မဲခေါင်၊ နိုဝင်ဘာ ၂၅

ရှမ်းပြည်နယ် မြောက်ပိုင်း၊ ကိုးကန့် ကိုယ်ပိုင်အုပ်ချုပ်ခွင့်ရဒေသ၊ လောက်ကိုင်ဒေသမှာ အခြေချ တပ်စွဲထားတဲ့ စစ်ကောင်စီရဲ့ နောက်ဆုံး ခံစစ်စခန်းကို မနေ့က သိမ်းယူနိုင်ခဲ့ပြီးနောက် ကိုးကန့်တပ်ဖွဲ့ စစ်ကြောင်းတွေဟာ ကိုးကန့်ဒေသ မြို့တော်ကို ချီတက်နေပြီလို့ MNDAA က ထုတ်ပြန်လိုက်ပါတယ်။

လောက်ကိုင်ဒေသတွင်းက စစ်တပ်ရဲ့ နောက်ဆုံး ခံစစ်စခန်းဖြစ်တဲ့ ဆိုင်တာအိုင် တောင်ကုန်းစခန်းကို ‘၁၀၂၇ စစ်ဆင်ရေး’ ၂၉ ရက်မြောက်အဖြစ် မနေ့က မနက်ပိုင်းမှာ ထိုးစစ်ဆင်ခဲ့ပြီး ညနေပိုင်းမှာ သိမ်းပိုက်နိုင်ခဲ့တယ်လို့ ဆိုပါတယ်။

ဒါ့အပြင် ကိုးကန့်၊ တုန်ရှမ်းဒေသ၊ ပါကျောက်ရွှေနဲ့ လွမ်းလောက်လင် စခန်း ၂ ခုနဲ့ လောက်ပေါက်ကျိုင့် အနောက်တောင်ကုန်းမှာ တပ်စွဲထားတဲ့ ပေထန် တပ်စခန်းတွေကို ဒရုန်းတပ်ဖွဲ့နဲ့ မြေပြင်တပ် ပူးပေါင်းပြီး သိမ်းယူနိုင်ခဲ့တယ်လို့ MNDAA ကပြောပါတယ်။

စခန်းသိမ်း တိုက်ပွဲတွေ အတွင်း စစ်ကောင်စီတပ်သား ၂ ဦး သေဆုံးပြီး ဒဏ်ရာရသူ အများအပြားရှိသလို ၆၀ မမ စိန်ပြောင်း ၂ လက်၊ ၈၄ မမ နောက်ကန်အားမဲ့ အမြောက် တစ်လက်၊ စက်သေနတ် အကြီး ၂ လက်၊ ရိုင်ဖယ် ၃ လက်၊ ပစ္စတို တစ်လက် အပါအဝင် လက်နက်ခဲယမ်း‌ အမြောက်အများ ရရှိခဲ့တယ်လို့ ထုတ်ပြန်ချက်မှာ ဖော်ပြပါတယ်။

‘၁၀၂၇ စစ်ဆင်ရေး’ ၂၉ ရက်တာအတွင်း ရှမ်းမြောက်မှာ မြို့နယ် ၉ ခု နဲ့ စစ်ကောင်စီ စခန်းပေါင်း ၂၀၀ နီးပါး သိမ်းပိုက်နိုင်ခဲ့ပြီး လက်ရှိ တိုက်ပွဲ အရှိန်မြင့်တက်နေဆဲ ဖြစ်တယ်လို့ ညီ‌နောင် ၃ ဖွဲ့ရဲ့ ထုတ်ပြန်ချက်မှာ ဖော်ပြထားပါတယ်။

MK-007

#MeKongNews

#လောက်ကိုင်

#MNDAA

#၁၀၂၇_စစ်ဆင်ရေး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)