မဲခေါင်၊ နိုဝင်ဘာ ၁၈

ရှမ်းပြည်နယ် မြောက်ပိုင်း အပါအဝင် နိုင်ငံတစ်ဝှမ်း ဖြစ်ပွားနေတဲ့ တိုက်ပွဲတွေဟာ “တစ်နိုင်ငံလုံး စစ်ဆင်ရေး” ပထမအဆင့် ရောက်နေတာ ဖြစ်တယ်လို့ ညီ‌နောင် မဟာမိတ် ၃ ဖွဲ့ ပြန်ကြားရေးက နိုဝင်ဘာ ၁၇ ရက်မှာ ထုတ်ပြန် ပြောဆိုလိုက်ပါတယ်။

လက်ရှိ ရှမ်းမြောက်၊ ရခိုင်ပြည်နယ်၊ စစ်ကိုင်းတိုင်း၊ မန္တလေးတိုင်း၊ ကချင်ပြည်နယ်၊ ချင်းပြည်နယ် နဲ့ ကရင်နီပြည်နယ်တွေမှာ တိုက်ပွဲတွေ ဆက်တိုက် ပြင်းထန်နေပြီး စစ်ကောင်စီ တပ်စခန်းတွေ သိမ်းပိုက် ခံနေရတာဟာ “တစ်နိုင်ငံလုံး စစ်ဆင်ရေး” ပထမအဆင့် ဖြစ်တယ်လို့ ဆိုပါတယ်။

အောက်တိုဘာ ၂၇ ရက်မှာ ညီနောင် ၃ ဖွဲ့ဖြစ်တဲ့ MNDAA၊ TNLA ၊ AA အပါအဝင် BPLA၊ MDY PDF တို့ပူးပေါင်းပြီး “အော်ပရေးရှင်း ၁၀၂၇” ကို ရှမ်းမြောက်ဒေသမှာ စတင်ခဲ့ရာ လက်ရှိ မြို့ ၅ မြို့ အပါအဝင် စစ်ကောင်စီတပ်နဲ့ ပြည်သူ့စစ် စခန်းပေါင်း ၁၅၀ ကျော်ကို တော်လှန်ရေး အင်အားစုတွေက သိမ်းပိုက် ထိန်းချုပ်နိုင်ခဲ့ပါတယ်။

အဆိုပါ တိုက်ပွဲတွေအတွင်း စစ်ကောင်စီတပ်သား အများအပြား သေဆုံးပြီး တပ်ရင်းလိုက် လက်နက်ချတာတွေ ရှိသလို အတွဲလိုက်ဒုံးတွေ၊ ဟောင်ဝှစ်ဇာ အမြောက်တွေနဲ့ လက်နက် ခဲယမ်း အများအပြား သိမ်းဆည်း ရမိခဲ့တယ်လို့ ဆိုပါတယ်။

စစ်ကောင်စီက စစ်မြေပြင်မှာ ပြန်လည် မခုခံနိုင်တော့တာကြောင့် အရပ်သား ပြည်သူတွေ နေထိုင်ရာ မြို့တွေကို လေးဘက်လေးတန် ဝိုင်းရံ ပိတ်ဆို့ကာ လူသားဒိုင်းကာအဖြစ် အသုံးပြု တန်ပြန်ထိုးစစ်တွေနဲ့ တုံ့ပြန်တာဟာ နိုင်ငံတကာ စစ်ဥပဒေကို ပြောင်ပြောင်တင်းတင်း ချိုးဖောက်နေတာလို့ ညီနောင် ၃ ဖွဲ့က ပြောပါတယ်။

လက်ရှိ စစ်ကောင်စီတပ်တွေနဲ့ ညီနောင် မဟာမိတ်တပ်တွေ ကိုးကန့်ဒေသ၊ နမ့်ခမ်း၊ ကျောက်မဲ၊ နောင်ချိုမြို့နယ် တွေမှာ ဒီကနေ့ မနက်ပိုင်းအထိ တိုက်ပွဲတွေ ပြင်းထန်နေဆဲ ဖြစ်တယ်လို့ သိရပါတယ်။
MK-007

#MekongNews

#တစ်နိုင်ငံလုံး_စစ်ဆင်ရေး

#ညီနောင်_မဟာမိတ်

#BPLA_MDY_PDF

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)