မဲခေါင်၊ ဧပြီ ၃
ရှမ်းပြည်တောင်ပိုင်း၊ ပအိုဝ်းအမျိုးသားလွတ်မြောက်ရေးတပ်မတော် (PNLA) က တပ်ဖွဲ့ဝင်အသစ်တွေ အရေအတွက် အကန့်အသတ်မရှိ ခေါ်ယူနေတယ်လို့ PNLA ပြောရေးဆိုခွင့်ရှိသူက ပြောပါတယ်။
တပ်ဖွဲ့ဝင်အသစ်တွေကို လူမျိုးမရွေး၊ ဘာသာမရွေး အကန့်အသတ်မရှိလက်ခံနေကြောင်း လိုအပ်ချက်အနေနဲ့ အသက် ၁၈ နှစ်အနည်းဆုံးရှိရမှာဖြစ်ပြီး စစ်အာဏာရှင်စနစ်ကို အမြစ်ပြတ်တိုက်ဖျက်ချင်တဲ့စိတ်ရှိရမယ်လို့ PNLA ပြောရေးဆိုခွင့်ရှိသူ ခွန်ရိန်းယံ က ဆိုပါတယ်။
“တော်လှန်ရေးဆိုတာက တိုက်ခိုက်ရေးတစ်မျိုးတည်း လိုအပ်တာ မဟုတ်ပါဘူး၊ ဆေးတပ်ဖွဲ့၊ ထောက်ပို့တပ်ဖွဲ့၊ ဆက်သွယ်ရေး၊ ဒရုန်းနည်းပညာ ကဏ္ဍတွေ အများကြီးရှိပါတယ်၊ အဲဒီ ကဏ္ဍတွေထဲကမှ မိမိနဲ့ကိုက်ညီတဲ့ ကဏ္ဍမှာ တာဝန်ထမ်းဆောင်နိုင်ပါတယ်၊ မိမိတာဝန်ထမ်းဆောင်ချင်တဲ့ နေရာမှာ တာဝန်ထမ်းဆောင်ချင်လို့ရပါတယ်၊ အဓိကက တော်လှန်ရေးတာဝန်ကို ထမ်းဆောင်နေဖို့ပါပဲ” လို့ ခွန်ရိန်းယံ က မဲခေါင်ကို ပြောပါတယ်။
ဆက်သွယ်ဝင်ရောက်ချင်လျှင် ခွန်ရိန်းယံရဲ့ Facebook အကောင့်ကဖြစ်စေ၊ ပအိုဝ်းလွတ်မြောက်ရေး တပ်မတော် PNLA News and Information Facebook Messenger တွေကနေ ဆက်သွယ်နိုင်တယ်လို့ ဆိုပါတယ်။
အာဏာရှင်စနစ်ကို အမြစ်ပြတ်တိုက်ဖျက်ဖို့ တော်လှန်ရေးဆင်နွှဲနေတဲ့အချိန်မှာတော့ အိမ်မှာနေသလိုတော့ သက်တောင့်သက်သာရှိမှာ မဟုတ်ပေမယ့် တိုင်းပြည်ရဲ့ အနာဂတ်သက်တောင့်သက်သာ သာသာယာယာ ဖြစ်ဖို့တော်လှန်နေကြတာဖြစ်လို့ လူမျိုးဘာသာမရွေး အားလုံးအတူ တော်လှန်ရေးတာဝန်ကို ထမ်းဖို့ဖိတ်ခေါ်ချင်တယ်လို့ ဆက်ပြောပါတယ်။
စစ်ကောင်စီဟာ ဆီဆိုင်မြို့ကို မြို့ပြန်ဒေသခံတွေကို လူသားဒိုင်းအနေနဲ့ထိန်းချုပ်နေပြီး PNLA ဟာ မြို့တွင်းနေရာတွေမှာ ရှိနေဆဲဖြစ်လို့ ပြည်သူတွေကို စာနာလို့ မတိုက်ခိုက်ပေမယ့် စိတ်ချလုံခြုံရတဲ့ အခြေအနေမဟုတ်သေးဘူးလို့လည်း သတိပေးထားပါတယ်။
လက်ရှိ ပအိုဝ်းဒေသ ဆီဆိုင်၊ ဟိုပုံး၊ ပင်လောင်းဒေသမှာ PNLA ဟာ KNDF, PNDF(KK), BPLA, ရှမ်းတောင်တော်လှန်ရေးမဟာမိတ် တပ်ဖွဲ့တွေနဲ့ ပူးတွဲပြီး စစ်အာဏာရှင်စနစ်ကို တိုက်ဖျက်ရေး တိုက်ပွဲဝင်နေပါတယ်။
MK-012
