ကောက်နေတာကို စစ်တပ်ကြီး ရှိရက်နဲ့ ဘာမှ မကာကွယ်ပေးနိုင်တာတော့ ရှက်မိတယ်” လို့ ပြောပါတယ်။
ဗထူးတပ်မြို့မှာ အမှတ် ၅၀၉၊ ၅၀၈ တိုက်ခိုက်ရေးနဲ့ ဗိုလ်သင်တန်းကျောင်း၊ မွေးမြူရေး စလစတပ်၊ စစ်ဘက်ဆိုင်ရာ လုံခြုံရေးတပ်ဖွဲ့ (စရဖ) စတဲ့ တပ်ရင်းတွေရှိပြီး စစ်ကောင်စီတပ် အနေနဲ့ အကာအကွယ် မပေးနိုင်တာကြောင့် တပ်တွင်း မိသားစုနဲ့ စစ်တပ်ထောက်ခံသူတွေကလည်း စစ်ခေါင်းဆောင်အပေါ် ပြင်းပြင်းထန်ထန် ဝေဖန်နေကြပါတယ်။
ရပ်စောက်မြို့နယ်အတွင်းက နောင်ခမ်း၊ မယ်ဇလီ၊ ဖောင်းတော၊ လွယ်ကိုး၊ ဇလဲ၊ နားခဲလေး၊ နားခဲကြီး၊ လွယ်ဆင်၊ ကျိုင်းခန်းစတဲ့ ကျေးရွာတွေမှာလည်း RCSS က လစဉ် တစ်အိမ် တစ်သောင်းကျပ်နှုန်းနဲ့ စစ်အသုံးစရိတ် ကောက်ခံနေတယ်လို့ ရွာခံတွေဆီက သိရပါတယ်။
အဲဒီ ဖြစ်စဉ်နဲ့ ပတ်သက်ပြီး RCSS ရဲ့ ဒုတိယ ဗိုလ်မှူးကြီး အွမ်ခေးနဲ့ ပြောရေးဆိုခွင့်ရှိသူ ဗိုလ်မှူးခမ်းစံတို့ ၂ ဦးကို အကြိမ်ကြိမ် ဆက်သွယ်မေးမြန်းဖို့ ကြိုးစားခဲ့ပေမယ့် ဖုန်းလက်ခံဖြေဆိုခဲ့ခြင်း မရှိခဲ့ပါဘူး။
MK-014
