မဲခေါင်၊ နိုဝင်ဘာ ၁၈

စစ်ကိုင်းတိုင်း အထက်ပိုင်း၊ ကသာခရိုင်၊ ထီးချိုင့်မြို့ကို စစ်တပ် လက်နက်ကြီး ပစ်ခတ်မှု၊ လေကြောင်း ပစ်ခတ်မှုနဲ့ မီးရှို့မှုတွေကြောင့် အဆောက်အအုံ အပျက်အစီးမှု များနေတယ်လို့ ဒေသတွင်း သတင်းရင်းမြစ်တွေထံက သိရပါတယ်။

စစ်တပ်နဲ့ တော်လှန်ရေးပူးပေါင်းတပ်တွေ တိုက်ပွဲ ပြင်းထန်ခဲ့တဲ့ ထီးချိုင့်မြို့ပေါ်နဲ့ ထီးချိုင့်မြို့နယ်ထဲက အလယ်တောရွာ၊ အင်းတိန်ရွာ၊ လေသာရွာနဲ့ ပိန္နဲကုန်းရွာတွေကို စစ်ကောင်စီတပ်က နိုဝင်ဘာ ၈ ရက်နေ့ကနေ ၁၅ ရက်နေ့အထိ လေကြောင်းက ဗုံးကြဲ တိုက်ခိုက်မှု ၂၇ ကြိမ်ထက် မနည်း ပြုလုပ်ခဲ့တာ ဖြစ်ပါတယ်။

“ထီးချိုင့်ကို သိမ်းဖို့ တိုက်ပွဲ ဖြစ်နေတာ၊ ဒါပေမယ့် စစ်တပ်က တောင်ကုန်းပေါ်မှာ စခန်းရှိတယ်။ အဲ့ဒီစခန်းက မကျသေးဘူး ဖြစ်နေတာ။ တောင်ကုန်းပေါ်ကနေ မြို့ထဲကို လက်နက်ကြီးနဲ့ပစ်၊ လေယာဉ်နဲ့ လာပြီးတော့ပစ် ဖြစ်နေတာ မြို့တော်တော် ပျက်စီးတယ် ထီးချိုင့်က” လို့ ဒေသခံ တစ်ဦးက ဆိုပါတယ်။

တံတားဦးက တက်လာတဲ့ ဂျက်ဖိုက်တာနဲ့ ဗုံးကြဲ တိုက်ခိုက်မှုကြောင့် နိုဝင်ဘာ ၁၂၊ ၁၃၊ ၁၄ ရက်နေ့တွေ အတွင်း အရပ်သား ပြည်သူ ၁၉ ဦးထက်မနည်း သေဆုံးခဲ့ရတယ်လို့ Tigyaint Revolution–TR က ထုတ်ပြန်ပါတယ်။

အဆိုပါ ထိခိုက်သေဆုံးသူတွေထဲမှာ အသက် ၅ နှစ်အောက် ကလေးငယ် ၃ ဦး အပါအဝင် ကိုယ်ဝန်ဆောင် အမျိုးသမီး ၂ ဦး ပါဝင်ပြီး ဒဏ်ရာရ ပြည်သူ ၂၀ ဦး ထက်မနည်း ရှိခဲ့တယ်လို့ သိရပါတယ်။

ဒါ့အပြင် စစ်ကောင်စီတပ်ဟာ မြတောင်ရဲ စခန်းအနီးက နေအိမ်တွေနဲ့ ထီးချိုင့်မြို့ အမှတ် (၂)၊ (၃)၊ (၄) ရပ်ကွက်ထဲက နေအိမ် အဆောက်အအုံတွေ အပါအဝင် မြို့မဈေးနဲ့ ထီးချိုင့်မြို့နယ်၊ ကြက်သွန်ခင်းရွာက နေအိမ်တွေကို မီးရှို့ ဖျက်ဆီးခဲ့တယ်လို့ Tigyaint Revolution–TR နဲ့ NUG အမှတ် (၁) စစ်ဒေသ လူမှုကွန်ရက် စာမျက်နှာတွေက ဖော်ပြပါတယ်။

