မဲခေါင်၊ နို၀င်ဘာ ၂၉
ရှမ်းပြည်နယ် မြောက်ပိုင်း၊ ကိုးကန့်ဒေသ၊ လောက်ကိုင်မြို့က ထွက်ပြေးတိမ်းရှောင် လာတဲ့ စစ်ဘေးရှောင် လူတစ်ထောင်ကျော်ကို မနေ့ နိုဝင်ဘာလ ၂၈ ရက်၊ မနက်ပိုင်းက စပြီး စစ်ကောင်စီတပ်က လားရှိုးမြို့ထဲ ဝင်ခွင့် ပိတ်ပင်ထားလို့ ဒုက္ခ ရောက်နေကြတယ်လို့ ဒေသခံတွေက ပြောပါတယ်။
လောက်ကိုင်မြို့ကနေ တိမ်းရှောင်လာခဲ့တဲ့ စစ်ရှောင်တွေဟာ သိန္နီတံတား ဖျက်ဆီးခံထားတာကြောင့် သိန္နီမြို့နယ်၊ နမ့်ဇလပ်ကျေးရွာကနေ လားရှိုးမြို့နယ် မိုင်းယော်တိုက်နယ် အထိ တောလမ်း အတိုင်း လာရောက်ခဲ့ ပေမယ့် လက်ရှိ လားရှိုးမြို့ အဝင်၊ နားဖကျေးရွာက တိုးဂိတ်မှာ ဝင်ခွင့် ပိတ်ပင် ခံနေရပါတယ်။
“ပိတ်နေတဲ့ သူတွေက ထောင်ကျော်ရှိတယ်။ ၆၈ တပ်က နားဖရွာမှာ ပိတ်ထားတာ။ တစ်ချို့လည်း ရရာနည်းနဲ့ တောလမ်းကနေ ဝင်နေတော့ စစ်တပ်က လိုက်ပစ်နေတာ ရှိတယ်” လို့ လားရှိုးမြို့ခံ အမျိုးသား တစ်ဦးက ပြောပါတယ်။
နားဖကျေးရွာဟာ လားရှိုးမြို့ အရှေ့ဘက် ၁ မိုင်ခန့်သာ ကွာဝေးပြီး စစ်ကောင်စီ ခြေလျင်တပ်ရင်း (၆၈) အထိုင်တပ်စခန်းရှိရာ အဲဒီတပ်က လမ်းပိတ်ထားတာ ဖြစ်ပါတယ်။
လက်ရှိ စစ်ကောင်စီတပ်က ပိတ်မိနေတဲ့ ထောင်နဲ့ချီ စစ်ရှောင်တွေကို သေနတ်ဖောက် လူစုခွဲတာ ပြုလုပ်နေပြီး ပစ်ဖတ်မှုကြောင့် ထိခိုက်သေဆုံးမှု ရှိမရှိကိုတော့ အတည်မပြုနိုင်သေးပါဘူး။
ပိတ်မိနေသူတွေဟာ လောင်ကိုင်မြို့ကနေ ၃ ရက် ခရီးနှင်ခဲ့ရပြီး လက်ရှိ နားဖကျေးရွာထဲက ဘုန်းကြီးကျောင်း၊ ဟိုပိတ်ရွာ ဘုန်းကြီးကျောင်းနဲ့ ဒေသခံတွေရဲ့ နေအိမ်တွေမှာ ခိုလှုံနေရပါတယ်။
ဒီစစ်ဘေးရှောင် တွေဟာ လောက်ကိုင်မြို့ပေါ်မှာ တစ်လကြာ ပိတ်မိပြီးနောက် အခုရက်ပိုင်း လမ်းပြန်ဖွင့်တာကြောင့် လောက်ကိုင်-နမ့်သစ် (၀ပြည်) လမ်းပိုင်းနဲ့ လောင်ကိုင်-ကွမ်းလုံ လမ်းပိုင်း လမ်းကြောင်း ၂ ခုကနေ ပြန်လာကြတာ ဖြစ်ပါတယ်။
လောက်ကိုင်ကနေ တန့်ယန်းမြို့ရောက်နေတဲ့ ရာနဲ့ချီတဲ့ စစ်ဘေးရှောင်တွေကတော့ မနေ့ မနက်ပိုင်းက လားရှိုးမြို့တွင်း ဝင်ရောက်ခဲ့ရာ တန့်ယန်း-လားရှိုးမြို့ အဝင်လမ်းကိုတော့ စစ်ကောင်စီက ဖွင့်ပေးထားတယ်လို့ မြို့ခံတွေက ဆိုပါတယ်။
လောက်ကိုင်မြို့မှာ ပိတ်မိနေသူတွေကို ၀ ပြည် နမ့်သစ်မြို့ထဲ ၀ ပြည်သွေးစည်းညီညွတ်ရေး တပ်မတော်- UWSA က ကူညီ ကယ်ထုတ်နေပြီး နမ့်သစ်မြို့ကနေ လားရှိုးမြို့နဲ့ ကပ်ရက် တန့်ယန်းမြို့ထဲ ပို့ဆောင်ပေးနေတယ်လို့ UWSA က ထုတ်ပြန်ထားပါတယ်။
CJ-014
#MeKongNews
#လောက်ကိုင်
#လားရှိုး
#UWSA
