မဲခေါင်၊ နိုဝင်ဘာ ၂၀
ကေအဲန်ယူတပ်မဟာ (၃) အုပ်ချုပ်နယ်မြေ၊ ဆောထိ (ရွှေကျင်) မြို့နယ်မှာရှိတဲ့ စစ်ကောင်စီတပ်စခန်း တစ်ခုကို KNLA ပူးပေါင်းတပ်ဖွဲ့တွေ တိုက်ခိုက်ရာ ၁၀ မိနစ်အတွင်း စခန်း သိမ်းပိုက်နိုင်ခဲ့ပြီး စစ်တပ်က ၂ ရက်ဆက်တိုက် လေကြောင်းက တုံ့ပြန် တိုက်ခိုက်ခဲ့တယ်လို့ ကရင်အမျိုးသား အစည်းအရုံးက နိုဝင်ဘာ ၁၉ ရက်မှာ ထုတ်ပြန်ပါတယ်။
နိုဝင်ဘာ ၁၇ ရက်၊ မနက် ၅ နာရီခွဲမှာ ကရင်အမျိုးသား လွတ်မြောက်ရေး တပ်မတော်-KNLA ပူးပေါင်းတပ်တွေ စစ်ကောင်စီ ခမရ (၃၅၁) တောင်ခြေ စခန်းကို တိုက်ခိုက် သိမ်းပိုက်ခဲ့တယ်လို့ KNU က ပြောပါတယ်။
အဆိုပါ စခန်းသိမ်း တိုက်ပွဲအပြီး ၆၀ မမ စိန်ပြောင်း တစ်လက်၊ ၆၀ မမ ကျည် ၅၃ လုံး၊ RPG–7 ၂၆ လုံး၊ 79 ၁၂ လုံး၊ MA ခွင်းဗုံး ၁၃ လုံး၊ MA ၁၁၂၆ လုံး၊ လက်ပစ်ဗုံး ၂၀ လုံး၊ M-14 ဗုံး ၉ လုံး၊ RPG–7 ဘလက် ၁၇ ချောင်း၊ ၆၀ မမ ဆိုက် တစ်ခု၊ စကားပြောစက် (MA.3 MA 2008) တစ်လုံး၊ အင်ဗာတာ တစ်လုံး၊ MA ကျည်ဘောက် ၄ ခု၊ ဂျာမန် (CM.3024-z) တစ်လုံး၊ ကျည်ကာ ဦးထုပ် ၉ လုံး၊ ဆိုလာပြား အကြီး ၂ ချပ်၊ အသေး တစ်ချပ်၊ ဖုန်းတစ်လုံး၊ လက်ပစ်ကက် ၆ လုံးတို့ သိမ်းဆည်းနိုင်ခဲ့တယ်လို့ သိရပါတယ်။
စခန်းသိမ်း တိုက်ပွဲ အပြီး စစ်ကောင်စီတပ် အထိုင်စခန်းတွေကနေ ဆောထိမြို့နယ်က ပြည်သူတွေ နေထိုင်ရာ ကျေးရွာတွေကို လက်နက်ကြီးတွေနဲ့ အကြိမ်များစွာ ပစ်ခတ်ခဲ့ပြီး လေကြောင်းက ဂျက်ဖိုက်တာ လေယာဉ်နဲ့ ၆ ကြိမ် ပစ်ခတ်ခဲ့တယ်လို့လည်း KNU က ထုတ်ပြန်ချက်မှာ ဖော်ပြပါတယ်။
လေကြောင်း ပစ်ကူပြီးနောက် စစ်တပ်ဘက်က စစ်ကူတွေ ထပ်မံ ရောက်ရှိလာပြီး ကွင်းဆိပ်ကျေးရွာနဲ့ ကျားချောင်းကျေးရွာ ကြားက ရေပြန်ချောင်းမှာ KNLA ပူပေါင်းတပ်တွေနဲ့ တိုက်ပွဲ ဆက်ဖြစ်ခဲ့တယ်လို့ သိရပါတယ်။
အဆိုပါ တိုက်ပွဲနဲ့ လေကြောင်း၊ လက်နက်ကြီး ပစ်ခတ်မှုတွေကြောင့် ကလောသိုးခီး (ကျားချောင်း) ကျေးရွာ၊ ထီးခေးလော့ကျေးရွာ၊ ထိုခေးပူ (အောက်ချင်း) ကျေးရွာတွေက လူ ၅၇၂ ဦးအပါအဝင် အနီးအနား ကျေးရွာမှာရှိတဲ့ ပြည်သူတွေ ဘေးလွတ်ရာ ထွက်ပြေးခဲ့ရတယ်လို့ သိရပါတယ်။
နိုဝင်ဘာ ၁၈ ရက်နေ့မှာတော့ တိုက်ပွဲတွေ ငြိမ်သက်နေပြီး ဆောထိမြို့နယ်၊ ဝါးတောကြီးကို မနက် ၁၀ နာရီ ဝန်းကျင်မှာ တစ်ကြိမ်၊ နေ့လယ် ၂ နာရီခွဲ ဝန်းကျင်မျာ တစ်ကြိမ်နဲ့ အင်္ဂနီနဲ့ ကျောက်တန်းရွာတွေကို နေ့လယ် ၁၁ နာရီ ဝန်းကျင်မှာ တစ်ကြိမ် စစ်တပ် လေကြောင်းကနေ လာရောက် တိုက်ခိုက်ခဲ့ပါသေးတယ်။
အဆိုပါ လေကြောင်း တိုက်ခိုက်မှုကြောင့် ကျောက်တန်းရွာက ဦးစိုးသူအောင်၊ ဒေါ်တင်အေးနဲ့ ဒေါ်ခင်ထွေးတို့ရဲ့ နေအိမ် ၃ လုံး ထိခိုက်ပျက်စီးခဲ့ပြီး အသက် ၆၅ နှစ်အရွယ် ဒေါ်ခင်ထွေး ကျည်စထိမှန် သေဆုံးခဲ့တယ်လို့ သိရပါတယ်။
MK-009
#MekongNews
#KNLA
#လေကြောင်း_တိုက်ခိုက်
#ရွှေကျင်မြို့နယ်
