မဲခေါင်၊ နိုဝင်ဘာ ၂၉
ရှမ်းပြည်နယ် မြောက်ပိုင်း၊ ကိုးကန့်ဒေသ တိုက်ပွဲအတွင်း ခမရ (၅၇၉) တပ်ရင်းမှူး သေဆုံးပြီး စကခ (၁၆) လက်အောက်ခံ ခမရ (၆၉) တပ်ရင်းမှူးကို ဖမ်းဆီးနိုင်ခဲ့တယ်လို့ ဒီနေ့ နိုဝင်ဘာ ၂၉ ရက်မနက်မှာ ကိုးကန့် မီဒီယာက ထုတ်ပြန်ပါတယ်။
နိုဝင်ဘာ ၂၇ ရက်နေ့မှာ ရှီးရှမ်းဒေသ တာရွှေထန်အုပ်စု၊ ရှောက်ပတ်အိုင်ကို ထွက်ပြေးလာတဲ့ ခမရ (၆၉) တပ်ရင်းမှူးကို MNDAA က ဖမ်းဆီးနိုင်ခဲ့တာလို့ သိရပါတယ်။
နိုဝင်ဘာ ၂၇ ရက်နေ့ တစ်ရက်တည်းမှာ MNDAA နဲ့ မဟာမိတ်တပ်ပေါင်းစုတွေဟာ ကျောက်မဲနဲ့ လားရှိုးကြားက ခုတန်စေတီ High Point ကို သိမ်းပိုက်ခဲ့ပြီး ကိုးကန့်ဒေသ ကုန်းကြမ်း တပ်စခန်း တစ်ခုနဲ့ ကျောက်မဲ စစ်ဆေးရေးဂိတ်တွေကို သိမ်းပိုက်နိုင်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
အဲ့ဒီနေ့ ညနေ ၃ နာရီဝန်းကျင်မှာ MNDAA နဲ့ TNLA ပူးပေါင်းတပ်ဟာ စစ်ကောင်စီ အခြေချတဲ့ ကျောက်မဲ စစ်ဆေးရေးဂိတ်ကို ဒရုန်းနဲ့ ပစ်ခတ်ပြီး ခြေလျင်တပ်နဲ့ ထိုးစစ်ဆင်ရာ ညနေ ၅ နာရီခွဲမှာ စစ်ဆေးရေးဂိတ်ကို သိမ်းနိုင်ခဲ့ပြီး စစ်တပ်ဘက်က ခမရ (၅၇၉) တပ်ရင်းမှူးကို ပစ်သတ် ချေမှုန်း နိုင်ခဲ့တယ်လို့ ဆိုပါတယ်။
ဒါ့အပြင် ညနေ ၄ နာရီဝန်းကျင်မှာ MNDAA နဲ့ ကိုးကန့် လုံခြုံရေးတပ်ဖွဲ့တို့ဟာ ကိုးကန့်ရှင်းဝမ်ဒေသ ကုန်ကြမ်း၊ ရှင်းကိုင်း နေရာမှာရှိတဲ့ စစ်ကောင်စီတပ်စခန်းကို တိုက်ခိုက် သိမ်းယူနိုင်ခဲ့ပြီး စစ်ကောင်စီတပ်သား ၆ ဦး သေဆုံးကာ ရိုင်ဖယ် သေနတ် ၈ လက် သိမ်းဆည်းနိုင်ခဲ့တယ်လို့ MNDAA က ဆိုပါတယ်။
MNDAA နဲ့ ဒေသအုပ်ချုပ်ရေးအဖွဲ့တို့ဟာ လူသားချင်း စာနာထောက်ထားမှုအရ စစ်နယ်မြေမှာ စွန့်ပစ်ခံရတဲ့ စစ်ကောင်စီတပ်ဖွဲ့ဝင် အလောင်းတွေကို မြေမြှုပ် ပေးခဲ့တယ်လို့ ကိုးကန့် မီဒီယာက ဖော်ပြပါတယ်။
ဒါ့အပြင် ပြီးခဲ့တဲ့ နိုဝင်ဘာ ၂၆ ရက်နေ့မှာ သိမ်းပိုက်ရရှိထားတဲ့ လုံခမ်းတပ်စခန်း ပတ်လည်ကို ရှင်းလင်းစဉ် စစ်ကောင်စီတပ်ဖွဲ့နဲ့ အတူ လုံခမ်းတပ်စခန်းမှာ နေထိုင်တဲ့ နမ်းဖက်ကာ ပြည်သူ့စစ် ခေါင်းဆောင်ငယ် တစ်ဦးကို ဖမ်းဆီးနိုင်ခဲ့တယ်လို့ သိရပါတယ်။
ရှမ်းမြောက် မဟာမိတ်တပ်ဖွဲ့တွေ အနေနဲ့ ၁၀၂၇ စစ်ဆင်ရေး စတင်ချိန်ကနေ နိုဝင်ဘာ ၂၇ ရက် ညနေထိ စစ်ကောင်စီတပ်စခန်း အကြီး၊ အသေး စုစုပေါင်း ၁၈၀ ခု သိမ်းပိုက် ရရှိထားတယ်လို့ သိရပါတယ်။
MK-009
#MeKongNews
#ကိုးကန့်
#MNDAA
#တပ်ရင်းမှူး
