မဲခေါင်၊ ဖေဖော်ဝါရီ ၂
ကချင်ပြည်နယ်၊ ဗန်းမော်ခရိုက်၊ မံစီမြို့နယ်ရှိ စစ်ကောင်စီရဲ့ ရှေ့တန်းစခန်းကုန်း တစ်နေရာကို ဒီနေ့ ဖေဖော်ဝါရီ ၂ ရက်နေ့မနက် ၇ နာရီခွဲ ဝန်းကျင်ခန့်မှာ ကချင်အမျိုးသားလွတ်မြောက်ရေးတပ်မတော် (KIA) ပူးပေါင်းအဖွဲ့က ထပ်မံရှင်းလင်း သိမ်းပိုက်ခဲ့ကြောင်း KIA ရှေ့တန်း သတင်းရင်းမြစ်တွေဆီက သိရပါတယ်။
“စခန်းသိမ်းတာ မှန်တယ်။ မနေ့ ဖေဖော်ဝါရီ ၁ ရက်နေ့ည ၇ နာရီ၊ ၈ နာရီလောက်က စစ်ကောင်စီတွေ ထွက်သွားကြတယ်။ ဒီမနက် ကျနော်တို့ သွားကြည့်တဲ့ အချိန် ဘာမှ မရှိတော့ဘူး။ ဆိုတော့ ဒီမနက် ၇ နာရီ ခွဲခန့်မှာ အားလုံး အပြီးအစီး ရှင်းလင်းရေးလုပ်လိုက်တယ်” လို့ KIA ရှေ့တန်း သတင်းရင်းမြစ် တစ်ဦးက ပြောပါတယ်။
အဲဒီ စစ်ကောင်စီ တပ်စခန်းကို ယမန်နေ့ ဖေဖော်ဝါရီ ၁ ရက်နေ့ မနက် ၈ နာရီခွဲခန့်က KIA နဲ့ ပူးပေါင်းအဖွဲ့ဘက်က ထိုးစစ်ဆင် တိုက်ခိုက်ခဲ့တာဖြစ်ပြီး အဲဒီစစ်တပ်စခန်းဟာ ပြီးခဲ့တဲ့ ၂၀၁၁ နိုဝင်ဘာလ ၂၇ ရက်နေ့ည ၁၁ နာရီခန့်က KIA တပ်ရင်း ၂၇ က ဆုတ်ခွာ ထားခဲ့တဲ့ ယခင်က KIA တပ်မဟာ ၃၊ တပ်ရင်း ၂၇ ရဲ့ တပ်စခန်း အဟောင်းဖြစ်တယ်လို့ ဆိုပါတယ်။
“KIA တပ်မဟာ ၃၊ တပ်ရင်း ၂၇၊ တပ်ရင်း ၁၊ တပ်ရင်း ၁၂ ပူးပေါင်း အဖွဲ့က ဒီမနက် ဖေဖော်ဝါရီ ၂ ရက်နေ့ မနက် ၇ နာရီ ၄၅ မိနစ်လောက်က ရှင်းခင်း သိမ်းပိုက်လိုက်တာ” လို့ နောက်ထပ် KIA ရှေ့တန်း သတင်းရင်းမြစ် တစ်ဦးက ပြောပါတယ်။
ဒေသအခေါ် ဘလောင်ဒိန်ဆာ ခေါ် ဘွမ်ရိန်းဘွမ် ဖြစ်ပြီး စစ်ကောင်စီ ခလရ – ၂၅၀ တပ်ရင်းမှူး ဗိုလ်ချုပ် ချမ်းငြိမ်းအောင် ဆိုသူဦးဆောင်တာ ဖြစ်တယ်လို့ KIA နဲ့ နီးစပ်တဲ့ 7 Stars သတင်းဌာနမှာ ဖော်ပြထားပါတယ်။
ဘလောင်ဒိန်ဆာဆိုတဲ့ ဘွမ်ရိန်းဘွမ်က နမ့်ခမ်းမြို့ရဲ့ တစ်ဖက်ကမ်း မန်ဝိန်းကြီး ကနေ ကျော်သွားရင် ရောက်တဲ့ တပ်စခန်းနေရာဖြစ်ကြောင်း နမ့်ခမ်း ဒေသခံတစ်ဦးကလည်း ပြောပါတယ်။
မံစီမြို့နယ်က ကိုက်ထိပ်ရွာရှိ ခမရ ၆၀၂ စစ်ကောင်စီ တပ်စခန်းကိုလည်း ပြီးခဲ့တဲ့ ဇန်နဝါရီ ၂၉ ရက်နေ့ည မနက် ၈နာရီခွဲခန့်က KIA နဲ့ PDF ပူးပေါင်းအဖွဲ့က သိမ်းပိုက်နိုင်ခဲ့ပြီး ပြီးခဲ့တဲ့ ဇန်ဝါရီ ၂၁ ရက်နေ့ကလည်း မံစီမြို့နယ်၊ မန်ဝိန်းကြီးရွာရှိ စစ်ကောင်စီတပ်စခန်းကို KIA နဲ့ ပူးပေါင်း အဖွဲ့က သိမ်းပိုက်ခဲ့ပါသေးတယ်။
CJ-008
#MeKongNews
#KIA
#မံစီ
#စစ်ကောင်စီ
#စခန်းကုန်း
#သိမ်းပိုက်