နိုဝင်ဘာ ၈ ရက်နေ့ကစပြီး တော်လှန်ရေးတပ်ပေါင်းစုက တကောင်း-ထီးချိုင့်-အင်းတော် လမ်းပိုင်းကို ပိတ်ဆို့ကာ နိုဝင်ဘာ ၉ ရက်နေ့မှာ ထီးချိုင့်မြို့ပေါ်မှာရှိတဲ့ ရဲစခန်း အပါအဝင် ထီးချိုင့်မြို့ပြင် ဧရာဝတီမြစ် တစ်ဖက်ကမ်း မြတောင် လမ်းဆုံ အနီးမှာရှိတဲ့ စစ်တပ်ကို တပြိုင်တည်း စတင် တိုက်ခိုက်ခဲ့ရာက တိုက်ပွဲ ပြင်းထန်လာခဲ့တာပါ။

စစ်ကောင်စီတပ်ဟာ ထီးချိုင့်မြို့အဝင် တံတား၊ မြို့နဲ့ ကပ်လျက်မှာရှိတဲ့ တောင်ပေါ်က ရဲစခန်း အပါအဝင် ရွှေဂူတောင်နဲ့ မြို့တွင်းမှာရှိတဲ့ ဘုရားစေတီ၊ ကျောင်းတိုက်တွေနဲ့ ဆက်သွယ်ရေး တာဝါတိုင်တွေမှာ တပ်စွဲထားတာ ဖြစ်ပါတယ်။

စစ်ကောင်စီတပ်နဲ့ တော်လှန်ရေးတပ်ဖွဲ့ရဲ့ တိုက်ပွဲတွေ နိုဝင်ဘာ ၁၄ ရက်နေ့အထိ ပြင်းထန်နေခဲ့ပြီး အဲ့ဒီနောက်ပိုင်းမှာတော့ တိုက်ပွဲ အရှိန်လျော့သွားကာ စစ်ကောင်စီတပ်ဘက်က လေကြောင်းတိုက်ခိုက်မှုနဲ့ မီးရှို့မှုတွေ ဆက်လုပ်နေတယ်လို့ ဒေသခံတွေက ဆိုပါတယ်။

ထီးချိုင့်မြို့ရဲ့ အနေအထားအရ တောင်ကုန်းတွေ ပေါများပြီး တောင်ကုန်းတွေပေါ် အထိုင်ချထားတဲ့ စစ်ကောင်စီ တပ်စခန်းတွေကို သိမ်းယူရတာဖြစ်လို့ အလွယ်တကူ မရနိုင်ဘဲ စစ်တပ်နဲ့ တော်လှန်ရေး အင်အားစု ၂ ဖက်စလုံး အတွက် ဗျူဟာကျတဲ့ မြို့ဖြစ်တာကြောင့် အဆုံးထိ တိုက်သွားမှာ ဖြစ်လို့ သတင်းမှာတွေကို မယုံကြဖို့ Tigyaint Revolution အဖွဲ့က ပြောပါတယ်။

နိုဝင်ဘာ ၉ ရက်နေ့ကစပြီး ထီးချိုင့်မြို့နယ်အတွင်း အင်တာနက်လိုင်းတွေ 2G အထိ လျှော့ချခံထားရမှုနဲ့ ဖုန်းလိုင်း ပြတ်တောက်မှုကြောင့် လက်ရှိအချိန်ထိ ထီးချိုင့် ဒေသခံတွေနဲ့ ဆက်သွယ်နိုင်ဖို့ ကြိုးစားနေရဆဲ ဖြစ်ပါတယ်။

စစ်ကောင်စီဘက်ကတော့ ထီးချိုင့်မြို့ကို နိုဝင်ဘာ ၁၂ ရက်နေ့က ပြန်လည် ထိန်းချုပ်ထားနိုင်ပြီး မိုင်းရှင်းလင်းရေး လုပ်နေတယ်လို့ နိုဝင်ဘာ ၁၃ ရက်နေ့မှာ ထုတ်ပြန်ထားပါတယ်။

MK–009

#MekongNews

#ထီးချိုင့်မြို့

#လေကြောင်း_တိုက်ခိုက်

#NUG_PDF

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)