မဲခေါင်၊ ဇန်နဝါရီ ၁၄
၁၀၂၇ စစ်ဆင်ရေးအဖြစ် မနေ့မှာ ပလက်ဝ ကျောက်တော်အစပ်မှာရှိတဲ့ မီးဝ ဗျူဟာကုန်း နဲ့ ပလက်ဝဒေသအတွင်းရှိ ခန်ခတောင် ဗျူဟာစခန်းကို အပြီးသတ်တိုက်ခိုက်သိမ်းပိုက်နိုင်ခဲ့တယ်လို့ ညီနောင်မဟာမိတ် ၃ ဖွဲ့က သတင်းထုတ်ပြန်ပါတယ်။
အဲ့ဒီ စစ်ကောင်စီရဲ့ ဗျူဟာကုန်းကို တိုက်ခိုက်သိမ်းပိုက်ရာမှာ လက်နက်အများအပြားကိုလည်း သိမ်းပိုက်ရရှိခဲ့ပြီး နောက်ဆက်တွဲ ထပ်မံထုတ်ပြန်မယ်လို့ ဆိုပါတယ်။
ဇန်နဝါရီလ (၁၃) ရက်နေ့၊ ညနေ (၆) နာရီခန့်အချိန်မှာ ပလက်ဝ-ကျောက်တော်အစပ်မှာရှိတဲ့ “မီးဝဗျူဟာကုန်း” တစ်ခုလုံးကို ရက္ခိုင့်တပ်တော် (AA) က အပြီးသတ် သိမ်းပိုက်နိုင်ခဲ့တယ်လို့ ညီနောင်မဟာမိတ်အဖွဲ့က ပြောပါတယ်။
မီးဝ ဗျူဟာကုန်းဟာ ပြီးခဲ့တဲ့အရပ်သားအစိုးရလက်ထက် ၂၀၂၀ ဖေဖော်ဝါရီလတုန်းကလည်း ရခိုင်တပ်တော် AA က ထိုးစစ်ဆင်တိုက်ခိုက်ခဲ့ဖူးပါတယ်။ အဲ့ဒီအချိန်တုန်းက ဖေဖော်ဝါရီလမှ မတ်လအထိ ရက်ပေါင်း ၄၀ ကျော် အင်အားအလုံးအရင်းနဲ့ တိုက်ခိုက်ခဲ့ပေမယ့် ဗျူဟာကုန်းကို သိမ်းပိုက်နိုင်ခဲ့ခြင်းမရှိပါဘူး။
အခု စစ်ကောင်စီက အာဏာသိမ်းပြီးနောက်ပိုင်းမှာတော့ အဲ့ဒီမီးဝ ဗျူဟာကုန်းကို အခု ဇန်နဝါရီလမှ စပြီး AAက ထိုးစစ်ဆင်တိုက်ခိုက်ရာ မနေ့ ဇန်နဝါရီ ၁၃ရက်မှာ တိုက်ခိုက်သိမ်းပိုက်နိုင်ခဲ့တာဖြစ်ပါတယ်။
ဒါ့အပြင် ပလက်ဝဒေသအတွင်း စစ်ကောင်စီရဲ့ လက်ကျန်ဗျူဟာစခန်းတစ်ခုဖြစ်တဲ့ ခန်ခတောင်ဗျူဟာစခန်း ကိုလည်း ရခိုင်တပ်တော် (AA) က အပြီးသတ်ထပ်မံသိမ်းပိုက်ရယူနိုင်ခဲ့ပြီး စစ်လက်နက်ပစ္စည်း အပါအဝင် လက်နက်ခဲယမ်း အမြောက်အများတို့ကို သိမ်းဆည်းရမိခဲ့တယ်လို့ ထုတ်ပြန်ချက်မှာဖော်ပြထားပါတယ်။
မီးဝဗျူဟာကုန်းမကျရေးအတွက် စစ်ကောင်စီက လေကြောင်းတိုက်ခိုက်မှု လက်နက်ကြီးတိုက်ခိုက်မှုယူပြီး အပြင်းအထန်ခုခံပေမယ့် AA ထိုးစစ်ကို မခံနိုင်ပဲ စခန်းလက်လွတ်ခဲ့ရတာဖြစ်ပါတယ်။
AA အနေနဲ့ ပလက်ဝ ဒေသတစ်ခုလုံးကို စစ်ကောင်စီကင်းစင်တဲ့ နယ်မြေဖြစ်ဖို့အတွက် စစ်ကောင်စီရဲ့ လက်ကျန်စခန်းအနည်းငယ်ကို တိုက်ခိုက်သိမ်းပိုက်နေတာဖြစ်ပြီး ပလက်ဝအနောက်ခြမ်းတစ်ခုလုံးကို ထိန်းသိမ်းထားနိုင်ပြီးဖြစ်တယ်လို့ ဆိုထားပါတယ်။
AA အနေနဲ့ ၁၀၂၇ စစ်ဆင်ရေးအတွင်း စစ်ကောင်စီရဲ့ တရွန်အိုင်ဗျူဟာ၊ နှုံဘူးဗျူဟာ၊ စခအောင်းဝစခန်းကုန်း၊ ခဝဲဗျူဟာကုန်း၊ ပွိုင့် ၃၅၁၊ ပွိုင့် ၃၉၁၊ ပွိုင့် ၃၇၇ စတဲ့ စခန်းတွေကို တိုက်ခိုက်သိမ်းပိုက်ပြီးဖြစ်ပါတယ်။
စစ်ရှုံးနေတဲ့ စစ်ကောင်စီဟာ ရခိုင်ဒေသအတွင်းရှိ မြို့နယ်အနှံ့အပြားမှာ အရပ်သားပြည်သူလူထု သွားလာတဲ့ နေရာ အပါအဝင် ရပ်ရွာ၊ သာသနိကအဆောက်အအုံတွေနဲ့ စာသင်ကျောင်းလိုမျိုး နေရာတွေမှာ ရည်ရွယ်ချက်ရှိရှိ မိုင်းထောင်ထားတာတွေ လေကြောင်း လက်နက်ကြီးနဲ့ ပစ်ခတ်တာတွေ စတဲ့ လုပ်ရပ်ဟာ “ဂျနီဗာကွန်ဗင်းရှင်း” ကို ပြောင်ပြောင်းတင်းတင်းချိုးဖောက်နေတဲ့ စစ်ရာဇဝတ်မှုတွေဖြစ်တယ်လို့ လည်း ညီနောင်မဟာမိတ်အဖွဲ့ကပြောပါတယ်။
CJ-002
#MeKongNews
#Operation1027
#မီးဝဗျူဟာကုန်း
